Christoph Martin Wieland
Christoph Martin Wieland (Oberholzheim, Biberachetik hurbil, Alemania, 1733 - Weimar, Saxonia-Weimar, Alemania, 1813) alemaniar poeta eta idazlea izan zen.
Biografia [aldatu]
Apaiz protestante baten semea zen eta Suitzan eman zuen gaztaroa. Bere lehen poemetan erlijioa zuen gai nagusia: Sympathien (1755, Sinpatia).
1760. urtean Biberachera itzuli zen eta kargu politikoak izan zituen. Frantses idazle ilustratuak eta greziar klasikoak miretsi zituen, Geschichte des Agathon (1766-1767, Agatonen historia) literatura-obrak islatzen duenez.
1769an Erfurteko Unibertsitateko Filosofiako irakasle egin zuten, eta Argien Mendeko Despotismoaren alde agertu zen Der Goldene Spiegel (1772, Urrezko ispilua) alegian.
Weimarreko gorteko irakasle egin zuten, eta Der Deutsche Merkur agerkari eraginkorra sortu zuen. Ondoren idatzi zituen Die Geschichte der Abderiten (1774-1778, Abderitarren historia) satira eta Oberon (1780) poema fantastikoen bilduma.
Erreferentziak [aldatu]
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Izan ere, egile-eskubideen jabeak, Eusko Jaurlaritzak, hiztegi horiek Creative Commons Aitortu 3.0 Espainia lizentziarekin argitaratu ditu, Open Data Euskadi webgunean.
