Julita Beraza

Julita Beraza
	; Irudi gehiago
Bizitza
Jaiotza	Anoeta, 1925eko uztailaren 29a
Herrialdea	Gipuzkoa, Euskal Herria
Heriotza	Mexiko, 2020ko otsailaren 2a (94 urte)
Hezkuntza
Hizkuntzak	euskara; gaztelania
Jarduerak
Jarduerak	pilotaria
Pilota

Juliana Ignacia Beraza Leibar (Anoeta, Gipuzkoa, 1925eko uztailaren 29a – Mexiko, 2020ko otsailaren 2a)^[1] erraketista profesionala izan zen. Munduko txapelduna izatera iritsi zen.^[2]24 urtez jokatu zuen Anoetarra, garai guztietako erraketista onenetarikotzat hartua izan da. Horren erakusle publikoak jartzen zizkion goitizenak: La Reina, La Única edota La Venus Rubia.^[3]^[4]

Biografia[aldatu | aldatu iturburu kodea]

Julita, hala deitzen zioten, 1925ean jaio zen Anoetan, Buztina baserrian, Modesto-enea tabernaren ondoan. Txikitan plazara joaten ziren jolastera, eliz atarian aritzen ziren pilotan herriko neska-mutilak. Begirale bat ibiltzen zen handik eta Donostian erraketarekin proba bat egitea proposatu zien. Haren ahizpa Rosario, ahizpetan zaharrena, ere joan zen, Julita eta Marirekin (hiru urte gazteagoa), baina ez zitzaion gustatu. Beste biei bai.

Erraketista ibilbidea[aldatu | aldatu iturburu kodea]

Groseko frontoian hasi ziren jokatzen. Handik Madrilera egin zuten jauzia bi ahizpek, 1940ean. Julitak 15 urterekin debutatu zuen, nahiz eta 16 urte izan arte ezin zen. Urte batzuk geroago Milagros, ahizpa gazteena ere joan zen. Han zenbait urte egin zituzten, tarteka beste hiri batzuetako frontoietan ere jokatuz, Bartzelonan eta Palman. 1952an Julita eta Mari Mexikora joan ziren. Itsasontziz hiru hilabeteko bidaia izan zela kontatzen zuten.

Mexikon egunero jokatzen zuten, kinielak ere izaten ziren, hilean pare bat egun bakarrik libratuz, baina oso ondo irabazten zuten. Batez ere Julita nabarmendu zen, munduko txapelduna izatera iritsiz. Partidu askoren ondoren bitxiak eta loreak jasotzen omen zituen. Hiriburuko frontoietan eta Acapulcon jokatu zuen.

Erraketari agur[aldatu | aldatu iturburu kodea]

1964an erretiratu zen Julita Beraza, Mexikoko frontoia itxi zenean. Milagros, ahizpa gaztea, orduan Madrilera itzuli zen eta bertan jarraitu zuen jokatzen, Madrilgo frontoia itxi arte.

Omenaldiak[aldatu | aldatu iturburu kodea]

2019an, Mexikoko Euskal Etxean, Aberri Egunaren baitan Juani Arrillaga, Juana Lizarzaburu eta Julita Beraza erraketistak omendu zituen DFko Euskal Etxeak, “Emakume Raketistak” izeneko dokumentalaren aurkezpenarekin. Ainhoa Palomo eta Jon Juanes filmaren egileek aurkeztu zuten dokumentala.^[5]