Itsas arrano mokohandi

Itsas arrano mokohandi
Irudi gehiago
Iraute egoera
Kaltebera  (IUCN 3.1)
Sailkapen zientifikoa
Klasea	Aves
Ordena	Accipitriformes
Familia	Accipitridae
Generoa	Haliaeetus
Espeziea	Haliaeetus pelagicus (Pallas, 1811)
Banaketa mapa
Datu orokorrak
Masa	arra: 5,45 kg emea: 7,9 kg
Zabalera	220 cm
Kumaldiaren tamaina	1,7
Errute denbora	41 egun

Itsas arrano mokohandia (Haliaeetus pelagicus) Haliaeetus generoko animalia da. Hegaztien barruko Accipitridae familian sailkatua dago.

Ezaugarriak

Hegazti harrapari hau munduko handiena da Harpia harpyja-rekin batera masa eta gorputz tamainatik begiratuta, emeen pisua 9 kg-ra heldu daitekelarik. Arrak, hegazti harrapari guztietan gertatzen den moduan, txikiagoak dira.

Hegazti hau 1 m luze da burutik buztan puntaraino eta bere hegoen luzera 2,5 metrokoa da, Europan bizi den itsas arrano buztanzuriaren antzerakoa.

Lumak beltz-arrexka eta zurien arteko mosaikoa osatzen duen kolorekoak dira. Kolore zuri hauek heldutasunaren ezaugarri bat da gazteetako lumajea arre kolorekoa izanik. Hankak horiak ditu eta mokoa horia bezain handia da. Moko handi hori hegazti harrapari bizi guztien artean handiena da, Filipinetako arranoarena baino handiagoa.

Arrano oso handiak izanda ere ez dira arrano bereziki oldarkorrak. Beraien artean borrokaldiak izaten dituzte lurralde eta elikagaiengatik, baina tamaina handia izan arren askotan txikiagoak baina oldarkorragoak ere badiren arrano beltzen kontrako borrokaldiak galtzen dituzte, batez ere elikagaiak faltan diren negu latzenetan.

Elikadura

Bere elikadura batez ere arrainez osatua dago, baina noizbehinka krustazeoak, ahateak eta bestelako ureko hegaztiak ere ehizatu eta jaten ditu.

Super-harraparia da, beraz elikadura katearen goian dago, ez du inolako etsai naturalik.

Ugalketa

Zuri-berdexka koloreko 1-3 arrautza bitartean erruten ditu eta normalean jaiotako txita batek baino ez du bizirauten. Inkubazioa 40-41 egunekoa izan ohi da eta jaio berriko txiten lumatxa grisa da sorbalda aldean eta zuria sabela aldean.

Habi oso handiak eraikitzen dituzte, 1,5 m altuerako eta 2,5 m diametroko tamainera iritsiz.

Hedapena

Kamtxatka penintsulan eta Koreako, Sakhalin uharteko zein Japoniako itsasoko kostaldeko lur eremuetan bizi da. Neguan Japonian bertan eta Amur ibaiko eremu baxuetan dabil.

Itsas arrano hau Asiako ipar-ekialde muturrean bakarrik bizi da, munduko lekurik baztertuenetariko batean.

Habitata

Arrano hauek itsas arrano edo arrano arrantzale guztiek bezala ur masa handiak behar dituzte bizirauteko, bere elikaduraren oinarria (ia dena) arrainak direlako.

Neguan izotza presente dagoen itsasertzetan bizi da, lakuetatik ere hedatzen da baina beti ere itsasotik gertu dauden laku eta barnealdeko ur masetatik.

Kontserbazioa

Arrano hau espezie kalteberatzat sailkatu du Naturaren Kontserbaziorako Nazioarteko Erakundeak; hau da, galtzeko arriskuan dago hegazti espezie hau.

Bere habitateko super-harraparia da, ez du inolako etsai naturalik eta beraz paper ekologiko garrantzitsu bat jokatzen du bere habitateko orekan, izaki honen galerak ekosistema osoaren gainbehera eta kolapsoa ekarriko luke.

Mundu mailan, bazter geografiko txiki eta zehatz batean egoteak, alegia, espezie hau beste inon ez topatzeak, arazo gehigarri bat suposatzen du espezie honen biziraupenean. Beraz, bere habitat murriztua ondo kontserbatzea ezinbestekoa da espezie honen biziraupena bermatzeko.

Argazkiak

• 
  Itsas arrano erraldoiaren mokoa oso handia da.
• 
• 
  Stellerren itsas arrano erraldoia izotzetan.

Ikus, gainera

• Haliaeetus
• Accipitridae

Kanpo estekak

• World Bird Names

• Datuak: Q269896
• Multimedia: Haliaeetus pelagicus / Q269896
• Espezieak: Haliaeetus pelagicus