Wilhelm Reich

Wikipedia, Entziklopedia askea
Jump to navigation Jump to search
Wilhelm Reich
Wilhelm Reich in his mid-twenties.JPG
Bizitza
Jaiotza Dobrianychi1897ko martxoaren 24a
Herrialdea Cisleithania
 Ameriketako Estatu Batuak
 Austria
Heriotza Union konderria (Pennsylvania)1957ko azaroaren 3a (60 urte)
Hobiratze lekua Orgonon
Heriotza modua : bihotz-gutxiegitasuna
Familia
Ezkontidea(k) Annie Reich
Ilse Ollendorf  (1946 -
Seme-alabak
Hezkuntza
Heziketa Vienako Unibertsitatea
Hizkuntzak ingelesa
alemana
Jarduerak
Jarduerak psikiatra, filosofoa, akademikoa eta sex educatorra
Enplegatzailea(k) The New School
Zerbitzu militarra
Parte hartutako gatazkak Lehen Mundu Gerra
Sinesmenak eta ideologia
Erlijioa ateismoa
Alderdi politikoa Alemaniako Alderdi Komunista
Social Democratic Party of Austria
IMDb nm0716968
http://www.wilhelmreichtrust.org/index.html

Wilhelm Reich (Dobzau, Galitzia, gaur egun Dobrzcynica, Ukraina, 1897ko martxoaren 24a - Lewisburgeko espetxean, Pennsylvania, AEB, 1957ko azaroaren 3a) austriar psikiatra eta psikoanalista izan zen. Psikoanalisia langile-iraultzaren ildora bideratzen saiatu zen, eta sexu-etika goitik behera aldatzea proposatzen zuen.

Biografia[aldatu | aldatu iturburu kodea]

Sigmund Freuden ikasle eta, 1920. urtetik aurrera, Vienako Psikoanalisi Elkarteko kide izan zen. Komunista zen; Austriako alderdi sozialdemokratako kide egin zen 1927an, eta hiru urte geroago Berlinen bizilekua harturik, Alemaniako alderdi komunistakoa.

1927an "Orgasmoaren funtzioa" liburua idatzi zuen; liburu horretan giza osasunaren funtsezko osagarritzat aurkeztu zuen orgasmoa, eta sexu-askapenaren beharra azpimarratu zuen. Alderdi komunistak, Reichen aholkuei jarraituz, langileriaren sexu-politika bideratzeko elkartea (Sexpol) sortu eta zuzendu zuen Alemanian. 1929an "Materialismo dialektikoa eta psikoanalisia" lana idatzi zuen, marxismoaren eta psikoanalisiaren arteko sintesia egiteko asmoz.

Reich arian-arian urrunduz joan zen Freuden teorietatik: guztiz zalantzan jarri zuen Ediporen konplexuaren unibertsaltasuna, eta eduki politiko argi bat eman zien bere teoriei. Reichen arabera, guztiz garrantzitsuak dira familia tradizionala eta haurtzaroko eta gaztaroko sexu-zapalkuntza gizarte kontserbadorea mantentzeko. Ikuspegi horren inguruan eman zituen hurrengo lanak: "Gazteen sexu-borroka" (1932), "Izaeraren azterketa" (1933), "Sexualitatea kultura-borrokan" (1933), "Faxismoaren masa-psikologia" (1933).

1933an Alemania utzi behar izan zuen, nazien agintaldia hasi zenean, eta Eskandinavia aldera jo zuen lehenik. 1934an nazioarteko psikoanalisi-elkartetik kanpo utzi zuten, bere ideiengatik, eta alderdi komunistatik egotzi zuten, estalinismoari eginiko kritikengatik. 1939an Estatu Batuetara joan zen, eta itxura berri bat eman zion bere obrari. Kosmogonian oinarrituriko erlijio-sistema bat irudikatu zuen, eta aurkitu bide zuen biologia-indar berri batez eritasun guztiak sendatzeko gai zela adierazi zuen. Arazoak izan zituen legetik kanpoko medikuntzan aritzeagatik, eta merkatuan jarri zituen orgon edo energia kosmikoz hornituriko sendagaiak debekatu zituzten. Bere obra guztia eraberritu zuen Estatu Batuetan: Adi, gizon txiki (1951-1952); Kristoren hilketa (1952-1953).

Politika eta sexualitatea[1][aldatu | aldatu iturburu kodea]

Reich militatante komunista izan zen, eta psikoanalisia eta marxismoa batzen saiatu zen.

1930. urtea baino lehen, sexuari buruz hitz egiteko sei aholkularitza-zentru zabaldu zituen langileentzat, mediku batek zuzenduta. Sexpol aholkularitza ematen zien pazienteei, eta honek arrakasta handia izan zuen. Gainera, Reich, pazienteen etxeetara hurbiltzen zen haien diagnostikoa hobetzeko asmoz eta klinika mugikorra ere jarri zuen martxan nerabeen sexualitatea, antikontzeptiboak, abortoa eta dibortzioa jendartean zabaltzeko.

Honen ondorioz, hainbat asoziaziok, komunitatek eta baita partidu komunistak haien elkarteetatik kanporatu egin zuten.

Aurretik aipatu bezala, bi urte igaro zituen Alemanian, hilabete batzuk Danimarkan eta Suedian eta bost urte eman zituen Norvegian, baina azkenik, Amerikako Estatu Batuetara joan zen 1939. urtean, eta bertan ezarri zen.

Orgona[aldatu | aldatu iturburu kodea]

1939. urtean, Orgon kontzeptua asmatu zuen, orgasmo eta organismo hitzak nahastuz, hauen arteko energia "kosmikoa" definitzeko asmoz.

Hori aurrera eramateko, "orgon akumuladoreak" eraikitzen hasi zen. Zurezko eta metalezko kaxak ziren, eta hauen barruan pazinteak sartzen zituen energia horren onurei probetxua ateratzeko. Orgonari lotuta beste proiektu batzuk ere atera zituen, eta hauek merkaturatu.

1940. urteko abenduaren 30ean, Reich Albert Einsteini idatzi zion bere aurkikuntza zientifikoa erakutsi nahian eta honi buruz hitz egiteko, eta egun batzuk geroago Einstein bisitatzera joan zen bere bizilekura. Einsteinek Reichen asmakuntzak frogatu zituen eta aldaketa batzuk egin zizkion. Hauek Reichi aurkeztu zizkion gutunen bidez, baina azkenean ez zuen bere teorietan parte hartu.[2]

Honen harira, Reichek iruzur salaketa bat jaso zuen, eta bere produktuak saltzeko debekua jarri zioten. Horregatik, urte batzuk geroago, atxilotu egin zuten.

Atxiloketa eta heriotza[aldatu | aldatu iturburu kodea]

Atxiloketa[aldatu | aldatu iturburu kodea]

1956. urtean, bere kotxean zihoan bitartean, atxilotu egin zuten, Amerikako Estatu Batuetako bi estatuen arteko mugan. Bi urteko kartzela zigorra jarri zioten. Gainera, kartzelan zegoen bitartean, epaileak berak idatzitako 6.000 kilo liburu erretzeko agindua eman zuen, oso pertsona polemikoa zelako garai hartan.

Heriotza[3][aldatu | aldatu iturburu kodea]

Urte bat geroago, 1957. urteo azaroaren 3an, baldintzapeko askatasuna lortu baino egun bat lehenago, goizeko zenbaketa egiten zuten bitartean bere zeldan aurkitu zuten hilda, goizeko 7etan. Dirudienez, urritasun kardiako bat izan zen heriotzaren eragilea, baina arazo hori diagnostikatuta ez zegoenez, heriotza misteriotsua izan zela diote.

Liburu aipagarriak[3][aldatu | aldatu iturburu kodea]

Erreferentziak[aldatu | aldatu iturburu kodea]

Wikimedia Commonsen badira fitxategi gehiago, gai hau dutenak: Wilhelm Reich Aldatu lotura Wikidatan
  1. (Gaztelaniaz)  20Minutos, «Reich, el sexólogo revolucionario», 20minutos.es - Últimas Noticias, https://www.20minutos.es/noticia/1989179/0/wilhelm-reich/psicologia/sexo/. Noiz kontsultatua: 2018-03-29  .
  2. (Gaztelaniaz)  Wilhelm Reich, 2018-03-13, https://es.wikipedia.org/w/index.php?title=Wilhelm_Reich&oldid=106209085. Noiz kontsultatua: 2018-03-29  .
  3. a b (Ingelesez)  Wilhelm Reich, 2018-03-17, https://en.wikipedia.org/w/index.php?title=Wilhelm_Reich&oldid=830831551. Noiz kontsultatua: 2018-03-29  .