Adam Price

Wikipedia, Entziklopedia askea
Adam Price
Adam Price 2016 (cropped).jpg
Member of the 6th Senedd Cymru (en) Itzuli

2021eko maiatzaren 6a -
Barrutia: Carmarthen Ekialdea eta Dinefwr
Hautetsia: 2021 Senedd election (en) Itzuli
Plaid Cymruko buruzagia

2018 -
Leanne Wood
Galesko Biltzar Nazionaleko 5. legealdiko biltzarkidea

2016ko maiatzaren 5a - 2021eko apirilaren 29a
Barrutia: Carmarthen Ekialdea eta Dinefwr
Hautetsia: 2016ko Galesko Biltzar Nazionalerako hauteskundeak
Erresuma Batuko 54. Legebiltzarreko kidea

2005eko maiatzaren 5a - 2010eko apirilaren 12a
Barrutia: Carmarthen Ekialdea eta Dinefwr
Hautetsia: 2005eko Erresuma Batuko hauteskundeak
Erresuma Batuko 53. Legebiltzarreko kidea

2001eko ekainaren 7a - 2005eko apirilaren 11
Barrutia: Carmarthen Ekialdea eta Dinefwr
Hautetsia: 2001eko Erresuma Batuko hauteskundeak
Bizitza
Jaiotza Carmarthen1968ko irailaren 23a (52 urte)
Herrialdea  Erresuma Batua
 Gales
Hezkuntza
Heziketa Cardiffko Unibertsitatea
John F. Kennedy Gobernu Eskola
Hizkuntzak ingelesa
Jarduerak
Jarduerak politikaria eta blogaria
Lantokia(k) Londres
Sinesmenak eta ideologia
Alderdi politikoa Plaid Cymru

Twitter: Adamprice Edit the value on Wikidata

Adam Robert Price (Carmarthen, Gales, 1968ko irailaren 23a) politikari galesa da, 2018az geroztik Plaid Cymru alderdi nazionalistako buruzagia da.[1] 2016tik Galesko Legebiltzarreko kidea da Carmarthen Ekialdea eta Dinefwr hautesbarrutiaren ordezkari gisa,[2] eta aurretik hautesbarruti ber-beraren ordezkaria izan zen Erresuma Batuko Komunen Ganberan.

Gaztaroa eta ikasketak[aldatu | aldatu iturburu kodea]

Price Carmarthenen jaio eta Tycroes udalerrian hazi zen. Bere aita, Rufus, Betws Colliery-ko meatzaria izan zen. Haren gurasoak gales hiztunak ziren arren, seme-alabak ingelesez hezi zituzten; eta Pricek nerabe zela ikasi zuen galesera, bere anaia Adrianek irakatsita. Bere gurasoak politikan engaiatuak zeuden, eta Plaid Cymru-ren adar bat sortu zuten Ammanforden, Carmarthenshire-n.[3]

Ammanfordeko Amman Valley Comprehensive School eskolara joan zen. Geroago Cardiffko Unibertsitatean ikasi zuen, eta 1991n Europar Komunitateko ikasketetan lizentziatura lortu zuen.[2]

Graduatu ondoren, Price ikerlari gisa egin zuen lan Cardiffko Unibertsitateko hiri eta lurralde antolamendu sailean.[4] 1998tik aurrera, Newidiem Garapen Ekonomikoko Aholkularitzako zuzendari nagusia izan zen.[5]

Komunen Ganberako kidea[aldatu | aldatu iturburu kodea]

Pricek Gower hautesbarrutian lehiatu zen 1992an arrakastarik gabe, botoen %3,5 lortuz. Carmarthen Ekialdea eta Dinefwr hautesbarrutiko ordezkari hautatua izan zen 2001ean, eta eserlekua mantendu zuen 2010ean kargua utzi zuen arte.[6]

2002an, Pricek Tony Blair- ek Errumaniako Gobernuari idatzitako gutuna lortu zuen, zeinetan Lehen Ministroak Lakshmi Mittal enpresariaren LNM siderurgia konpainiaren alde egiten zuen, Errumaniako altzairu industria nazionalizatua erosteko lizitazio prozesuan zegoena.[7] Errebelazio horrek eztabaida eragin zuen, aurreko urtean Mittalek 125.000 libera eman zizkiolako Blairren Alderdi Laboristari. Blairrek bere gutunean soilik enpresa britainiar baten "arrakasta ospatzen" zuela argudiatu zuen arren, kritikak jaso zituen LNM Herbehereetako Antilletan erregistratuta zegoelako eta Erresuma Batuan enpresako langileen %1 baino gutxiago enplegatzen zuelako. LNM "Britainia Handiko siderurgia industriaren lehiakide nagusia" zen.[8] Blairren gutunak enpresaren pribatizazioak eta Mittal-i saltzeak Errumania Europar Batasunean sartzeko bidea leuntzen lagun zezakeela iradokitzen zuen.

2004an, Pricek Irakeko gerraren inguruko polemikaren ostean Tony Blairren aurkako zentzura mozioa aurkezteko asmoa iragarri zuen, Plaid Cymru eta SNP alderdien eta Boris Johnson eta Nigel Evanse parlamentarien sostenguarekin. Mozioak arrakasta izanez gero, Lorden Ganberaren aurrean epaituko luketen Blair; hala ere, espero bezala, neurriak huts egin zuen.[9] Price Komunen Ganberatik kanporatua izan zen 2005ean, Lehen Ministroari Parlamentua "engainatu" zuela salatu eta, ondoren, bere hitza jateari uko egin ziolako, Ganberako arauak urratuz.[10] 2006an, Pricek hiru orduko eztabaida hasi zuen Irakeko gerrari buruzko ikerketari buruz Komunen Ganberan, bi urtetan horri buruz egindako lehen eztabaida. "Irakeko gerrarekiko Gobernuaren erantzukizunak" ikertzeko batzordea osatzea galdegiten zuen SNPk eta Plaid Cymruk aurkeztutako mozioak porrot egin zuen: 298 boto aurka eta 273 alde.

2007ko abuztuan, Pricek BBCko albistegietan Galesek zeukan presentzia murriztua kritikatu zuen.[11] Bethan Jenkins Plaid-en biltzarkideak Pricerekin bat egin zuen eta hedabideen eskumena Galesko Biltzar Nazionalerera eskualdatzea eskatu zuen, Alex Salmond Eskoziako Lehen Ministroarekin batera.

2007ko Galesko Biltzarreko hauteskundeen ondoren, Biltzarreko batzorde batek Price, Elfyn Llwyd eta Hywel Williams Komunen Ganberako parlamentariak erruduntzat jo zituen hauteskundeetako propagandarako arauak hausteagatik.[12] Komunen Ganberako arauak hautsi ez zituztela ondorioztatu zuen arren, Batzordearen ustez hauteskunde iragarkiak Galesko Biltzarrerako hauteskundeekin bat egiteko prestatuta zeuden. Parlamentariek hauteskunde iragarkietarako erabilitako dirua itzuli behar izan zuten, akoitzekoo ost mila libra inguru.

2007ko abuztuan, Price Golwg galeserazko aldizkarian aldizka idazten hasi zen.

Price Afganistango gerraren aurkaria izan da aspalditik, eta gerratik erretiratzeko egutegia argitaratzeko galdegiten zuen mozio bat aurkeztu zuen. Price kritikoa izan da hasieratik gerraren estrategiekin eta helburuekin.

2010eko abuztuan, Pricek 2011ko Galesko Biltzarrerako hauteskundeetara aurkeztuko ez zela iragarri zuen eta, horren ordez, Estatu Batuetan beka batekin urtebete igarotzeko asmoa zuela adierazi zuen, 2016ko hauteskundeetan Galesko Biltzar Nazionalera itzuli aurretik.[13]

Politikatik kanpoko karrera[aldatu | aldatu iturburu kodea]

2010eko irailean Harvardeko Unibertsitatean ikasten hasi zen, Administrazio Publikoko masterra lortzeko eta John F. Kennedy School of Government eskolako Nazioarteko Garapenerako Zentroan beka lortu zuen. Bi urte geroago Galesera itzuli zen eta Bridgenden Ideoba finantza-software enpresa sortzen lagundu zuen. Konpainiak porrot egin zuen inbertsio nahiko ziurtatu ezinik.[14] Ondoren, Nesta ongintzarako erakundean lan egin zuen.[15]

2014ko irailetik urrira, Pricek Streic (Greba) izeneko hiru ataleko serie dokumentala aurkeztu zuen 1984-85 Galesko meatzarien grebari buruz, S4C telebista katean emititu zena.

Galesko Biltzarrean[aldatu | aldatu iturburu kodea]

2010ean Erresuma Batuko Parlamentutik atera ondoren, 2013an politikan berriro sartzeko asmoa iragarri zuen, eta Galesko Biltzar Nazionalerako hautagai izango zela jakinarazi zuen.[16] 2016an Biltzarrerako hautatua izan zen Carmarthen Ekialdea eta Dinefwr hautesbarrutian.[17]

2018ko uztailaren 2an, Pricek, WalesOnline albiste atarian argitaratutako artikulu baten, Leanne Wood Plaid Cymru-ko buruari ko-lidergo edo buruzagi bikoitzeko eredu berria ezartzeko eskatu zion, "non bi buruzagi, gizonezkoa eta emakumezkoa, alderdia elkarrekin zuzenduko luketen".[18] Wood-ek proposamenak baztertu zituen, eta ondorioz Pricek Wood-en zuzendaritzari aurre egin zion eta uztailaren 4an alderdiaren 2018ko hauteskunde primarioetarako hautagaitza aldarrikatu zuen, Rhun ap Iorwerth biltzarkidearekin batera.[19]

Pricek Plaid Cymru-k har zitzakeen hainbat politika berri proposatu zituen kanpainan. Bere alderdiak Galesek dituen eskumen fiskalak baliatu beharko lituzkeela iradoki zuen, hezkuntza sistemaren finantzaketa handitzeko.[20] Abuztuan, Pricek hamar puntuko plan bat kaleratu zuen Galesko ekonomiaren inguruko bere ikuspegia zehaztuz; besteak beste, zergak murrizteko eta trukatzeko aukerak, Galeseko energia konpainia publikoa sortzeko proiektua, azpiegituretako gastua eta lana bermatzeko programa.[21] "Gales 2030: Independentziarako zazpi pauso " bere kanpainarako kaleratu zuen beste agiri batetan, bere alderdiak 2030. urterako Galesen independentzia lortzeko pausoz pauso hartu ahal zituen neurriak zehaztu zituen.[22]

Plaid Cymru-ren lidergoa[aldatu | aldatu iturburu kodea]

Pricek 2018ko Plaid Cymru-ren lidergorako hauteskundeak irabazi zituen ia alderdiko kideen botoen erdiarekin, Leanne Wood aurreko liderra garaituz. 2018ko urrian, Pricek Angus Robertson SNPko buruorde ohia kontratatu zuela iragarri zuen, Plaid Cymru-ren kanpaina estrategiaren berrikuspena gainbegiratzeko.[23] Bigarren Brexit erreferendum bat egiteko aldarrikapenekin bat egin zuen, eta berak eta bere alderdiak balizko erreferendum horretan Europan jarraitzearen alde egingo luketela esan zuen.[24]

2019ko urtarrilean Price Brexitaren ondoren Britainia Handiko eta Irlandako nazio zelten arteko lankidetzaren alde egin zuen. Bere proposamenen artean, Irlandan, Galesen, Eskozian eta Man uhartean energia, garraio eta komunikazio azpiegitura bateratuak eta inbertsioak egiteko Celtic Development Bank ("Garapen Banketxe Zelta") baten sorrera ere proposatu zuen, baita Batasun Zelta batena ere. RTÉ Irlandako telebista publikoan egindako elkarrizketa batetan, Galesek eta Irlandak nazio bakoitzeko hizkuntza indijenak sustatzeko elkarrekin lan egitea proposatu zuen.[25]

Erreferentziak[aldatu | aldatu iturburu kodea]

  1. (Ingelesez) «Live updates as Adam Price is named new leader of Plaid Cymru» WalesOnline.
  2. a b (Ingelesez) «Adam Price: who is the new Plaid Cymru leader replacing Leanne Wood?» inews.co.uk 2018/9/28.
  3. (Ingelesez) Williamson, David. «The stories behind the contenders to lead Plaid Cymru» WalesOnline.
  4. (Ingelesez) «Price's election as Plaid Cymru Leader marks radical change in party's direction» TPN 2018/10/9.[Betiko hautsitako esteka]
  5. (Ingelesez) «Advocate of wealth distribution» WalesOnline Noiz kontsultatua: 2019-09-05.
  6. (Ingelesez) «Former Carmarthen MP not to stand for Assembly» Wales Online 2010/8/4.
  7. (Ingelesez) «Plaid reveals Labour steel cash link» BBC News 2002/2/11.
  8. (Ingelesez) «Steel firm condemns 'Mittal aid'» BBC News 2002/2/18.
  9. (Ingelesez) «Blair impeachment campaign starts Friday, 27 August 2004» BBC News 2004/8/27.
  10. (Ingelesez) «MP thrown out over Blair war jibe MP thrown out over Blair war jibe Thursday, 17 March 2005» BBC News 2005/3/17.
  11. (Ingelesez) «Plaid MP's BBC licence fee threat Monday, 20 August 2007» BBC News 2007/8/20.
  12. (Ingelesez) «MPs' adverts broke election rules» BBC News 2007/11/19.
  13. «Former Carmarthen MP not to stand for Assembly» WalesOnline Noiz kontsultatua: 2011/4/6.
  14. (Ingelesez) Meechan, Brian. (2015/4/15). «Finance technology firm Ideoba goes out of business» BBC Wales.
  15. (Ingelesez)"Adam Price" at Nesta
  16. (Ingelesez) «Ex-Plaid Cymru MP Adam Price eyes Welsh assembly seat» BBC News.
  17. (Ingelesez) «Assembly Election 2016: These are the new Welsh AMs» WalesOnline Noiz kontsultatua: 2016/5/6.
  18. (Ingelesez) Shipton, Martin. (2018/7/2). «Plaid AM Adam Price threatens to challenge Leanne Wood for Plaid leadership» WalesOnline.
  19. (Ingelesez) «Two challenge Wood for Plaid leadership» BBC News 2018/7/4.
  20. (Ingelesez) «Plaid AM backs 1p tax rise for education» BBC News 2018/7/22.
  21. (Ingelesez) «10 ways to float the grounded ship of the Welsh economy and set sail» Nation.Cymru 2018/8/31.
  22. (Ingelesez) «Price: Indy Wales 'sooner not later'» South Wales Guardian.
  23. (Ingelesez) «Ex-SNP deputy Angus Robertson to lead Plaid Cymru overhaul in bid to boost Welsh independence hopes» PoliticsHome.com 2018/10/5.
  24. (Ingelesez) «Plaid MPs 'will back Brexit poll with SNP'» BBC News 2018/10/8.
  25. (Ingelesez) Nualláin, Irene Ní. (2019/1/10). «Welsh party leader calls for Celtic political union» RTÉ News.

Kanpo estekak[aldatu | aldatu iturburu kodea]