Daniela Albizu

Daniela Albizu
Bizitza
Izen osoa	Daniela Albizu Berasategi
Jaiotza	Urruña, 1936ko maiatzaren  23a
Herrialdea	Lapurdi, Euskal Herria
Heriotza	2015eko otsailaren  26a (78 urte)
Hezkuntza
Hizkuntzak	euskara
Jarduerak
Jarduerak	maisu/maistra eta idazlea
Literaturaren Zubitegiko fitxa	926

Daniela Albizu Berasategi (Urruña, Lapurdi, 1936ko maiatzaren 23a - 2015eko otsailaren 26a) irakaslea eta euskal idazlea izan zen. Donibane Lohizuneko Ravel ikastetxean eta Hendaiako Irandatz izenekoan luzaz ibilia. Bizitza guztia eman zuen euskararen eta euskal kulturaren alde. Urruñako herriko etxean zinegotzi izan zen, Herritarrak mugimendu abertzalearen izenean. Artikulugintzan, kulturgintzan eta itzulpengintzan lan ugari plazaratu ditu. Lapurdiko Gure Irratian irratsaio aunitz egina da. Elkarrin ibilia da bakegintzan lagundu nahian, bai eta Ikas elkartean ere, euskararen irakaskuntza eta pedagogia bultzatzeko asmoz. Aipaturiko elkartean lehendakaria izan zen zenbait urtez.

Hasiera-hasieratik euskara baturanzko bidea jorratu zuen. Hori dela eta, euskal aditz batuaren aldeko apustua egin zuen. Lexikoa eta erramoldeak, berriz, lapurtera bizi-bizitik hartzen zituen.

Bizitza

Ama, Nizeta Berasategi Mintegi, gipuzkoarra zuen, Idiazabalgo Urtsuaran auzokoa; aita, berriz, Leon Albizu Perez de San Roman, arabarra, Ilarduia herrikoa. Aitak, Espainiak hartara deituta, Marokoren aurkako gerrara joan beharra saihesteko jo zuten Ipar Euskal Herrira.

Hego Euskal Herriko iheslari bat etxean aterpetzeagatik, frantses poliziek atxilotu zuten eta Fleury Mérogis presondegira eraman. Han bi hilabete egin zituen. 2009. urtean Alkartasuna Fundazioak Euskal Herriaren alde egindako lan bikainaren saria eman zion eta 2011n Herritarrak mugimendukoek omenalditxoa egin zioten Urruñak ezagutu duen lehen zinegotzi abertzaleari. 2015eko otsailaren 26an zendu zen.

Idazlanak

• Hiru uhainak, 1979. Elkar. Ipuin zahar baten moldapena.
• Lau sasoi, lau ipui, 2003. Maiatz. Lau ipuinen bilduma.
• Ilargi eta hontz sorginen ipuinak, 2006. Pyrémonde. Ipuin bilduma. Fred Forten liburua, frantsesetik itzulia.
• Iturri-aldeko nere leihotik, 2011. Maiatz. Literatur lanen bilduma.

Erreferentziak

• Goizeder Taberna: Daniela Albizu zendu da.[1]
• Joseba Aurkenerena: Adiorik ez, Albizu Anderea.[2]
• Mediabask: Daniela Albizu s`en est allée [3]
• Auxtin Zamora: Daniela Albizu oroitzaPENETAN [4]

Kanpo loturak

• Joseba Aurkenerena: «Daniela Albisu, Urruñako idazle sutsua», Karmel, 2011.
• Kazeta.info: Omenaldi hunkigarria Urruñan [5]
• Alkartasuna Fundazioaren saria - 2009: http://www.alkartasunafundazioa.org/wp-content/uploads/2011/09/Sariak-2009.pdf
• Ikas, kultur elkarte baten adibidea: http://www.euskomedia.org/PDFAnlt/lankidetzan/21/21029044.pdf
• http://zubitegia.armiarma.eus/?i=926