Pierre de Ronsard

Pierre de Ronsard
	; Irudi gehiago
Bizitza
Jaiotza	La Possonnière Castle (en) , 1524ko irailaren 11
Herrialdea	Frantzia
Heriotza	La Riche, 1585eko abenduaren 27a (61 urte)
Familia
Aita	Louis de Ronsard
Ama	Jeanne Chaudrier
Ezkontidea(k)	ezkongabea
Haurrideak	ikusi Claude de Ronsard, Seigneur de la Poissonière (en) ; Charles de Ronsard (en) ; Louise de Ronsard (en) ;
Familia	ikusi René des Roches (en) (maternal half-brother (en) ); Claude de Fontbrenier (en) (maternal half-brother (en) );
Hezkuntza
Heziketa	Parisko Unibertsitatea
Hizkuntzak	frantses ertaina; frantsesa
Irakaslea(k)	Jean Daurat (en)
Ikaslea(k)	ikusi Jean Vauquelin de la Fresnaye (en) ;
Jarduerak
Jarduerak	poeta eta idazlea
Lantokia(k)	Frantzia
Kidetza	Pleiadea
Mugimendua	Pleiadea
Sinesmenak eta ideologia
Erlijioa	Erromatar Eliza Katolikoa

Pierre de Ronsard (La Possonnière jauregia, Couture-sur-Loir, 1524ko irailaren 11 - Saint-Cosme priore etxea, Turena, 1585eko abenduaren 27a) frantses poeta izan zen.

Bizitza eta lanak

Familia noble bateko semea zen, eta erregearen gortean sartu zen morroi, 1536an. Eskozian eta Alsazian barrena bidaiatu zuen, baina, gorreriak jota, albo batera utzi behar izan zituen diplomazian jarraitzeko asmoak, eta literatura idazten hasi zen. Parisko Coqueret eskolan sartu zen, eta hainbat ikaskiderekin batera, Joachim du Bellayrekin, besteren artean, 1550. urtetik aurrera La Pléiade izenaz ezagutu zen poeta-taldea sortu zuen. Talde berri horren xede nagusia frantsesezko literatura-mota berri bat sortzea zen, idazle greko-latinoengan oinarritua.

Ronsarden lehen poesia-bildumari (1550, Odak) Horazio erromatarraren eragina igarri zaio, eta bigarren literatura-lanean (1552, Maitasunak) argi utzi zuen italiar lirikarekiko mendekotasuna. Les Meslanges (1555, Denetarik) eta Continuation des amours (1555, Maitasunen jarraipena) poesia-bildumetan agertu zuen benetako izaera eta sentiberatasun berezia. 1555etik 1556ra bitartean idatzi zuen Himnes (Himnoak) bilduman, berriz, gai filosofikoak, erlijiozkoak eta mitologikoak landu zituen.

Karlos IX.ak gorteko olerkari izendatu zuen 1558an, eta Frantziako Erlijio GerrakErlijio Gerrak piztu zirenean, monarkiaren aldeko agertu zen Ronsard, Discours (1562-1563, Hitzaldiak) lanaren bidez. Egilearen obrarik arnas handienekoa, La Franciade, lehen lau kantak argitaratu ondoren alboratu zuen (1572). Karlos IX.a 1574. urtean hil zenean, bizitza publikotik erretiratu zen. Sonnets pour Hélène (1578, Helenari zuzendutako sonetoak) sonetoak egileak bizitzari zion maitasun itzalezina agertu zuen, eta, agian, Ronsarden poesia-lanik ederrena da.

Hurrengo bi mendeetan hein batean baztertua izan bazen ere, frantziar molde klasizistaren sorreran garrantzia handia izan zuen. Kritikari erromantikoek Ronsarden obra dagokion mailara jaso zuten.

Erreferentziak

Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/26 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

Wikimedia Commonsen badira fitxategi gehiago, gai hau dutenak: Pierre de Ronsard

Datuak: Q49752
Multimedia: Pierre de Ronsard / Q49752