Edukira joan

Gennadi Rakitin

Wikipedia, Entziklopedia askea
Gennadi Rakitin
Datu biografikoak
Jaiotza, 1970(e)ko hamarkada
Sexuagizonezkoa
Jarduerapoeta
VK: rakitin75

Gennadi Rakitin[1] (errusieraz: Геннадий Ракитин; 1975[2]) fikziozko errusiar poeta da[3], Vladimir Putinen aurkako errusiar erbesteratu talde anonimo batek sortua. 2023aren erdialdean hasi ziren 1930eko eta 1940ko hamarkadetan Alemania nazian idatzitako poema propagandistak errusierara itzultzen eta VK sare sozialean kaleratzen Ukrainako inbasioa goraipatzeko poema abertzale gisa. Poema horiek arreta nabarmena erakarri zuten Errusian eta sari batzuk ere irabazi zituzten poesia lehiaketetan. 2024ko ekainean, itzultzaileek azkenean agerian utzi zuten Gennadi Rakitin ez zela inoiz existitu eta poemek jatorri nazia zutela[4].

Fikziozko biografiaren arabera, Rakitinek Moskuko Estatu Unibertsitateko filologia fakultatean ikasi zuen, irakasle lanetan dabil eskola batean[2][5], ezkonduta dago eta kristau ortodoxoa da[6]. Aktibistek diote Rakitinen erretratuak adimen artifiziala erabiliz sortu zituztela. Poetaren abizena Fiodor Dostoievskiren Karamazov anaiak eleberritik omen dator[7].

2023ko udatik 2024ko udara, «operazio militar berezia»-ren aldeko 18 poema argitaratu ziren VK sare sozialetan, Gennadi Rakitin izena erabiliz[8]. Hala ere, «Z poema» horiek Hirugarren Reicharen garaiko alemanezko poesia nazionalsozialistaren errusierazko itzulpenak ziren, Heinrich Anacker, Kurt Kölsch, Herybert Menzel, Eberhard Wolfgang Möller eta Baldur von Schirachen moduko egileenak. Haien poema eta abesti ikonikoak 2020ko hamarkadako Errusiarako egokitu zituzten, aldaketa kontzeptual txikiekin: esaterako, «Führer» hitza «lider» bihurtzeko aldatu zuten, eta «Sturmabteilungeko soldadu ezezagun bat», berriz, «Wagner Taldeko militar ezezagun bat»[8][3].

Proiektu horrek Errusiako politikariek estetika nazionalsozialistarekin eta propaganda militarrarekin duten kidetasuna agerian uztea zuen helburu[2]. Rakitinen ustezko idazlanak Estatu-Dumako ia 100 diputatuk partekatu zituzten sare sozialetan, baita Biltzar Federaleko 30 senatarik eta Kremlingo hanbat funtzionariok ere. Horrez gain, poemak Errusiako Tvardovski Poesia Abertzaleen Lehiaketako finalerdietara iritsi ziren[2][3] eta 2024ko ekainean «Rakitinek» sari bat irabazi zuen Errusiako Idazleen Batasunak antolatutako Errusiako Poesia Abertzaleen Lehiaketan[9].

2024ko ekainaren 28an, aktibistek euren lan metodoak publiko egin zituzten[6] eta esan zuen jada ez zutela indarrik «moralki nekagarria» den proiektuan jarraitzeko[4].

Erreferentziak[aldatu | aldatu iturburu kodea]

  1. ↑ 156. Alfabeto zirilikoz idatzitako izenak euskarara aldatzeko transkripzio-sistema. Gasteiz: Euskaltzaindia (argitaratze data: 2009-02-27) (Noiz kontsultatua: 2024-07-05).
  2. ↑ a b c d (Errusieraz) «"Идея в том, чтобы показать близость идеологий нацистов и Путина". Популярный Z-поэт Геннадий Ракитин оказался антивоенным перформансом» Настоящее время 2024-06-28 (Noiz kontsultatua: 2024-07-05).
  3. ↑ a b c (Alemanez) Holm, Kerstin. «Führerlob und NS-Nostalgie» FAZ 2024-07-01 (Noiz kontsultatua: 2024-07-05).
  4. ↑ a b (Ingelesez) Walker, Shaun. «Pranksters reveal odes to Putin were Russian translations of Nazi verse» The Guardian 2024-07-01 (Noiz kontsultatua: 2024-07-05).
  5. ↑ (Alemanez) Estis, Alexander. «Der macht die Gefühle» Süddeutsche Zeitung 2024-06-30 (Noiz kontsultatua: 2024-07-05).
  6. ↑ a b (Alemanez) Schmid, Ulrich M. «Ein Fake-Dichter macht Karriere: Die Kunstfigur Gennadi Rakitin schreibt nach Nazi-Vorbildern russische patriotische Gedichte» NZZ 2024-07-02 (Noiz kontsultatua: 2024-07-05).
  7. ↑ (Alemanez) «Patriotische russische Gedichte entpuppen sich als Nazi-Lyrik» NTV 2024-07-02 (Noiz kontsultatua: 2024-07-05).
  8. ↑ a b (Errusieraz) Асатрян, Арпине. «Популярный Z-поэт Ракитин оказался фейком, а его стихи — творчеством нацистов» RTVI 2024-06-29 (Noiz kontsultatua: 2024-07-05).
  9. ↑ (Ingelesez) «Anti-war activists dupe Russian officials with translations of Nazi poetry» Meduza 2024-06-28 (Noiz kontsultatua: 2024-07-05).

Kanpo estekak[aldatu | aldatu iturburu kodea]

"https://eu.wikipedia.org/w/index.php?title=Gennadi_Rakitin&oldid=9843727"(e)tik eskuratuta