Krebs zikloa

Wikipedia(e)tik
Hona jo: nabigazioa, Bilatu
Krebs zikloaren eskema


Krebs zikloa (azido zitrikoaren zikloa edo azido trikarboxilikoen zikloa ere deitua) bide kataboliko bat da, gluzido, gantz-azido eta aminoazidoen oxidazioan parte hartzen duena. Gluzidoen katabolismoan, bide metaboliko hau arnasketa aerobioaren fase bat da (glukolisi eta arnas katearekin batera). Zelula eukariotoetan Krebs zikloa mitokondrioen matrizean burutzen da, eta prokariotoetako zitoplasman.

Ziklo honek CO2, energia (GTP moduan) eta molekula erreduzituak (NADH, H+ eta FADH2) sortzen ditu. Azken hauek hurrengo fase batean energia ekoiztuko dute (ATP).

Katabolismoan ez ezik, anabolismoan ere Krebs zikloak garrantzi handia du, zikloan parte hartzen duten metabolito batzuek (alfa zetoglutaratoak eta oxalazetatoak, esaterako) funtsezko zeregina betetzen dutelako hainbat bide anabolikotan.

Ziklo honetan deskarboxilazioak, oxidazioak eta deshidratazioak gertatzen dira, jarraian ikusiko dugunez.


Zikloaren nondik norakoak[aldatu | aldatu iturburu kodea]

Ciclo de Krebs-es.svg


Azetil-CoA zikloaren aitzindaria da. Molekula hori bide kataboliko desberdinetatik sor daiteke (gantz azido eta aminoazidoen oxidazioan sortzen da, eta baita glukolisian sortutako azido pirubikotik ere).


  • zikloaren lehenengo erreakzioan azetil CoA (2 C) oxalazetatoarekin (4 C) elkartzen da, 6 karbonadun zitratoa sortzeko. Erreakzio honetan CoA aske geratzen da.
Cycle de Krebs 01.png


  • bigarren erreakzioan akonitasa entzimak zitratoa isomeratzen du, isozitratoa sortuz.
  • hirugarren urratsean isozitratoak deskarboxilazioa eta deshidrogenazioa jasaten du, alfa zetoglutaratoa agertuz.
  • laugarren erreakzioan beste deskarboxilazio eta deshidrogenazio bat gertatzen da. CoA-k ere parte hartzen du eta sukzinil CoA agertzen da.
  • hurrengo pausoan sukzinil CoA-k A koentzima galtzen du sukzinato bihurtzeko. Hemen askatzen den energia aprobetxatuz GDP fosforilatu egiten da GTP agertuz.
  • deshidrogenazio baten bitartez sukzinatoa fumarato bihurtzen da.
  • hidratazio batek fumaratoa malato bihurtzen du.
  • azken urratsak oxalazetatoa sortzen du, malato deshidrogenasa entzimak malatoa deshidrogenatzen duenean:
Cycle de Krebs 10.png


Hortik aurrera zikloa errepikatzen da.

Zikloaren balantzea[aldatu | aldatu iturburu kodea]

Zikloak aipatutako 8 etapa ditu, etapa bakoitzean entzima espezifiko batek parte hartuz. Azetil CoA mol bakoitzeko honako molekula hauek sortzen dira:

  • 2 mol CO2
  • 3 mol NADH,H+
  • 1 mol FADH2
  • 1 mol GTP

Zikloaren ekuazio osoa honako hau izanik:

Azetil CoA + 3 NAD+ + FAD + GDP + Pi + 3 H2O → CoA-SH + 3 (NADH + H+) + FADH2 + GTP + 2 CO2 + 3 H+

Ikusten denez, Krebs zikloak ez du energia asko ekoizten (1 GTP, gero ATP bihurtuko dena). Gluzidoen katabolismoan, glukolisiak 2 ATP ekoizten ditu, eta arnas katearen fosforilazio oxidatiboan 34 molekula ATP sortzen dira glukosa molekulako. Zikloak, hala ere, energia kimiko potentzial handia duten molekula erreduzituak (NADH,H+ eta FADH2) sortzen ditu, arnas katearen fosforilazio oxidatiboan sartuko direnak ATP ekoizteko.

Historia[aldatu | aldatu iturburu kodea]

Hans Adolf Krebs alemaniarrak eta Albert Szent-Györgyi hungariarrak, biak ala biak Nobel Saridunak, aurkeztu zuten zikloa 30. hamarkadan. Europan Krebs zikloaz ezagutzen da baina herriale komunista izan zirenetan Szent-Györgyi-Krebs izenaz.


Kanpo loturak[aldatu | aldatu iturburu kodea]

Commonsen badira fitxategi gehiago, gai hau dutenak: Krebs zikloa Aldatu lotura Wikidatan