Herria

Wikipedia, Entziklopedia askea
Hona jauzi: nabigazioa, Bilatu
Herria
Mota Toki informazioa
Lehen zenbakia 1944
Banatze lurraldea Ipar Euskal Herria
Argitaratze hiria Baiona
Hizkuntza Euskara
Maiztasuna Astekaria
Ale kopurua 3.000
ISSN 0767-7642
w390w.gipuzkoa.net/WAS/CORP/DKPPrensaHistoricaWEB/buscar.do?amicus=69560

Herria Baionan argitaratzen den astekari bat da, bereziki Ipar Euskal Herriko berriak zabaltzen dituena. 1944 urtean jalgi zen lehenengo alea, Leon Leon, Manex Hiriart-Urruti, Zaldubi, Oxobi, Anxuberro, Piarres Lafitte eta beste zenbait euskaltzaleren eskutik. Egun, 3.000 ale inguru kaleratzen ditu, 1950eko hamarkadan 10.000 ale zabaltzea lortu bazuen ere. 2009 urtean, 3.000garren zenbakia argitaratu zen.

Hasiera[aldatu | aldatu iturburu kodea]

1944an, Indar Bateratuak Parisen sartzearekin batera, Eskualduna astekaria itxi zuten, euskal astekariak Hirugarren Reicharen eta haien mendeko Vichyko Gobernuaren alde agertutako jarrera leporatuta.

Bat itxi eta beste bat zabaldu. Urte hartan bertan, Eskualdunaren hutsunea betetzeko, Herria informazio-astekaria sortu zuten Baionan Oxobi idazleak, Leon Leon Uztaritzeko erretoreak, Louis Dassance Uztaritzeko alkateak, Bernard Etcheberry Milafrangako erretoreak eta Piarres Lafittek —astekariaren lehen zuzendaria izan zen—. Lafitte ez zen berria, ordea, euskal kazetaritzan: haren izena ezaguna zuen Bigarren Mundu Gerraren aurreko irakurleak. Beloke, Larresoro eta Baionan egin zituen apaiz ikasketak, Uztaritzen finkatu aurretik. Prentsan emandako lanez gain, bazuen zenbait lan argitaraturik, euskaraz zein frantsesez: Egiazko argia (1927), Julien Heguy Apheza (1930), Ithurralden kantuak (1932) eta Les études basques à travers les siècles (1932), besteak beste, baita Eskualdunen Lorategia (1545-1800) ere, euskal literaturaz paratu zuen antologia. Prentsaren munduan aspaldidanik eta ordu arte Iparraldeko elizak mesfidati begiratzen zioen Hegoaldearekiko jarrerari, baina hori Aintzina hilabetekaria sorreraz aldatu zen 1934an. Bigarren Mundu Gerran Erresistentzian ibilia, Eskualdunak ez zuen berme politikoa erantsi zion Herriaren proiektuari. Hura bezala, batez ere laborariei eskainia, politikan kontserbadore eta sinesmenean Eliza Katolikoari lotua agertu zen, askoz ere ikuspegi zabalagoaz, berriz, Eskualdunak erakutsi zuen jarreraren aldean.

Herrian Lafitte ez zegoen bakarrik. Kazetari hutsetik haratago joan nahi horretan, erredakzioan bertan zuen lagunik egokiena: Etienne Salaberri heletarra. Beloken ikasi ondoren, Uztaritzeko apaizgaitegiko irakasle izan zen Salaberri eta gerran, alemanen kontra borrokatu. Herriako erredakzio buru izan zen hasierako urte haietan. Bistan denez, Lafitterekin agertu zituen parekotasunak ukaezinak dira.

Erreferentziak[aldatu | aldatu iturburu kodea]

Kanpo loturak[aldatu | aldatu iturburu kodea]