Theodore William Schultz
Theodore William Schultz (Arlington, Hego Dakota, 1902ko apirilaren 30a - Evanston, Illinois, 1998ko otsailaren 26a) Ameriketako Estatu Batuetako ekonomista izan zen.
Hego Dakotako eta Wisconsingo Unibertsitateetan egin zituen ikasketak.
1946tik aurrera, Chicagoko Unibertsitateko Ekonomia saileko zuzendari gisa, giza baliabideek nekazaritzan duten garrantzia aztertu zuen, herri pobreetan batez ere. Nekazaritzaren kaltean garatze-bidean diren herriek industrializazio-prozesuari ematen dioten garrantzia kritikatu zuen. 1979an Ekonomiako Nobel Saria irabazi zuen, nekazaritza-ekonomiaz egindako lanarengatik. Lanik aipagarrienak: Economic Crises in World Agriculture (1965, Munduko nekazaritzaren krisi ekonomikoa), Economic Growth and Agriculture (1968, Ekonomia hazkuntza eta nekazaritza) eta Human Resources (1972, Giza balidabideak).
Erreferentziak
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.