Aiaraldea.eus

Aldizkaria	Aiaraldea.eus
Sortze urtea	2010
Mota	Informazio orokorra
Lurralde eremua	Aiaraldea
Egoitzak	Amurrio
Hizkuntza	Euskara
Bideak	Sarean
Argitaratzea	Aiaraldea Info Elkartea
Orrialdeak	16
Zuzendaria	-
Zutabegileak	Txutxi Ariznabarreta, Itziar Larrazabal, Kodo Gilsanz, Inma Roiz, Egoitz Bernaola, Julen Reketas, Ainhoa Comas

aiaraldea.eus izen bereko eskualdearen euskarazko interneteko ataria da.

Kokapena

Euskara hutsezko hedabiderik gabeko eskualdea izan da Aiaraldea, Orozkoko Zer diño paperezko hiruhilabetekaria izan ezik. Irrati munduan Uhinak Irratia euskaraz zein espainieraz ari da orain. Eskualdeko euskaldungoa eta oro har biztanleria urria izateak ez du laguntzen paperezko argitalpenak plazaratzeko.

Egoera horretatik abiatuta interneten bidezko proposamen honek eskualdeko euskarazko hutsunea bete nahi du. Beste hedabide mota batzuk garatu edota elkarrekin aritzeko asmoa ere du aiaraldea.eus-ek:

• Uhinak Irratian euskarak garrantzi handiagoa izatea.
• Hamaika Telebista katea eremu horretan abian jartzen denean elkarlana burutzea.
• Paperezko balizko argitalpen bat ateratzeko aukerak aztertzea.

50 bat lagunek kolaboratzen dute proiektuan eta 2010eko apirilaren 19an Amurrion egin zen aurkezpen ekitaldian hainbeste elkartetako 200 bat kide bildu ziren.

Eremua

aiaraldea.euseko murala Saratxon.

Esparru geografikoari dagokionez bere izenak adierazten duen eskualde arabarra (Aiaraldea: Aiara, Amurrio, Artziniega, Laudio, Okondo) eta berarekin harreman estua daukaten udalerri bizkaitarrak: Urduña, Orozko, Arakaldo, Arrankudiaga.

Udalerri izan gabe eskualde honetan nortasun berezia duten lekuak ere kontuan hartzen ditu: Arrastaria, Lezama, Areta edo Zollo.

Historia

2010eko apirilaren 17an jaio zen Aiaraldea hedabidea eskualdean euskarari bultzada emateko, komunikazio ohituretan euskal hizkuntza indartzeko hamarnaka boluntarioren gogo eta lana dela medio: Ruben Ibañez, Lucia Menoyo, Cristian Alemany, Angela Rico, Mikel Ayllon, Irati Mendiguren, Aitor Fernandez de Pinedo...

Ordura arte zegoen hutsunea betetzeko sortu zuten tokiko euskara hutsezko lehen hedabide digitala: aiaraldea.com. Hala, Laudiorekin batera, Urduña, Amurrio, Artziniega, Aiara, Okondo, Orozko, Arakaldo eta Arrankudiaga-Zolloko gertaerak jasotzeari ekin zioten; Laudioko eta inguruko ekitaldiak albiste, bideo zein argazkitan jasotzen, besteak beste. Euskaraz komunikatzeko tresnak sortzeagatik izango da Aiaraldea hedabidea aurten pregoilari, herritarrak euskarara erakartzeko egindako lanagatik.

Zazpi urteko ibilbidean eskualdeko 30 boluntarioren izerdi-tantak uholde bilakatu dira; 2017an 300 lagunetik gora baitziren Aiaraldea hedabidearen egunerokoaren parte. 2012an jarri zuten abian Aiaraldea Irratia Uhinak irratiarekin elkarlanean; interneten ere entzun zitekeen, egun egitasmoa etenda badago ere. Urtebete beranduago eman zuten hurrengo jauzia, 2013an, edizio digitalaz gain (www.aiaraldea.eus webgunea) norbanako, elkarte zein bestelako eragileengan euskara sustatzeko tresna berria eskainiz: “Komunitatearen plaza”, blogen txokoa. Urte horretan aurkeztu zuten Aiaraldea Egunkaria ere, eskualdeko lehen aldizkaria, 10.000 aleko argitalpena, hain zuzen. Laudioko ikasleen familia guztietara iristen da hamabostekaria, ikastetxeekin abiatutako elkarlanaren bidez; eta banatzaile boluntario edota bazkideen laguntzari esker, garraio publikoetara, komertzioetara eta espazio publiko orotara. Ildo beretik, komunikazio ohiturak aldatu direnez, telefono mugikorretarako aplikazioa sareratu zuten 2013an: Iphone eta Android gailuetarako “Aiaraldea” aplikazioa.

Halaber, euskarazko komunikazioa erakargarri bihurtzeko makina bat ikastaro eta tailer gauzatu dituzte urte guzti hauetan, adinaren arabera dinamika ezberdinak eskainiz: ikastetxeetako multimedia rallyak, kazetaritza tailerrak, euskarazko mugikor aplikazioen ikastaroak... 2016an aurkeztu zuten elkarteentzako komunikazio gida, euskararen paisaia linguistikoa hedatze aldera.

Urterik urte, teknologia berriak jarri dituzte herritarren eskura, edukiak euskaraz sortu eta kontsumitzeko joera biderkatuz. Horren adibide da kolaboratzaile sare anitza, iritzi zutabeen kasu: Txema Urkijo, Txani Rodrigez, Julen Arzuaga, Esti Urresola, Norberto Aldaiturriaga, Carmelina Calavia...

Komunikabidean diharduten lagun guztiei esker ari da osatzen komunikabidea kultur, kirol eta herri bizitzaren artxiboa, tokiko historia gordetzen, kultur aniztasuna jendarteratzen, genero ikuspegia areagotzen, sortzaileen lanak ezagutarazten, tokiko proiektuen berri (elikadura burujabetza kasu), euskararen erabilera sustatzen... Laburbilduz, denon eskutik egindakoa, denon eskura jartzen.

Sariak

2022ko Argia Saridunak

• 2022: Argia saria, prentsa atalean. Aiaraldea hedabidearentzat izan zen prentsa ataleko Argia Saria, Laudioko eta Amurrioko Tubacex-eko langileen greba, erresistentzia eta bizipenak hurretik kontatzeagatik. Aitor Aspuru, Izar Mendiguren, Aimar Gutierrez eta Txabi Alvarado kazetariek jaso zuten saria.

Ikus, gainera

• Uhinak Irratia

Kanpo estekak

• Hedabidearen webgunea.
• Aurkezpena Berrian.
• Aiaraldea bilatzearen emaitza berria.eus (52 albiste)

• Datuak: Q12252904