Robert Musil

Wikipedia(e)tik
Hona jo: nabigazioa, Bilatu
Robert Musil (1900)

Robert Musil austriar idazlea izan zen (Klagenfurt, 1880 - Geneva, 1942). Goi-burgesiako familia batean jaio zen. Akademia militar batean sartu zen, baina militar-ikasketak utzi eta Ingeniaritza ikasten hasi zen. Berlinera joan zen, eta han Filosofiako eta Psikologia Esperimentaleko ikasketak egin zituen. Lehen Mundu Gerran koronel izan zen, eta gerra bukatu zenean, Austriako Kanpo Arazoetako ministerioarentzat lan egin zuen. Hitlerren gudarosteak Austrian sartu zirenean, Suitzara ihes egin zuen. Musilen eleberriak kontakizun eta iruzkin dira aldi berean. Austria-Hungariako Inperioaren arazoei buruzko eleberri bat idatzi zuen, Der Mann ohne Eigenschaften (1931) izenekoa. Haren beste zenbait lan aipagarri: Die Verwirrungen des Zöglings Törless (1902-1903), Die Schwärmer (1921), Vinzenz und die Freundin bedeuntender Männer. 1923an, Kleist saria eman zioten ipuin-bilduma batengatik, Drei Frauen (Hiru emakume).

1942an, 62 urte zituela, Genevan hil zenean, erbestean, haren heriotzak ez zuen oihartzun handirik izan, mundua gerraren zurrunbiloan sartua baitzegoen; inork gutxik ezagutzen edo gogoratzen zuen Musilen izena, eta haren liburuak ez ziren aurkitzen errazak.

Gorabehera historikoak zirela eta, idazle honen obra ia ezezaguna gertatu zen, ia eraginik gabea, bizirik zen bitartean. 1950 ingurutik aurrera hasi zen obra hori irakurleen bidea urratzen, batez ere bere idazlan nagusia (Der Mann ohne Eigenschaften) jatorrizko hizkuntzan berriz argitaratu eta Europako hizkuntza nagusietara itzuli zenean. Goi-maila iritsi zuen XX. mendeko Europako literaturan.


Erreferentziak[aldatu | aldatu iturburu kodea]

Commonsen badira fitxategi gehiago, gai hau dutenak: Robert Musil Aldatu lotura Wikidatan