Alderdi politiko

Alderdi politikoa ideologiaz eta helburuz kideko diren pertsonek osatzen duten erakundea da. Alderdi politikoa erakunde politiko egonkor eta iraunkorra da, eta bere helburuak lortzeko, aginte politikoaz baliatzen da, alderdi anitzeko demokrazietan, hauteskundeetan lortutako ordezkarien bidez.

Alderdi politikoek sistema partitokratikoetan herritarren esku-hartze politikoa bideratzeko helburua dute. Alderdi bakoitzak bere ideologia du, ekonomia, gizartea, hezkuntza eta hainbat arlori buruzko bere iritzia eta interesak ditu.

Gaur ezagutzen diren moduan, alderdi politikoak XIX. mendean sortu ziren, herritarren esku-hartzea eta ordezkaritzako demokrazia garatzearekin batera.

Alderdi politikoak honako modu honetan jarduten dute agintea eskuratzeko:

Herritarrek hauteskundeetan agintean esku hartzeko ordezkariak bozkatzen dituzte.
Hauteskundeen aurretik kanpaina bat egiten da. Bertan, alderdi bakoitzak bere egitasmo politikoa azaltzen die herritarrei, agintea lortzen badute zer ekintza egingo dituzten agertzeko.
Ondoren, herritarrek alderdi politiko horien artean egokien irizten diotenari boza ematen diote.
Bozen arabera sortzen dira ordezkarien ganberak eta gehiengoa lortu duen alderdiak agintea eskuratzen du, bakarrik edo beste hautagaitza batzuekin bat eginez. Alderdiak, beraz, teorikoki aginte politikoaren eta biztanleen bitartekoak dira.^[1]