Pepin Laburra

Pepin Laburra
Frankoen erregea
751 – 768
Aurrekoa	Txilderiko III.a
Ondorengoa	Karlomagno Karloman I.a
Jaiotza	ca. 715
Heriotza	768ko irailaren 24a Saint-Denisko basilika
Ezkontidea	Bertrada Laongoa

Pepin Laburra (Jupille?, 715 - Saint-Denis, 768ko irailaren 24a), frankoen lehendabiziko errege karolingiarra (751 - 768), Karlos Martelen semea. Neustria, Borgoina eta Proventzako (714) duke izan zen, aita Karlos Martel frankoen duke, printze eta errege jauregiko etxezain zela. 741ean, aita Karlosek erretiroa hartuta, Karloman eta Pepin semeen eskuetan utzi zuen agintea. Handik gutxira, Karlomanek agintea Pepini utzi zion (747), eta orduan Austrasia ere eskuratu zuen.

Pepin ez zen erregea, frankoen erregea Txilderiko III.a baitzen izenez behintzat. Aldiz, botere guztia bere eskuetan geratu zen 747az geroztik eta Pipinek Zakarias Aita Santuaren baimena lortu zuen frankoen errege izendatua izateko (751). 752an, Pipin errege koroatu zuten, Elizaren bedeinkapen osoaz, eta Txilderiko erregea, merovingiarretan azkena, kargugabetu eta monasterio batean giltzapetu zuten. Urte batzuk geroago, Erromako Elizaren eta Aita Santuaren babesle bihurtuta, Italian nagusi ziren lonbardiarrak Eztebe II.a Aita Santuari Ravennako exarkerria ematera behartu zituen (756).

Aleman, bavariar eta saxoitarren aurka borrokatu zen mendebaldean, eta alemanak menderatu. Germaniar herri horien kontra oldartu ondoren, ordea, hegoaldeari so jarri zen. 752an 30 urte lehenago musulmanek hispaniar godoei atzemandako Septimania eraso zuen. Luze joan zen bere egitekoa, godoak ez baitziren frankoen agintaritzarekin fio; gainera, Waifer Akitaniakoak zuzendutako baskoien armadak atzetik eraso eta gauzak zaildu egin zizkion.

Godoen mesfidantzak gaindituta, 759an Septimaniako Narbonan sartu zen garaile. Gainontzeko etsaiak oinpean hartu ondoren, etsai bakarra zuen errege frankoak: Waifer eta Akitania (Baskonia barruan zela). 60ko hamarkadan etengabe eraso zuen Waifer buruzagia, baita Waiferrek erantzun ere, baina gerra bere muturrera eraman zuen errege frankoak, suntsipena herri eta monasteriotara eraman zuen, soroak eta kabaleak lapurtu eta erre, eta fidagarriak ez zituen gotorlekuak/gazteluak birrindu. 767an Tolosa Okzitania Akitaniako hiriburua bere eskuetan erori eta Waifer ere handik gutxira hil zuten dukearen jarraitzaile etsituek. 768an Akitania menperatua zen eta, hiltzerakoan (768), erresuma bi semeen artean, Karlomagno eta Karloman I.a, banatu zuen.

Erreferentziak

Aurrekoa Txilderiko III.a

Frankoen errege 751–768

Ondorengoa Karlomagno Karloman I.a