Pedro Mendinueta

Wikipedia(e)tik
Hona jo: nabigazioa, Bilatu
Pedro Mendinueta
Datu pertsonalak
Izen osoa Pedro Mendinueta Muzkiz
Jaio 1736ko ekainaren 7a
Elizondo (Nafarroa Garaia)
Hil 1825eko otsailaren 16a
Madril (Espainia)

Pedro Mendinueta Muzkiz (Elizondo, 1736ko ekainaren 7a - Madril, 1825eko otsailaren 16a) nafar militar eta politikaria izan zen. 1797-1803 bitartean Granada Berriko erregeordea izan zen

Bizitza[aldatu | aldatu iturburu kodea]

Pedro Mendinueta Elizondon jaio zen, 1736ko ekainaren 7an. 1756an hasi zuen karrera militarra infanteriako kadete gisa[1]. Portugal eta Frantziako gerretan borrokatu zen[2]. 1763an joan zen lehenbiziko aldiz Ameriketara, Puerto Rico eta Kubako miliziak antolatzera[1]. 1776an Santiago Ordenako zaldun izendatu zuten. 1785ean, granadari kapitaina zela, larri zauritu zuten Aljerren[3]. Ameriketara itzulirik, 1783an La Habanako armadarekin batu zen, eta 1784an Espainia Berriko probintzia eta hiri-miliziak organizatzen jardun zuen[1].

1789an Espainiara itzuli eta, Konbentzio Gerra zela eta, Rossellón frantsesen aurka borrokatu zen[2]. Toulongo setioan (1793) izan zuen parte hartze heroikoak Manuel Godoyren goraipamenak jaso zituen. Gerra merituengatik lotinant jeneral mailara goititu zuten eta Karlos III.aren ordenako gurutzea eman zioten[3].

1796an Granada Berriko erregeorde izendatu zuten, Jose Ezpeleta ordeztuz, eta 1797ko urtarrilaren 2an hartu zuen kargua Cartagena de Indiasen. Sei urte iraun zuen agintaldian Cartagenako frantziar beltzen zein Túquerres eta Guaitarillako indigenen matxinadei aurre egin behar izan zien. Azken hauek, Koroak kolonietako biztanleen gainean ezarria zuen zerga presio izugarriaren aurka mutinaturik, gobernadorea eta hamarrenen biltzailea hil zituzten[4]. Horrezaz landa, merkataritza sustatu, gatzaren produkzioa eta meatzaritza garatu eta Alexander von Humboldt eta Aimé Bonpland botanikoen espedizioak babestu zituen. José Celestino Mutisen proposamena onartuz, Bogotako astronomia behatokia (Ameriketako lehenbizikoa) eraikitzea sustengatu zuen[3][2].

Agintaldia 1803an amaitu bazuen ere, 1807 arte Bogotan gelditu zen biztzen. Ondoren Espainiara itzuli zen eta Gerraren Kontseilu Goreneko kide egin zuten. 1808an, Josef Bonaparteri leialtasun zina ukatu zionez gero, Frantziara eraman zuten preso, eta han egon zen Espainiako Independentzia Gerra amaitu zen arte. Itzuli zenean, Fernando VII.ak Gerraren Kontseilu Goreneko dekano izendatu zuen. 1816an armadako jeneral goren mailara goititu zuten[3].

Erreferentziak[aldatu | aldatu iturburu kodea]

  1. a b c Diana Luz CEBALLOS GÓMEZ: Mendinueta, Pedro Banrepcultural.org
  2. a b c Mendinueta y Múzquiz, Pedro de (siglos XVIII-XIX) Mcnbiografias.com
  3. a b c d   Auñamendi Eusko Entziklopedia, Pedro Mendinueta Muzquiz, http://www.euskomedia.org/aunamendi/77640 .
  4. Eduardo BARRERA MONROY: Virreyes de la Nueva Granada Banrepcultural.org
Commonsen badira fitxategi gehiago, gai hau dutenak: Pedro Mendinueta