Klovis I.a

Wikipedia(e)tik
Hona jo: nabigazioa, Bilatu
Klovis I.a, François-Louis Dejuinne margolariaren arabera (1786-1844)

Klovis I.a (Tournai, 465 - Paris, 511) frankoen erregea izan zen (481 - 511). Aita Txilderiko I.a hil zenean (481), Tournaiko franko saliarren errege izendatu zuten. Klotildekin ezkondu zen.

486ean, Soissonsko guduan Siagrio jeneral erromatarra garaitu zuen. Alamanak irabazi zituen (495) eta baita burgundiarrak ere (500). Alariko II.a bisigodoa ere garaitu eta hil egin zuen Vouilléko guduan (507). Monarkia frankoaren fundatzailea eta Galia osoko errege bakarra izan zen. Erromako berant inperioaren Ekialdeko enperadoreak patrizio titulua eman zion.

Bere emazte Klotilderen eta Reimseko San Remigio apezpikuaren eraginez katolizismora aldatu zen; katolizismoa babestu eta Orléansko kontzilioa bildu zuen (496an gutxi gorabehera). Bere heriotzaren ondoren, erresuma bere lau semeen artean banatu zen: Txildeberto, Klodomiro, Klotario eta Therry.

Izena[aldatu | aldatu iturburu kodea]

Chlodovech forma frankikoa, latindu eta Chlodovechus izena eman zuen eta geroago Ludovicus. Frantseseko Louis izena bertatik dator eta gaztelaniazko Luis ere bai. Euskaraz, jatorrizko Chlodovech formatik sortu zituen Sabin Aranak, bere izendegian, Koldobika izena eta haren laburdura Koldo.

Ikus, gainera[aldatu | aldatu iturburu kodea]

Commonsen badira fitxategi gehiago, gai hau dutenak: Klovis I.a Aldatu lotura Wikidatan