Arraia (Araba)

Arraia Arabako hego-ekialdeko haran eta udalerri ohi bat da, Mendialdeko kuadrillakoa. Maeztu herriarekin elkartuta, gaur egun Arraia-Maeztu izeneko udalerriaren barnean dago. Maezturekin elkartzeko une hartan, Arraia udalerriak 45,83 km² eta 800 bat biztanle zituen.

Egaren ibaiadarra den Azazetako Egaren ertzean dago; mendebaldean, Izkiko natura parkearekiko mugan, Arraialde izeneko mendiari izena eman zion.

Historia

Arabako Ermandade zaharra udalerri modernoa bihurtu zenetik zenbait anexio-prozesu suertatu dira. 1877ko erroldarako Sabando udalerria desagertutzat jo eta Arraia barruan kokatu zen. 1958an Laminoria eta Apilaizekin bat egin zuen Maeztu izena hartu zuen udalerria sortzeko; azken hau, Korres ere 1965ean jaso eta gero, 1987an izena aldatu eta Arraia-Maeztu bilakatu zen.

Arraia izenaren forma zahartzat hartzen da 1025ko Donemiliagako goldean agertzen den Harrahia toponimoa.

Herriak

Hauexek dira Arraiako kide ziren herriak: Atauri, Azazeta, Birgarabarren, Birgaragoien eta udalerri zaharra nahiz berriaren buru den Maeztu. Denek A-132 (Gasteiz-Lizarra) errepideak zeharkatuak.

Sabando Arraiako kide zela sartu zen 1958ko fusio berrian baina geografikoki aparte dago.