Juan Prim

Prim jeneralaren erretratua.

Joan Prim i Prats katalanez edo Juan Prim y Prats gaztelaniaz (Reus, Katalunia, 1814ko abenduaren 16a - Madril, 1870eko abenduaren 30a) espainiarra, politikaria, militarra eta, 1869ko ekainaren 18tik 1870eko abenduaren 27 arte, Espainiako Ministro Kontseiluaren presidentea izan zen. Gerra Karlistetan parte hartu zuelako da ezaguna.

Karlistaldietan

Lehen Gerra Karlistan (1833-1840) izandako garaipenengatik teniente izendatu zuten. Urteekin baina jeneral izatera iritsi zen.

Ibilbide politiko eta militarra

• 1841ean diputatu sartu zen Tarragonako probintzia ordezkatuz. Esparterorekin ika-mikak eduki izan zituen, Prim haren aurrean Kataluniako interesak defendatuz.

• 1847an Puerto Ricon hilabete batzuk igaro zituen hango kapitain jeneral moduan.

• Krimeako Gerran ere partu hartu zuen, 1853an Konstantinopolisera joanez.

• Maroko eta Espainiaren arteko gerran ere ibili zen, 1859an piztutakoa.

• 1862an Mexikora bidali zuten lan diplomatikoak egitera.

• 1868an Isabel II.aren aurkako altxamenduan nabarmendu izan zen, ondorengo behin-behineko gobernuan parte hartuz.

• 1870eko abenduaren 27an pairatutako atentatuaren ondorioz 3 egun geroago Madrilen hil zen.