Eladio Zilbeti

Eladio Zilbeti
Bizitza
Jaiotza	Iruñea, 1898ko abenduaren 4a
Herrialdea	Nafarroa Garaia, Euskal Herria
Lehen hizkuntza	euskara
Heriotza	Etxauri, 1937ko urtarrilaren 16a (38 urte)
Heriotza modua	: bala zauria
Hezkuntza
Hizkuntzak	gaztelania
Jarduerak
Jarduerak	politikaria eta kirol-zuzendaria
Kidetza	Eusko Abertzale Ekintza

Eladio Zilbeti Azparren (Iruñea, 1898ko abenduaren 4a - Etxauri, 1937ko urtarrilaren 16a) nafar politikari eta kirolaria izan zen, EAE-ANV alderdi abertzaleko kide eta sustatzailea eta, 1920an, Osasuna futbol klubaren sortzaileetakoa. 1937ko urtarrilaren 16an frankistek Etxauri inguruan fusilatu zuten. 2017ko irailaren 16an, Iruñeko Udalak, Osasunzaleen egunaren barruan, kale bat eta omenaldia eskaini zion Sadar futbol zelaiaren ondoan.^[1]

Bizitza[aldatu | aldatu iturburu kodea]

Eladio Zilbeti Azparren Iruñean jaio zen 1898ko abenduaren 4an. Sei anai-arrebetan zaharrena izan zen. Aita, Bartolomé, auriztarra zen, eta ama, María, Bizkarretakoa. Plus Ultra aseguru etxean aritu zen lanean, eta Tirren agentzia sortu zuen geroago. Oso gazterik hasi zen parte hartzen hiriko kirol, kultura eta politika jardueretan. Errate baterako, 15 urte bete baino lehenago, Iruña Football Club-eko ordezkaria zen.^[2] 1920an, Osasuna futbol klubaren sorreran parte hartu zuen eta, zenbait ikerlariren arabera, berea izan zen taldeari euskarazko izen hori jartzearen ideia.^[1] 1933an, EAE-ANV alderdi politiko abertzalean sartu zen.^[2]

Nafarroako Oroimen Historikoaren Ondare Dokumentalaren arabera, 1936ko abenduaren 21 atxilotu zuten frankistek, eta Etxauri inguruko bide bazter batean hil zuten 1937ko urtarrilaren 16an. 38 urte zituen eta Joakina Sánchez Cayuelarekin ezkondurik zegoen. Fusilamenduaren aitzakia "Mugimenduaren aurka" egotea izan zen.^[1]