Destrina

Wikipedia(e)tik
Hona jo: nabigazioa, Bilatu
Struktur von Poly-(1->4)-alpha-D-glucose (z. B. Dextrin)
Destrinaren egitura.

Destrina, pisu molekular baxua daukan, almidoiaren hidrolisiaren emaitza den gluzido oligosakaridoa da, eta C6H10O5 egitura du. Polisakaridoen formula orokor berdina dute, baina kate laburragoak izanik. Industrian erabiltzen den destrina patataren almidoitik ateratzen da. Destrinak uretan disolbagarriak dira, baina solido egoeran egon ohi dira, eta kolore zuri horixka izaten dute. Analitikoki, iodoaren bitartez detekta daiteke, honek kolore gorrixka bat hartzen duelako.

Uretan, ziklatu egiten dira, forma hexagonal bat hartuz; hauek, ziklodestrina moduan ezagutzen dira.

Destrinak asko erabiltzen dira industrian, bere toxizitate faltari eta prezio baxuari esker. Hainbat gauzatarako erabiltzen dira, hala nola, uretan disolbagarriak diren kola sortzeko (almidoia HCl-arekin nahastean, masa kolorge zaporegabe bat sortzen da oso itsasgarria dena (sobreen itsasgarria, zigiluena...)), elikagai batzuen eraldaketan agente loditzaile modura (paketeko zopak, saltsak, gozokiak, haurrentzako jatekoetan...), gantzen ordezko moduan murriztutako kaloriadun elikagaietan, eta hainbat farmakoren aglutinatzaile eran. Piroteknian ere erabiltzen da koloredun suak sortzeko eta zenbait leherkari. Ehungintzan, berriz, kotoizko ehunak sortzeko ere erabiltzen da destrina.

Bestalde, ziklodestrinak, kimika analitikoan ere erabiltzen dira, substantzia hidrofoboak banantzeko eta zenbait formulazio farmazeutikorako.

Elikagaien industrian inpaktu handia duen arren, ez dira destrinaren forma guztiak jangarriak, kasu ohietan destrina, digestioa errazteko zuntz dietetikokoen eranskin modura erabiltzen da.

Adibidez, maltodestrina, maltosa disakaridoaren eta destrinaren arteko loturaz sortzen den molekula, elikagai eranskin moduan erabiltzen den polisakarido erdi goxoa da. Arto almidoitik sortu ohi da eta hauts higroskopiko zuri moduan ikusten da. Maltodestrina hau, erraz digeritzen da, glukosa bezain azkar. Bere erabilpen arruntenetako bat garagardoa sortzeko da.

Garitik lortzen den destrinak gainera osasunerako onuragarriak diren efektu batzuk ditu: kolesterol maila jaisten laguntzen du, funtzio immunea eta mineralen absortzioa hobetu, eta baita gorputzeko gantz pilaketa murrizteko ere.  

Maltodestrina edozein almidoitik deriba daiteke, baina Europan gehien bat garagarretik eta garitik ateratzen da, baina AEBetan artotik. Hori garrantzitsua da zeliakoentzat, garitik edo garagarretik ateratako maltodestrinak gluten arrastoak izan baititzake.

Erreferentziak[aldatu | aldatu iturburu kodea]