Eufrates

Eufrates الفرات Al-Furāt (ar), Firhat (ku), Fırat (tr)
Siriako Halabiye aztarnategitik gertu.
Kokapena	Mesopotamia
Luzera	2.800 km
Arroa	765.831 km²
Emaria	818 m³/s
Iturburua	Taurus mendiak, Turkia (4.500 m)
Ibai ahoa	Xatt al-Arab > Pertsiar Golkoa

Eufrates —Eufrates ibaia bezala ere ezaguna— (turkieraz: Firat; arabieraz: الفرات‎ al-Furāt) Mendebaldeko Asiako ibaia nagusienetariko bat da. Tigrisarekin batera Mesopotamiako bi ibai handietatik mendebaldekoa da.

Bi adar ditu sorburuan: Kara Su eta Murat, Elazigen ipar-mendebalean elkartzen direnak. Armenian sortzen da, Anatoliatik igaro, Taurus mendiak gurutzatu, Siriatik igaro eta hortik Irakera doa. Tigrisarekin batzen den lekuan Xatt al-Arab sortzen dute eta hauek Pertsiar Golkoan bukatzen dute. 830 m³/s-ko ur-emaria du Sirian, baina udan 300 m³/s eta ekaitzetan 5.200 m³/s arte irits daiteke.

Karasu izeneko adarra (Sartaldeko Eufrates modura ere ezaguna) 3.290 metroko garaieran jaiotzen da Kargazapi Dagen, eta 442 km egin ondoren, Murat edo Ekialdeko Eufrates adarrarekin batzen da. Murat Keban ondoan, Ala Dag-en, Turkiako ekialdean, Van aintziraren iparrean sortzen da.

Beheko ibilguan beso ugari ditu eta padurak eta zingirak eratzen ditu. Ur handiek sortzen dituzten uholdeak saihesteko, urtegiak egin dira, urak beste guneetara eramanez. Leinu beduino ugari kokatu da Eufrates ibaiaren ibarretan. Babilonia ere haren ur bazterretan eraikia zegoen.

Ibaiadar nagusiak

Izena	Luzera (km)	Arroa (km2)	Emaria (m3/s)	Ertzea
Kara Su	450	22000		Lotunea
Murat ibaia	650	40000		Lotunea
Sajur ibaia	108	2042	4,1	Eskuinaldea
Balikh	100	14400	6	Ezkerraldea
Khabur	486	37081	45	Ezkerraldea