Txikipedia:Maialen Lujanbio

👶
Jaiotza
1976ko azaroaren 26a
Hernani

🔨
Lanbidea
bertsolari

Maialen Lujanbio Zugasti (Hernani, (Gipuzkoa, 1976ko azaroaren 26a) bertsolaria da; bera izan zen, gainera, Euskal Herriko Txapela jantzi zuen lehen emakumea, 2009an zehazki. Bigarren aldiz irabazi zuen Bertsolari Txapelketa Nagusia 2017an eta hirugarrena 2022an.

Arte Ederretan lizentziaduna da; Euskal Herriko Unibertsitatean (EHU) ikasi zuen karrera hori, Bizkaiko campusean. Geroago, Euskal Kulturgintzaren Transmisioa graduondokoa ikasi zuen Mondragon Unibertsitatean.

Bertsolaritza

Bertsolaritza munduan txikitatik murgildu zen Maialen. Hernaniko Urumea ikastolan hasi zen bertsotan eta Eskolarteko Txapelketetan igo zen lehen aldiz oholtzara; geroztik, txapelketa ugaritan parte hartu du. Plazaz plazako ibiliari 15 urterekin ekin zion, eta bere lehen agerraldia 1992an egin zuen.

Gipuzkoako bertsolari txapelketako txapelduna izan zen 2003. urtean. Euskal Herriko Bertsolari Txapelketan, sei aldiz heldu da finalera (1997, 2001, 2005, 2009, 2013 eta 2017). Lau aldiz lortu du buruz burukoan sartzea (2001, 2009, 2013 eta 2017), eta, esan bezala, 2009. eta 2017. urteetan irabazi zuen txapela.

Sariak

**Bertsolari txapelketetako sariak**
Gaztetxotan	Sari nagusiak	Bestelako sariak
Txapelduna: 1990, 1991, 1994	Txapelduna: 2003, 2009, 2017	1991ko Xenpelar saria
Finalista: 1988, 1992, 1993	Txapeldunordea: 2001, 2013	1992ko Osinalde saria
	Finalista:1997, 2001, 2005 2009, 2013, 2017	1992ko Lizardi saria
		2018ko Kopla txapelketako zintzarria

Sorkuntza-lanak

2006tik 2011ra Ornitorrinkus proiektua egin zuen Judith Montero eta Xabier Erkiziarekin. Musika esperimentala, hotsak eta hitzak elkartuz, "Ornitorrinkus" diska-liburua argitaratu zuten.

2011an "Txori Mugariak" irrati saioa sortu zuen Xabier Erkiziarekin; eta 2013eko udan, "Hegi, Egia, Egiak" proiektua aurkeztu zuten.