Berlingo Konferentzia

Afrikaren banaketa, Berlingo Konferentziaren ondorioa.

Berlingo Konferentzia (alemanez Kongokonferenz) Afrikako eta batez ere Kongoko lurrei buruz Europako potentziek zituzten gatazka kolonialistak konpontzearren Alemaniako kantziler Bismarckek antolatutako konferentzia izan zen, 1885. urtekoa. Konferentzian Europako 12 estatu gehi AEBak eta Turkia bildu ziren. Hauek izan ziren konferentziaren helburu nagusiak:

• Diplomaziaren bidez Europako estatu kolonialisten arteko orekari eustea, eta inperialismoagatik Europako potentzien artean gerra sortzerik eragoztea.

• Alemaniarentzat inperio kolonial bat eratzea, Europatik kanpo lurrik ez izateak zeharo oztopatzen baitzion ekonomia hazkundea Alemaniari.

Ondorioak

Sakontzeko, irakurri: Afrikaren banaketa

Konferentzia helburuetatik askoz harago joan zen, eta ia Afrika osoa banatu zuten. Besteak beste, ondorio auek izan zituen Berlingo Konferentziak:

• Kongoren Estatu librea ontzat hartzea, Leopoldo II.a Belgikakoaren menpean. Geroago Belgikaren menpera pasatuko zen. Horrela, Kongo ibaiaren ingurua bigarren mailako potentzia baten esku geratu zen, eta potentzia handien arteko gatazkak saihestu ziren.

• Kongo eta Niger ibaietatik nabigatzeko askatasuna, potentziek monopolizatzeko aukera ezabatuta. Horrela, kontinentearen barrualdea ustiatzea ahalbidetu zuten.

• Kostaldea kontrolatzeak besterik gabe ez zuen ekarriko barruko lurrak ere kontrolatzea. Ondorioz, potentziek lasterketa bati ekin zioten, ahalik eta lur gehien konkistatzearren.

• Alemaniak inperio kolonial bat lortu zuen: Togo, Namibia eta Tanzania eskuratu zituen.

• Britainiar Inperioak bere menpeko lurraldeak sendetsi zituen, eta beste batzuk eskuratu. Ondorioz, menpeko lurrak zituen Afrikako mendebaldean (Nigeria, Sierra Leona eta abar); ekialdean (Egipto, Sudan, Kenya); eta hegoaldean (Hego-Afrika, Rodesia eta abar).

• Frantziak ere lur gehiago lortu eta lehengoak mantendu zituen: Magreb osoa, Sahara (Libia eta Egipto izan ezik), Sahelgo herri gehienak, Kamerun eta Madagaskar.

• Portugalek Mozambike eta Angola mantendu zituen bere menpe.

• Espainiak Mendebaldeko Sahara eta Ekuatore Ginea eskuratu zituen.

• Italiak Libia, Eritrea eta Somalia lortu zituen.

• Etiopia eta Liberia geratu ziren Afrikako estatu independente bakartzat.