Lesbos

Lesbos
Mitileneren ikuspegia
Bertako izena	Λέσβος
Geografia
Kokapena	Egeo
Azalera	1632.8 km²
Politika
Herrialdea	Grezia
Eskualdea	Ipar Egeo
Gizartea
Biztanleria	85.330 bizt.
Dentsitatea	52,26 bizt/km²

Lesbos (grezieraz: Λέσβος), Egeo itsasoan, Turkiako kostaldetik gertu dagoen greziar uhartea da. 1.632.8 km²ko eremua du eta 2011n 85.330 biztanle zituen. Hiriburua Mitilene da. Antzinatean garrantzi handia izan zuen, eta ezaguna egin zen, batez ere, Safo olerkaria bertan bizi izan zelako. Honen poemak ospetsuak ziren beste emakume batzuekin izaten zituen amodio kontuez idazten zuelako. Hortik dator lesbianismo hitza.

Historia

Antzina Pentapolis izena eman zioten eta Eoliarrek kolonizatu zuten. K. a. VII. eta K. a. VI. mendeetan kultura loraldia izan zuen. K. a. 428-427an Atenasen kontra matxinatu zen. Matxinadak, ordea, ez zuen ezer lortu eta Lesbos Delosko Ligari elkartu zitzaion. Gero, Bizantziar Inperioaren mende egon zen; Erdi Aroan, berriz, Genovaren (1345) eta otomandaren mende (1462).

Geografia

Lesbos uharte bolkaniko menditsua da. Iparralde eta erdialdean kokatutako Lepetymos (968 m) eta Olympo (968 m) mendiak dira gailurrak. Itsasertza oso malkortsua da. Bi badia nabarmen ditu, Gerasekoa hego-ekialdean eta Kallonikoa hego-mendebaldean. Uhartearen %40 olibondoek hartzen dute; guztira 11 milioi bat olibondo daude beste fruta-arbola batzuekin batera. Basoek, berriz, %20 okupatzen dute eta beste guztia lur landua edo hiri-lurrak dira. Uhartearen mendebaldean dagoen harri bihurtutako sekuoien basoa munduko bigarren handiena da.

Hiriak

• Agia Paraskevi (Αγία Παρασκευή)
• Agiasos (Αγιάσος)
• Gera (Γέρα)
• Eresos-Antissa (Ερεσός-Άντισσα)
• Evergetoulas (Ευεργέτουλας)
• Kalloni (Καλλονή)
• Loutropoli Thermis (Λουτρόπολη Θερμής)
• Mantamados (Μανταμάδος)
• Mithimna (Μήθυμνα)
• Mitilene (Μυτιλήνη)
• Petra (Πέτρα)
• Plomari (Πλωμάρι)
• Politxnitos (Πολίχνιτος)

Ekonomia

Ekonomia jarduera nagusia laborantza (garia, garagarra, zitrikoak, olibondoak, tabakoa) da, eta ospe handia du hango ardoak.

Kanpo loturak

Wikimedia Commonsen badira fitxategi gehiago, gai hau dutenak: Lesbos

• Webgune ofiziala Lesvos.gr
• Bidai gida ofiziala Lesvoslemnos.com
• Leboseko prefektura Culture.gr
• Lesbos Google Maps-en