Eibar

Eibar
Gipuzkoa, Euskal Herria
Eibarko ikuspegia.
Administrazioa
Estatua	Espainia
Erkidegoa	Euskal Autonomia Erkidegoa
Lurraldea	Gipuzkoa
Eskualdea	Debabarrena
Izen ofiziala	Eibar
Alkatea	Miguel De Los Toyos Nazabal
Posta kodea	20600
INE kodea	20030
Herritarra	eibartar
Kokapena
Koordenatuak	43° 11′ 03″ N, 2° 28′ 24″ W
Eibar Eibar (Gipuzkoa)
Ikusi OpenStreetMapen
Azalera	24,78 km2
Garaiera	124 metro
Distantzia	45 km Donostiara
Demografia
Biztanleria	27.158 biztanle (2016) ( -46)
% 48,52    % 51,48
Dentsitatea	1.095,96 biztanle/km²
Hazkundea (2003-2013)	-% 2,64
Zahartze tasa	% 18,99
Ugalkortasun tasa	‰ 40,87
Ekonomia
Jarduera tasa	% 78,32 (2011)
Genero desoreka	% 5,07 (2011)
Langabezia erregistratua	% 13,02 (2013)
Kultura
Euskaldunak	% 48,7 (2010)
Euskararen erabilera	% 17,1 (2011)
Datu gehigarriak
Sorrera	1346 hiri gutuna. urtea
Webgunea	http://www.eibar.eus

Eibar Gipuzkoa mendebaldeko udalerria da, Debabarrena eskualdeko handiena hain zuzen. 24,78 km²-ko zabalera dauka eta 27.158 biztanle zituen 2016. urtean, probintziako laugarren hiririk populatuena izanik Donostia, Irun eta Errenteriaren ostean. Gaur egun, Hiri guztiz eredugarria izeneko titulu bat dauka.

Eibar hiria Deba ibaiaren ertzean kokatuta dago, Bizkaiko mugan.1346an Villanueva de San Andrés izenarekin sortu zen, baina berehala Heybar gaineratu zitzaion.

Geografia

Udalerri mugakideak

Gipuzkoa mendebaldeko udalerria, Bizkaiarekin egiten du muga. Hain zuzen ere, Eibarrek mugakide ditu (mendebaldean) Etxebarria, Ermua, Mallabia eta Zaldibar herri bizkaitarrak. Gainera, Gipuzkoako herriei dagokienez, mugakide ditu Debabarreneko Soraluze (ekialdean) eta Elgoibar (ipar-ekialdean), eta Debagoieneko Bergara (hego-ekialdean) eta Elgeta (hegoaldean).

Auzoak

Baserri-auzoak

Eibarren bost baserri-auzo daude:

• Otaola-Kiñarraga, (Otola-Kiñarra): Ego errekaren hegoaldean dauden lur guztiak, Elgeta eta Bergararekin mugakide.
• Arrate: Elgoibarrekin mugan, izen bereko santutegiaren inguruko lurrak.
• Gorosta: Gorosta errekaren urak biltzen dituen ingurua; Arrate auzoaren eta Santa Kurutz gainaren arteko lurrak.
• Mandiola: Santa Kurutz gainetik Bizkaiko mugarainoko lurrak, Akondia eta Urko mendien lurrak barne.
• Aginaga (Agiña): Ixua gainetik Markinarako bidean.

Hedadurari dagokionez, Kiñarraga-Otaola auzoa da handiena. Izan ere, ez da benetako auzoa, zenbait auzune txikiagoren batura baizik (Otaola, Urki, Kiñarraga...). Inguru horretan nekez jotzen du eguzkiak eta herri-basoak izan dira nagusi beti. Historian zehar baserri gutxi jaso dira Kiñarraga-Otaola inguruan, eta sortu diren bakarrak, gehienbat, herritik gertu eraiki dira. Eibar handitu ahala, baserriak galtzen joan dira, ordea.

Baserri kopuruaren arabera, Mandiola da auzorik handiena eta aberatsena. Gorostan eta Arraten ere badira hainbat baserri eta baseliza. Hala ere, hiru auzo horiek nahiko txikiak dira eta oso lotura estua izan dute herrigunearekin.

Baserri auzo horiei balle ere esaten zaie Eibarko euskaraz, baina berba hori bere horretan erabili barik baizik eta izenari lotuta. Honela: Kiñarra-balle, Arrate-balle, Gorosta-balle, Mandiola-balle eta Agiña-balle. Ez dago argi nola idatzi behar diren izen konposatu hauek: Gorosta-Balle, Gorosta-balle, Gorosta Balle ala Gorostaballe. Artikuluarekin ere erabiltzen dira batzuetan: Gorostaballiak (NORK kasuan).

Bost auzoen artean berezi eta bakartuena Aginaga da. Ixua mendiaz bestalde dagoenez, Artibai ibaiaren arroan, Eibarko herrigunearekin hartu-eman txikiagoa izan du eta haren izaera berezia du, eliza, eskola, kanposantua, taberna eta abarrekin. Hizkera aldetik, Markinako hizkeraren eragin nabarmena dauka, Eibarkoaren ezaugarriak gordetzen dituen arren.

Eibarko udaletxea Untzaga plazan

Herriguneko auzoak

• Azitain
• Urkizu. Herrian 'Urkuzua' izenez ere ezaguna.
• Saratsuegi. Eibartarrek Sautsi esaten diote, XXI. mendean urbanizatutako inguru honi.
• Txonta
• Jardineta
• Ipurua
• Urki. Jatorri etimologikoa, Urkidi.
• Ubitxa. Jatorri etimologikoa, Ubidieta,-> Ubieta -> Ubitta -> Ubitxa.
• Legarre
• Amaña

Historia

Gaztelako Alfontso XI.a erregeak foru gutuna eman zion 1346ko otsailaren 5ean Villanueva de San Andrés de Heybar izenaz. Bertan, agindu zuen lekua jendeztatzea, harresiz ixtea, dorrez hornitzea, etab.

1936ko irailaren 21etik aurrera, Errepublikari leial lotu zitzaion Gerra Zibileko frontearen lehen posizioan behin matxinoek Gipuzkoa azpiratutakoan. Egoera hori 1937ko apirilaren 26 arte luzatu zen, indar kolpistak herrira sartu zirenean. Kalte handiak izan zituen kaskoan bonbardaketen eta suaren ondorioz.

Ekonomia

Ekonomiaren arloan, Eibar hiriak beti izan du metalarekin zerikusia duen industriarik, eta armagintza izan da herriari izana (eta baita izena ere) eman dion lanbide tradizionala. XV. gizalditik XX. gizaldira bitartean, horixe izan da eibartarren lanbide ezagunena (grabatuarekin eta damaskinatuarekin batera). XX. mendean, berriz, armagintzak indarra galtzen joan zen, eta beste sektore batzuk indartzen. Azpimarratzekoa, bereziki josteko makinak egiten zituen Alfa, eta bizikleta fabrika ugariak (GAC, Orbea, Abelux, BH...), guztiak ere Eibarren sortutakoak, nahiz eta XX. mende amaieran beste herri batzuetara joan ziren gehienak, Eibarren historikoki izan duen lur-sail gabeziak bultzatuta. Gaur egun, Eibarko ekonomia metalen eraldatzean oinarritzen da, bereziki autoen atalak egiteko, baina horrez gain, makina erreminta, armak eta mikrofusioa ere nabarmentzekoak dira.

Demografia

Gipuzkoa eta Bizkaiko beste herri batzuetan bezala, Eibarren ere biztanleriaren hazkunde handia gertatu zen XX. mendeko 50eko eta 60ko hamarkadan. Eskualdearen hazkunde begetatiboaz gain, Espainiatik etorkin asko iritsi ziren, Gipuzkoako garapen ekonomikoak sortutako eskulan eskaria betetzera.

1980ko hamarkadan populazioaren gainbehera hasi zen, krisialdi ekonomikoaren eraginez. Biztanleen galera ez da eten, nahiz eta XXI. mendearen hasieran pixka bat moteldu zen.

Biztanleriaren bilakaera

Politika

Sakontzeko, irakurri: «Eibarko alkateen zerrenda»

Miguel de los Toyos (PSE) da herriko alkatea.

2015eko udal hauteskundeak

Eibarko udalbatza
Alderdia		2015eko maiatzaren 24a		2011ko maiatzaren 22a
		Zinegotziak	Boto kopurua	Zinegotziak	Boto kopurua
	Euskadiko Alderdi Sozialista (PSE-EE(PSOE))	10 / 21	5.596 (% 42,75)	9 / 21	5.024 (% 36,04)
	Euskal Herria Bildu*	5 / 21	3.210 (% 24,52)	6 / 21	3.673 (% 26,34)
	Euzko Alderdi Jeltzalea (EAJ)	5 / 21	2.829 (% 21,61)	4 / 21	2.624 (% 18,82)
	Irabazi	1 / 21	904 (% 6,91)
	Alderdi Popularra (PP)	0 / 21	552 (% 4,22)	2 / 21	1.112 (% 7,98)
*2011ko hauteskundeetan Bildu gisa aurkeztu zen koalizioa.
Datuen iturria: Hauteskundeen emaitzak euskadi.net webgunean

Euskara

Play media

Eibarko hiztunen testigantzekin osatutako bideoa, Euskal Herriko Ahotsak proiekturako egina, ahozko ondarea jaso eta zabaltzeko.

Eibarko euskara (euskeria) mendebaleko euskalki edo bizkaieraren aldaera da, Debaerdikoa. Deba eskualdeko hainbat herrik osatzen dute Debaerdiko hizkera: Aldaera hori honako herri hauetan hedatzen da, Bizkaiko Ermua eta Mallabia eta Gipuzkoako Antzuola, Bergara, Eibar, Elgeta eta Soraluze. Horien artean aipatzekoa da Antzuolan eta Bergaran gainontzekoetan baino handiagoa izan dela Gipuzkoako euskararen eragina. Debaerdiko hizkeren artean Mallabikoa da besteetatik gehien urruntzen dena, Durangaldeko hizkerekin zubi lana egiten du eta.

2011. urtean 13.585 euskaldun ziren Eibarren, hau da, herritarren % 51,6.

Egun Eibarko euskararen Hiztegia eskuragai da, herriko betiko berbak gorde eta ez ahazteko.

Kultura

Kirolak

SD Eibar da herriko futbol talde garrantzitsuena, eta 2014.urtetik Espainiako futbol ligako lehen mailan lehiatzen da. SD Eibar futbol taldeak 3.000 bazkide inguru ditu.

Eibarko Klub Deportiboak 2.500 bat bazkide biltzen ditu 12 kirol eta kultur ekintzatan.

Eibar Rugby Taldea, eskualdeko talde bakarra. Ohorezko B Mailan jokatzen du, estatu mailako bigarren maila altuena.

Jai Egunak

Eibarko jaiegun garrantzitsuenak hurrengo hauek dira:

• Urte berri eguna: ohitura handia dago urtearen lehen egunean Eibarko Urko mendira igotzeko.
• San Blas eguna: otsailaren 3a. Eibartar askok san blas opila egiten dute.
• Santa Ageda bizpera: otsailaren 4a. Eibartar ugari kantuan eta eskean irtetzen dira beren makilak eskutan.
• Inauteriak edo aratosteak: Egun garrantzitsuenetako bat eguen zuria da, ikastola eta eskoletako umeek bere koko jantziekin desfile bat egiten baitute. Asteartea nagusien jaiegun izaten da.
• San Juan eguna: San Juan eguna eta honen bizpera, su artifizialek eta Untzaga plazan urtero egiten den suak markatzen ditu.
• Arrateko jaixak: irailak 7 eta 8a. Bezperan, kontzertuak izaten dira Arrateko kanpan. Arrate egunean, irailaren 8an, eibartarrak Arratera igotzen dira.
• San Andres eguna: Azaroaren 30a da. Bezperan, herri afaria izaten da eta egunean azoka antolatzen da inguruko artisau zein baserritarrek bertara hurbiltzeko parada izaten dute beren produktuak saltzeko. Eguerdi aldean Eibarko Kezka dantza taldearen eskutik erromeria izaten da.
• Gaztainerre: Arima egunaren ostean, bigarren astelehena izaten da. Jateko barraskiloak eta gaztaina erreak izatea ohitura da.

Ondasun nabarmenak

Arrateko Amaren santutegia.

• San Andres eliza, XVI-XVII. mendeetan eraikia, baina eraikuntza eta itxura gotikoa du, nahiz eta hainbat elementu pizkundetar eta barroko izan. Bertan San Petriren eskultura erromaniko bat eta flandriar beirate bat daude, balio handikoak. Erretaula nagusia Diego Araotz eskultorearena da.
• Arrateko Amaren santutegia, XVII. mende hasierakoa.
• Azitaingo baseliza: Azitain auzoko eliza, Kristo bizargabe batekin (munduko bakarretakoa).
• Untzueta jauregia, XVII. mendekoa.
• Aldatze jauregia, XVII. mendekoa. Armarri bikaina du fatxadan.
• Markeskua jauregia, XVI. mendekoa. Bertan da UEUren kultura-egoitza.
• Eibarko udaletxea, Ego ibaiaren gainean eraikitako hormigoizko eraikina, lehenetarikoa. Ramon Kortazar arkitektoak diseinatu zuen eta 1901eko irailaren 14an inauguratu zen. Bertako balkoitik 1931ko apirilaren 14an Espainiako Bigarren Errepublikako bandera izango zena zintzilikatu zuten, honela gainontzeko beste hiriei aurrea hartuz.
• Coliseo antzokia, 1949an irekia eta 2007an berriztatua.

Eibartar ospetsuak

Sakontzeko, irakurri: «Eibartar ospetsuen zerrenda»

Eibarkoak ditugu, besteak beste, Juan Antonio Mogel eta Juan San Martin idazleak eta Ignacio Zuloaga margolaria.

Eibarkoa da Patxi Usobiaga eskalatzailea, 2009an munduko txapeldun izandakoa, eta baita Roberto Etxeberria moda disenatzaile ospetsua ere.

Kanpo loturak

Wikimedia Commonsen badira fitxategi gehiago, gai hau dutenak: Eibar

• (Gaztelaniaz) www.eibar.eus Udalaren webgunea
• (Gaztelaniaz) Eibar KE futbol taldearen webgunea
• Eibar.Org Eibarko internauten webgunea
• Eibarko Armagintza Museoa
• Eibarko euskeria
• (Gaztelaniaz) Egoibarra batzordea, Eibarko ondare kulturala