Balaeniceps rex

Balaeniceps rex animalia erreinuko hegaztia da. Pelecaniforme ordenekoa da. Orden honen izena pelikanoengandik dator, beraz, pelikanoaren antza du. Animalia honen ezaugarri deigarriena bere moko handia da. Espezie hau bere familia eta generoko bakarra da.

Nolakoa da?

Hegazti hau nahiko handia da, helduak gris kolorekoak eta kumeak marroiak dira. Altuera 110cm eta 140cm artekoa izan ohi da. Zabalera, berriz, hegoak kontuan hartuz, 230cm eta 260cm artekoa da. Bere pisua 4 eta 7 kilogramo artean ibiltzen da. Arrek batez-beste 5,6 kilogramo pisatzen dituzte, emeek, aldiz, 4,9 kilogramo.

Balaeniceps rex-aren kokapena

   Ba al dakizu   

Ba al dakizu Hego Sudaneko armen armarrian agertu zela?

• 
  Balaeniceps rex Hego Sudaneko Errepublikako armen armarri ez ofizialean agertu zen 2005 eta 2011 bitartean.

Non bizi da?

Balaeniceps rex Afrika tropikalean bizi da. Gehiago zehaztuz, ur gezeko aintzira eta urmaeletatik gertu. Hurrengo herrialdeetan kokatzen da: Sudan, Hego Sudan, Kongoko Errepublika Demokratikoa, Ruanda, Uganda, Tanzania eta Zambia.

Nola bizi da?

Animalia lasaia eta bakartia da, baina elikagai gutxi daudenean elkartzen dira. Bikote ugaltzaileak ere, lurralde barruko leku urrunetan egoten dira.

Nahiz eta animalia handia izan, ohikoa da egunez bere lurraldean hegan egiten ikustea baina ez da hegazti migratzailea.

      Ikusi!

Mokoaren soinua

Zein soinu egiten du?

Normalean nahiko hegazti isila da. Hala ere, batzuetan habian kanpai-hots erakustaldiak egiten ditu. Txitoek nahiz helduek, habia egiteko garaian kanpai-hotsa erabiltzen dute komunikazio gisa.

Nola ugaltzen da?

Ugalketa-zikloak 6-7 hilabete irauten ditu. Hasteko, Balaeniceps rex-ak inguruko espazio bat prestatzen du eta han habia handi bat eraikitzen du. Ondoren, bi arrautza jarriko dira eta 30 egun bitartez inkubatuko dira, ohikoa da bakarrik arrautza bat bideragarria izatea. Bi gurasoek parte hartzen dute ugalketa prozesu osoan.

   Ba al dakizu   

Ba al dakizu Balaeniceps rex-ak krokodilo txikiak ere jaten dituela?

• 
  Hain hegazti handia izanik eta hain moko handia izanik, krokodilo txikiak jaten ditu batzuetan.

Zer jaten du?

Hegazti haragijalea da, batez ere arrainez elikatzen dena. Normalean oxigeno gutxi duten uretan egoten da, non arrainak ur azalera igo behar duten arnasa hartzeko eta momentu horretan harrapatzeko aprobetxatzen du. Bestalde, karraskariak, anfibioak, dortokak eta uretako sugeak ere jaten ditu.

Desagertzeko arriskuan al dago?

Espezie hau modu argi batean mehatxaturik dago. Mundu osoan 3300 eta 5300 Balaeniceps rex inguru soilik geratzen dira. Beraz, desagertzeko arriskuan daude. Honen arrazoi nagusienetakoa habitataren desagerpena eta ehiza dira.

Artikuluaren narrazioa

      Entzun!