Arno Kontserbazio Bereziko Eremua
Arno Kontserbazio Bereziko Eremua | |
---|---|
Arnoko mendi-tontorrak, Arbiletik | |
Kokalekua | Mendaro eta Mutriku |
Koordenatuak | 43.281454ºN, 2.401920ºW |
Azalera | 1.112 hektarea |
Izendapena | Eusko Jaurlaritza |
Sorrera | EHAA. 2013ko apirilaren 22an |
Arduraduna | Gipuzkoako Foru Aldundia |
2013. urteaz geroztik, eta Eusko Jaurlaritzak dekretuz[1] izendatuta, Arno mendikatea[2] Natura 2000 Sareko Kontserbazio Bereziko Eremua (KBE) da, eta sare horren ES2120004 kodea du. Guneak 1.112 hektarea ditu eta Mendaro (252 ha) eta Mutriku (759 ha) artean banatuta dago. Lurzoruaren % 9 publikoa da (heren bat Mendaron eta bi heren Mutrikun).
Gunearen ezaugarri ekologiko nagusiak[2][3][aldatu | aldatu iturburu kodea]
Arnon artadi kantauriarra da nagusi. Baso mota hau urria da Gipuzkoan, eta arroka ama azaleratzen den eguterako kareharrizko lurzoruetan azaltzen da, malda handiko hegaletan. Hortaz, bere orientazioa, hegoaldera begira, eta lurzoruaren iragazkortasun handia direla eta, artadia oso baso lehorra da. 1960ko hamarkada arte, artadia egur-ikatza egiteko izan zen ustiatuta, eta gaur egun artadiak erakusten duen eitea horren ondorioa da. Bestalde, babestutako eremuaren %33 baino gehiago zuhaitz aloktonoen landaketak dira, batez ere pinuak.
Artearekin batera, basoan ugariak dira erramuak, gartxuak, karraskilak, gurbitzak edo arrosa basatiak. Zurezko floran, berriz, elorri beltzak, elorri zuriak, hurritzak, gorostiak edo zuhandorrak agertu ohi dira.
Babesgunearen iparraldeko aldean paisaia aldatzen da, malda handiak desagertzen dira eta, Olatz bailaran, adibidez, landazabalak, larreak eta laboreak dira habitat nabarmenenak.
Faunan, ur-igel arrunta, uhandre marmolairea, sugegorri kantauriarra, erbinudea, lepazuria, azkonarra, eta basurdea dira aipagarrienak. Kobazuloetan, saguzar-kolonia ugari dago. Harkaitzetan sai zuria habiagile da gunean.
Habitat nabarmenenak[2][aldatu | aldatu iturburu kodea]
Ondoren, KBEn dauden interes komunitarioko habitat eta espezieak zerrendatzen dira. Parentesi arteko zenbakiek Habitatei buruzko 92/43 Zuzentarauaren I. eranskineko kodeekin bat datoz.
- Artadiak eta karraskalak (9340)
- Belardi erdi-natural lehorrak eta kare-substratuetako sastraka-faziesak (Festuco-Brometalia) (6210)
- Haltzadi eta lizardiak (91E0)
- Hartxingadiak (8130)
- Kareharrizko harkaiztiak (8210)
- Sega-larreak (6510)
- Turistikoki ustiatu gabeko kobazuloak (8310)
- Txilardi kaltzikola otabera (Genista sp.) (4090)
- Txilardi lehor azidofiloak (4030)
Mehatxatutako flora[1][aldatu | aldatu iturburu kodea]
Espezie Mehatxatuen EAEko Katalogoko[4] bi espezie aurkitu dira Arnon, biak interes berezikoak. Gorostia (Ilex aquifolium) oso ugaria da artadiaren oihanpeko hainbat eremutan, eta hagina (Taxus baccata), askoz urriagoa. Gainera, erratza (Ruscus aculeatus) oso arrunta da artadiaren zuhaixka-geruzan.
Interes bereziko fauna[1][aldatu | aldatu iturburu kodea]
Zerrendan, Habitatei buruzko Zuzentarauaren II. eta IV. eranskinetan ageri diren espezieak, eta Estatuan edo EAEko katalogoan mehatxatutako espezie gisa sailkatuta daudenak ageri dira.
- Kakalardo adarduna (Lucanus cervus)
- Kaprikornio handia (Cerambyx cerdo)
- Alpetar kakalardo adarluzea (Rosalia alpina)
- Quimper barraskiloa (Elona quimperiana)
- Uhandre marmolairea (Triturus marmoratus)
- Txantxiku arrunta (Alytes obstetricans)
- Zirauna (Anguis fragilis)
- Eskulapioren sugea (Zamenis longissimus)
- Sai zuria (Neophron percnopterus)
- Miru beltza (Milvus migrans)
- Miru gorria (Milvus milvus)
- Arrano sugezale europarra (Circaetus gallicus)
- Mirotz zuria (Circus cyaneus)
- Gabiraia (Accipiter nisus)
- Zuhaitz-belatza (Falco subbuteo)
- Zata arrunta (Caprimulgus europaeus)
- Lepitxulia (Jynx torquilla)
- Etze-txinboa (Sylvia undata)
- Antzandobi arrunta (Lanius collurio)
- Europako basakatua (Felis sylvestris)
- Schreibers saguzarra (Miniopterus schreibersii)
- Ferra-saguzar handia (Rhinolophus ferrumequinum)
- Ferra-saguzar mediterraneoa (Rhinolophus euryale)
- Ferra-saguzar txikia (Rhinolophus hipposideros)
- Natterer saguzarra (Myotis nattereri)
- Kuhl pipistreloa (Pipistrellus kuhlii)
- Saguzar arrunta (Pipistrellus pipistrellus)
- Baratze-saguzarra (Eptesicus serotinus)
- Gau-saguzar txikia (Nyctalus leisleri)
Kudeaketarako lehentasunezko elementuak[2][aldatu | aldatu iturburu kodea]
Habitat naturalak
- Artadi kantauriarra
- Landazabal atlantikoa
Prozesu ekologikoak
- Konektibitatea
Erreferentziak[aldatu | aldatu iturburu kodea]
- ↑ a b c «Arno (ES2120001) Kontserbazio Bereziko Eremua izendatu eta hura babesteko neurriak ezartzeko dekretua.» www.euskadi.eus (Noiz kontsultatua: 2024-02-20).
- ↑ a b c d «Sistema de Información de la Naturaleza de Euskadi» www.ingurumena.ejgv.euskadi.eus (Noiz kontsultatua: 2024-02-20).
- ↑ Hainbat, egile. (1996). Euskal Autonomi Elkarteko garrantzizko espazio naturalen katalogo irekia. Eusko Jaurlaritza, 175-179 or. ISBN 84-457-1109-1..
- ↑ «Espezie Mehatxatuen EAEko Katalogoa» www.ingurumena.ejgv.euskadi.eus (Noiz kontsultatua: 2024-02-20).