Likona dorretxea

Likona dorretxea
Likona dorretxea. Irudi gehiago
Kokapena
Herrialdea	Euskal Herria
Probintzia	Bizkaia
Herria	Ondarroa
Koordenatuak	43°19′N 2°25′W
Arkitektura

Likona dorretxea Ondarroako Kale Handian dagoen Erdi Aroko eraikina da.

Deskribapena

Behe Ertaroko jauretxeen ezaugarriak agertzen ditu. Forma kubikoa eta itxura sendoa duen eraikin isolatua da. Garaiera handikoa da eta hamalau metrora iristen den ekialdetik, nahiz eta mendebaletik zortzi metrokoa baino ez izan, kokatuta dagoen lurra bera ere oso aldapatsua delako. Teilatuak bi aldetara isurtzen ditu urak. Hormen lodiera handiagoa da beheko aldean, gorantza egin ahala mehetuz baitoa. Kare harriz egindakoa da, eta gehien bat harlangaitzez landua, nahiz eta baogune inguruetan eta eskantzutan harlandua ere ikusten den. Itxura itsua du eta jatorrizkoan baogune gutxi izan zituen; fatxada guztietan ez dira berdin banatzen; fatxada nagusia da irekien agertzen dena. Dorrea ekialdera luzatzen da kanpoko aldetik bi horma sendoren bidez; hain zuzen, kuboaren beheko solairuaren jarraipen dira. Likona dorretxearen jatorrizko kofadurak aldatu egin dira eta beste batzuk egin dira, modernoak, etxeak zituen hiru solairuak bost izateko bihurtu direnean. Fatxada nagusian arku zorrotzeko bi sarrera daude; bata, beheko solairuan, eta bestea, sarrera nagusia den oraingo hirugarren solairuan, gainean bi armarri dituela. Azkenengo solairua, lehenago solairua nagusia zena, argi gehien zuena zan. Bertan leiho geminatu zorrotz bat, iparrera ematen duen arku eskartzanoko balkoi bat eta hegoaldera eta ekialdera joten duten bi baogune gotiko balkoidun ikus daitezke, baita gezileihoak ere. Solairu nagusiko garaieran mentsula batzuk ageri dira aurreko eta atzeko fatxadan. Likona Dorretxearen azken solairua ganbara egin berri bat da, eta gainean teilatua dauka. Barruan aldaketa gogorrak egin dira. Trenkadak asko ere asko aldatu dira, jatorrizko hiru solairuak bost bihurtu direlako.

Argazki galeria

• 
  Likona dorreko armarriak
• 
  Likona dorrea atzetik
• 
  Likona dorrea San Inazio kaletik ikusita

Erreferentziak

• Edukiaren zati bat monumentu hau sailkatutako kultura-ondasun izendatzen duen lege testutik hartu da. Izan ere, testua jabari publikokoa da eta ez du jabetza intelektualik, Espainiako Jabetza Intelektualaren Legeko 13. artikuluan xedatu denez (Espainiako Aldizkari Ofiziala, 97. zenbakia, 1996-04-22).

Kanpo estekak

• Kultura Ondasun izendapena EHAAn

• Datuak: Q8341843
• Multimedia: Likona dorretxea / Q8341843

Euskarazko Wikipedian bada atari bat, gai hau duena: Euskal Wikiatlasa