Eusko Ikaskuntza
| Eusko Ikaskuntza | |
|---|---|
 Eusko Ikaskuntzaren egoitza nagusia Miramar jauregia da, 2012. urteraino |
|
| Goiburua: | Asmoz eta Jakitez |
| Sortze data: | 1916 |
| Egoitza nagusia: | Miramar jauregia Donostia, Gipuzkoa  Euskal Herria |
| Presidentea: | Jose Maria Muñoa |
| Webgunea : | http://www.eusko-ikaskuntza.org/ |
Eusko Ikaskuntza (gaztelaniaz Sociedad de Estudios Vascos) (EI-SEV) erakunde zientifiko-kulturala da. 1918an Araba, Bizkaia, Gipuzkoa eta Nafarroako Aldundiek sortu zuten "euskal kultura garatzeko baliabide egonkor eta iraunkor gisa". Asmoz eta Jakitez goiburua du.
Euskal Autonomia Erkidegoan, Nafarroako Foru Komunitatean eta Ipar Euskal Herrian "ezarpen ofiziala duen diziplina anitzeko zientzia erakunde bakarra" da Eusko Ikaskuntza. Eusko Ikaskuntzako bazkideak sail zientifikotan bildurik daude. Argitalpen nagusitzat Eusko Ikaskuntzen Nazioarteko Aldizkaria du, eta Manuel Lekuona Saria ematen du urtero.
Egoitza nagusia Donostian dago, eta ordezkaritzak ditu Baionan, Iruñean, Gasteizen eta Bilbon bai. 2011rako, bulego guztiak Zarautza eramateko asmoa du EIk, hirietako ordezkaritzak mantenduta.[1]
Eduki-taula |
[aldatu] Balioak eta helburuak
Bere balioak honakoak dira: Euskal Herria maitatzea, kultura askotarikoa eta solidarioa; zientzia eta kulturarekiko konpromisoa; aniztasun ideologikoa; elkarrekiko errespetua eta elkarrizketa; berrikuntza eta aurrerapena; euskara babestea.
Euskal Herriaren jakintza aztertu, ikertu eta zabaltzen du, haren aurrerapena bultzatzeko eta gizarte kohesioa eta partekaturiko nortasunak sustatzeko. Helburuak dira: euskal kulturaren balio tradizionalak finkatzea, kultura goratzea eta hedatzea, eta euskal kulturako eskualdeetan bizi diren pertsona guztien mesederako izango diren balio berriak sortzea.[2]
[aldatu] Historia
Eusko Ikaskuntza 1918an Oñatin (Gipuzkoa) egindako biltzar batean sortu zen. Arturo Campión ohorezko lehendakaria izan zen hastapenetan. Miguel Primo de Riveraren diktadurapean, zailtasunak eduki zituen erakundeak, eta Espainiako Gerra Zibilean etenarazi zizkioten jarduerak Hego Euskal Herrian.
Jose Migel Barandiaran (1976-1991), Gregorio Monreal (1992-1996), Juan Jose Goiriena de Gandarias (1996-2002), Javier Retegi (2002ko abendutik-2008ko abendura) eta Jose Maria Muñoa (2008ko abenduaren 26tik aurrera) izan dira erakundearen presidenteak.
2010eko martxoaren 30ean, Eusko Ikaskuntzak bere bildumako 350.000 dokumentuak Interneten argitaratu zituen, Auñamendi Eusko Entziklopedian, Bernardo Estornes Lasaren Enciclopedia Auñamendi ospetsuko 150.000 artikuluekin batera. Internet bidez dohainik kontsulta daiteke entziklopedia hori.[3]
[aldatu] Sail Zientifikoak
- Komunikabideak
- Gizarte Zientziak eta Ekonomia
- Zuzenbidea
- Hezkuntza
- Antropologia-Etnografia.
- Folklorea
- Osasun zientziak
- Natur Zientziak
- Arte Plastikoak eta Monumentalak
- Musika
- Zinematografia
- Hizkuntza eta Literatura
- Historiaurrea-Arkeologia
- Historia-Geografia
- Fisika, Kimika eta Matematikak
- Medikuntza Zientziak
[aldatu] Fundazioak
[aldatu] Akademiak
- Jakiunde, Zientzia, Arte eta Letren Akademia, 2007. urtean sortua
- Euskaltzaindia 1919. urtean sortu zen Eusko Ikaskuntzaren baitan, baina erakunde beregaina da gaur egunean.
[aldatu] Erreferentziak
- ↑ Eusko Ikaskuntza, Zarautzera.
- ↑ Eusko Ikaskuntza: «Nor garen», Eusko Ikaskuntzaren webgunean.
- ↑ Anakoz Amenabar: «Estornestarren uztaren jarraipena», Berria, 2010-03-31.
[aldatu] Kanpo loturak
- (Euskaraz) EIren webgunea
- (Gaztelaniaz)(Euskaraz) Besteak beste Eusko Ikaskuntzaren dokumentu funtsa biltzen duen Auñamendi Eusko Entziklopedia, Interneten dohainik kontsultagai.
- (Euskaraz) Eusko Ikaskuntzaren sorrerari buruzko erreportajea Argia astekarian
