Arrate Irratia

Arrate Irratia
Datuak
Herrialdea	Gipuzkoa

Arrate Irratia Eibarko (Gipuzkoa) Arrate auzotik emititzen duen euskara hutsezko irrati katea da.

Historia

1959ko abenduaren 23an sortu zuen Arrate Irratia Pedro Gorostidi abadeak. Bere helburua inguruko euskaldunen berri ematea izan da, euskarazko informazioari eta musikari leku zabala eginez.

1964ean gobernuak itxi egin zuen, salaketa politikoak zirela eta. 1978an lortu zuten berriz irekitzea, inguruko herrietako euskaltzaleak bazkide bihurtuta.

Programazioa

Arrate Irratiak inguruko herrien berri ematen du gehienbat. Eliza katolikoak sortutako irrati katea denez, egunero eskaintzen dute meza, goizeko bederatzietan, eta arrosarioa, arratsaldeko zazpi eta erdietan.

Ezagunak dira, halaber, zorion agurren tartea, hainbat lekutako musika (euskal musika tradizionala, mexikarra, klasikoa...) eta herrietako albistegiak (Eibar, Ermua, Mallabia, Markina-Xemein, Bergara, Soraluze, Deba, Mutriku, Urola Kosta, Zaldibar, Elgoibar...). Albiste orokorragoak eskaintzeko, Euskadi Irratiarekin egiten du bat.

Horretaz gain, astelehen eta asteazken arratsaldeko 8:20 bueltan herri kirolak izaten dituzte bertan hizpide. Lehen lehenik, asteko herri kirolari protagonista batekin hitz egiten dute tartetxo batez eta gero, Aitor Aizpurua "Olarrea"-k herri kiroletako berriak ematen ditu Azkoitiatik (jokatutako probetako emaitzak eta jokatu beharreko probetako egutegia).

Hedapena

Gipuzkoa erdi eta mendebaldean eta Bizkaiko ekialdean entzuten da. Horrez gain, Internetean streaming bidez ere entzun daiteke mundu osoan zehar.

Ikus, gainera

• Euskarazko irrati kateak

Kanpo estekak

• Arrate Irratiaren orrialdea

• Datuak: Q12254091