Jaizkibel

Jaizkibel
Garaiera	547 m
Koordenatuak	43°22′01″N 01°49′15″W
Mendilerroa	Euskal Herriko arkua
Jaizkibel
Kanpo loturak	Mendikat

Jaizkibel Gipuzkoako mendi bat da, Oarsoaldea eta Bidaso Beherea eskualdeen artean kokatua. Pasaia (Pasai Donibane herria), Lezo eta Hondarribiko udalerriek banatzen dituzte mendi horren lurrak.

Jaizkibel kate tertziarioko mendi eraketa bat da. 547 m garai da, eta 2.423,6 ha luze-zabal.

Etimologia

Antza denez, mendiaren jatorrizko izena Olearso da, eta Jaizkibel berez mendiaren atzealdea da, eta izena haitz gibel hitzetatik dator: "haitzaren atzealdea", alegia. Olearso mendiaren aurrealdeko zati baten izena Allerru da.

Ezaugarriak

Behiak, Jaizkibelen.

Jaizkibel mendia Kantauri itsasoaren eta Pasaiako badia nahiz Txingudiren artean dago, kostaldean labar handiak osatuz. Jaizkibelgo lurren zati handi bat herri jabetza da; Hondarribia, Lezo eta Pasaiako udalena, hain zuzen. Natura 2000 Europako ekologia sarean garrantzizko tokia izendatua izan zen. Fauna eta florak espezie bereziak bizi dira bertan. Aipatzekoak dira: galzorian dagoen Armeria euskadiensis itsas-labarretako landarea, eta Euskal Herriko endemismoa eta oso arraroa den Thelypteris palustris garoaren populazio txikiak.

Jaizkibelgo superportuaren egitasmoa

Sakontzeko, irakurri: Pasaiako portuko kanpo ditxoa

Jaizkibelgo kostaldean, Pasaia aldean, superportua eraikitzeko proiektu bat dago; eta horretarako Jaizkibia elkartea sortu dute hainbat erakundek. Egitasmo hori, dena den, oso eztabaidatsua izaten ari da. Superportuaren aurkako herritar plataforma ere sortu da: Jaizkibel Bizirik

Jaizkibelgo ekosistemei eta eskualdeko beste zenbait baliori egingo litzaiekeen kalteez kezkaturik, superportuaren egitasmoaren aurka azaldu dira inguruko hainbat udal, hala nola Pasaiakoa, Lezokoa eta Oiartzungoa.

Eusko Jaurlaritzako Ingurumen Saileko arduradunek ere, beren kezka azaldu dute superportuaren aurrean, Jaizkibelgo kosta gehiena eta mendiko larre, txilardi eta basoak babestuta baitaude, dituzten balio ekologikoengatik. Gainera, Natura 2000 sarean dagoela kontuan izanez gero, ezingo litzateke kosta horretan ezer eraiki.

Azkenik, hainbat talde ekologista ere —Eguzki, Ekologistak Martxan, Greenpeace, WWF...— kezkatuta agertu dira, egitasmoa aurrera eramanez gero egingo diren kalte larriak direla kausa.

Ondarea

• Jaizkibelgo megalitoak: mendiaren ipar-ekialdearen erdian daude, gailur-lerroan eta itsasaldeko isurialdean, Hondarribiko udalerrian. Gaur egun, gune megalitiko horrek hiru trikuharri (Atxiñar, Jaizkibel III, eta Jaizkibel IV) eta piriniar harrespil-multzo bat (Jaizkibel II mairubaratza) biltzen ditu
• Guadalupeko baseliza
• San Henrike gotorlekua: Bigarren Karlistaldiaren garaikoa da, liberalek egina.
• Guadalupeko gotorlekua
• Jaizkibelgo dorreak

Ikus, gainera

• Natura 2000
• Gipuzkoako mendien zerrenda
• Hondarribi
• Lezo
• Pasaia
• Trapujale
• Pasaiako kanpo portua
• Jaizkibia

Kanpo loturak

• (Gaztelaniaz)Jaizkibel "Mendikat" webgunean