Azoreak

Azoreetako mapa eta kokapena.

Azoreak edo Azore uharteak (portugesez, Açores) Portugalgo bi eskualde autonomoetako bat da (Madeira da bestea). Uhartedia da, eta Ozeano Atlantikoaren ipar-ekialdean kokatuta dago, Iberiar Penintsulatik 2000 bat kilometro ekialdera, Madeiratik 1200 km hego-ekialdera, Eskozia Berritik 2300 km ipar-mendebaldera eta Bermudatik 3500 km hego-mendebaldera.

2.333 km² ditu, eta 2001ean 241.763 biztanle zituen (104 biz./km²).

Ponta Delgada (Sao Miguel) da hiri nagusia eta hiriburuetako bat. Beste bi hiriburuak Angra do Heroismo eta Horta dira.

Historia

1427an Henrique printzearen ("Nabigatzailea") zerbitzurako zegoen kapitain batek uharteak topatu zituen, antza denez Gonçalo Velhok. Hamabi urte geroago uhartedia hasi ziren populatzen, nagusiki Alentejo eta Algarvetik joandako jendeak.

Uharteak

Azore uhartedia bederatzi uhartek osatzen dute:

• Mendebaldean:
  • Corvo (17 km2, 435 biztanle 2002an).
  • Flores (143 km2, 3.949 biz.).

• Erdialdean:
  • Faial (173 km2, 14.934 biz.).
  • Graciosa (62 km2, 4.708 biz.).
  • Pico (446 km2, 14.579 biz.).
  • Sao Jorge (246 km2, 9.522 biz.).
  • Terceira (403 km2, 54.996 biz.).

• Ekialdean:
  • Santa Maria (97 km2, 5.490 biz.).
  • Sao Miguel (759 km2, 130.154 biz.).

Kontzejuak

• Santa Maria:
  • Vila do Porto
• Sao Miguel:
  • Lagoa
  • Nordeste
  • Ponta Delgada (65.854 biztanle 2001ean)
  • Povoaçao
  • Ribeira Grande (28.462 biz.)
  • Vila Franca do Campo
• Terceira:
  • Angra do Heroismo (35.581 biz.)
  • Praia da Vitoria (20.252 biz.)
• Graciosa:
  • Santa Cruz de Graciosa
• Sao Jorge:
  • Calheta
  • Velas
• Pico:
  • Lajes do Pico
  • Madalena
  • Sao Roque do Pico
• Faial:
  • Horta (15.063 biz.)
• Flores:
  • Lajes das Flores
  • Santa Cruz das Flores
• Corvo:
  • Vila do Corvo

Inguru naturala

Ponta do Pico (2.351 m), Portugal osoko mendirik altuena, uhartedian dago, Pico uhartean hain zuzen ere.

Kanpo loturak

• (Frantsesez)(Ingelesez)(Alemanez) Azoreetako webgune ofiziala