Kristiane Etxaluz

Kristiane Etxaluz
	;
Bizitza
Jaiotza	Domintxaine, 1941 (82/83 urte)
Herrialdea	Zuberoa, Euskal Herria
Lehen hizkuntza	frantsesa
Familia
Ezkontidea(k)	Alfonso Etxegarai
Hezkuntza
Hizkuntzak	frantsesa
Jarduerak
Jarduerak	nekazaria
Sinesmenak eta ideologia
Alderdi politikoa	Enbata

Kristiane Etxaluz^[1] (Domintxaine, Zuberoa, 1941 -) ezker abertzaleko militante historikoa da. Alfonso Etxegarai urte luzeetan deportatuta egon zen bikotekidea. Zuberoa eta São Toméren artean bizi da.

Biografia[aldatu | aldatu iturburu kodea]

Domintxainen jaio zen; gaur egun ere, Euskal Herrian denean, herri hartako Sorhabilia etxaldean bizi da.

Medikuntza, Biologia eta Kazetaritza ikasketak egin ditu eta Espainierazko Filologian lizentziatua da. Hazparneko Lanbide eskolan irakasle aritu zen gaztetan.

Abertzaletasunarekiko lehen loturak 1961-1962an Bordelen ikasle zebilela izan zituen. 1963an Enbata mugimenduaren sorreran esku hartu zuen. 1965ean Dantxarinean atxilotu eta Iruñean kartzelaratu zuten, ETAren aldeko postari lanak egin zituelako. Taldeko kidea izanik 1967an Enbatako hautagaia izan zen; kanpaina arrakastatsua izan bazen ere, espektatibak ez ziren bete eta ez zen % 5era heldu.

Politika arloan egin duenaz gain antzerki eta kultura munduak ere jorratu ditu aspalditik. 1968an Matalas antzezlanean eta 1969an Piarres Larzabalek idatzitako Ibañeta izenekoan parte hartu zuen; 2008an obra beraren berrantzezpenean ere parte hartu zuen. Geroago tobera herri antzerkiaren berreskurapena ekarri zuen Lurra gurea da lanean aritu zen; Iholdin egin nahi zuten urtegi baten gaineko problematikari buruzkoa izan zen. Bigarren tobera Baigorrin egindako Etxe sartzea izan zen.

1985an Frantziako gobernuak Alfonso Etxegarai senarra Baionan atxilotu eta Ekuadorrera deportatu zuen; han bahitu eta torturatu egin zuten, eta argitu gabeko gertaera batzuen ondoren, São Tomén azaldu zen. Politikaren eremuan zenbait urtetan Herri Batasunaren ekitaldietan esku hartu zuen. AB eta Batasunaren arteko hausturaren aurrean, ezker abertzalearen batasunaren alde atera zen.

1990eko hamarkadan nekazaritzan aritu zen Domintxaine jaioterrian eta, horretaz gain, Ekin aldizkarian ere idazten zuen.

Argitalpenak[aldatu | aldatu iturburu kodea]

Alfonso Etxegarai: Regresar a Sara. Testimonio de un deportado vasco liburua, Txalaparta, Tafalla, 1995.
Manu Robles-Arangiz Fundazioaren Sustraiak aldizkarian Iparraldeko mugimendu abertzalearen Historiaren haritik argitaratu zuen 2008an; liburuko lehen kapitulua (Les tout débuts (1960-1975)) Etxaluzek egina da^[2].
Sagarren denbora filma, 2010; zuzendariak: Josu Martinez eta Txaber Larreategi.

Erreferentziak[aldatu | aldatu iturburu kodea]

↑ Frantsesezko grafian Christiane Etchalus edo Etchaluz, euskararako Kristiane Etxaluz sarritan aurki daiteke; Xipri Arbelbidek Enbata bere liburuan Kristiana Etxaluz erabiltzen du.
↑ Liburua Fundazioaren webgunean.