Leixuri Arrizabalaga

Wikipedia, Entziklopedia askea
Jump to navigation Jump to search
Leixuri Arrizabalaga
Leixuri Arrizabalaga 2018 (cropped).jpg
Gatikako alkatea

2015eko ekainaren 13a -
Escudo del Pais Vasco.svg
Eusko legebiltzarkidea

2012ko abenduaren 21a -
Barrutia: Bizkaia
zinegotzi

2003ko ekainaren 14a -
Bizitza
Izen osoa Leixuri Arrizabalaga Arruza
Jaiotza Gatika1981eko apirilaren 25a (39 urte)
Herrialdea  Bizkaia, Euskal Herria
Hezkuntza
Heziketa Deustuko Unibertsitatea
Hizkuntzak gaztelania
euskara
Ingelesa
Jarduerak
Jarduerak politikaria eta abokatua
Lantokia(k) Gatika eta Gasteiz
Sinesmenak eta ideologia
Alderdi politikoa Euzko Alderdi Jeltzalea

Leixuri Arrizabalaga Arruza (Gatika, Bizkaia, 1981eko apirilaren 25a) bizkaitar abokatu eta politikari jelkidea da. Zuzenbidean lizentziatua, gaztetatik sartu zen politikan Gatikako zinegotzi gisa. 2015etik aurrera Gatikako alkatea da, herriak izan duen lehen emakume alkatea.[1] 2012 urteaz geroztik eusko legebiltzarkidea izan da, X. eta XI. legealdietan.[2] 2013tik Emakunderen zuzendaritza kontseiluko kidea da.[3] 2016an EAJren BBBko kide bilakatu zen. 2020ko Eusko Legebiltzarrerako hauteskundeetan EAJren Bizkaiko zerrendaburua da.[4]

Lehen urteak[aldatu | aldatu iturburu kodea]

Familia jeltzale batean jaio zen. Kaxiano, amaren aldeko aitite, abeltzaina zen, eta Gatikako parrokiako sakristaua izan zen. Aita plentziarra eta ama gatikarra, azken hau Intxurtu dantza taldearen sortzaileetako bat izan zen 1960ko hamarkadan. 2001 urtean, ama zendu ondoren, Leixurik hartu zituen taldearen ardurak.[1] Oso txikitatik herriko bizitza soziokulturalean aktiboki parte hartu izan duː euskal dantzen taldean, abesbatzan, elizan zein jai-batzordean laguntzen ibilitakoa da.[5]

Gatikako Sertutxa auzoan hazi zen, Lugarrietan. Gatikako eskolan ikasi zuen. Zuzenbidean lizentziatu zen Deustuko Unibertsitatean, eta ondoren Praktika Juridiko eta Abokatutza masterra gauzatu zuen unibertsitate berean. Haren ibilbide profesionala abokatu bezala jardutera bideratu du, gehienbat genero-indarkeria eta familia-zuzenbideari loturiko kasuetaz arduratuz.[2]

Ibilbide politikoa[aldatu | aldatu iturburu kodea]

Ideologia politikoa betidanik oso zehaztua izanik, 18 urte zituela batu zen EAJra, EGIko kide gisa.[6] Jesus Mari Fullaondo Gatikako alkateak eta EAJren Uri Buru Batzarreko buruak egin zion eskaitza, orduan egiten zuen lan soziokultural guztia udaletik koordinatzea egokia zela iritziz.[5] 2003 urtean alderdikidetu eta Gatikako EAJren Uri Buru Batzarreko kide bilakatu zen.

Gatikako udala (2003-)[aldatu | aldatu iturburu kodea]

2003ko udal hauteskundeetan EAJren zerrendan laugarren postuan aurkeztu zen.[7] Alderdiak botoen %41,77a eta lau zinegotzi eskuratu zituen, beraz Leixuri zinegotzi bilakatu zen. Udal gobernuaren Gazteria, Kultura eta Kiroletako zinegotzia izan zen 2003-2007 legealdian. 2007-2011 legealdian ere zinegotzi izaten jarraitu zuen, bigarren alkateorde gisa, eta 2008an lehen alkateorde izendatua izan zen.[8]

2011ko udal hauteskundeetan EAJren zerrendan bigarren postuan aurkeztu zen, eta 2011-2015 legealdian zinegotzi izateaz gain alkateordea ere izan zen. 2015eko udal hauteskundeetan alderdikideek alkatetzarako hautagai izendatzea erabaki zuten. Hauteskundeak irabazi zituen botoen %44,54 eta lau zinegotzi eskuratuta, eta era horretan Gatikako lehen emakume alkatea bilakatu zen. Alkate zela Gatikako lehenengo Berdintasun Plana jarri zuen martxan, eta aurrekontu parte-hartzaileak bultzatu zituen.[9][10][11]

2019ko udal hauteskundeetan berriz ere EAJren hautagaia izan zen.[12] Botoen %52,75arekin bost zinegotzi lortu zituen EAJk eta beraz gehiengo osoa eskuratu zuen 9 zinegotziz osaturiko udal bilkuran. Emaitza hauek EAJk inoiz izandako emaitza onenak izan ziren 1986ko EAren zatiketaz geroztik, baita ordutik gehiengo osoa lortzen zuen lehen aldia ere.

Eusko Legebiltzarra (2012-)[aldatu | aldatu iturburu kodea]

X. legealdia (2012-2016)[aldatu | aldatu iturburu kodea]

2012ko Eusko Legebiltzarrerako hauteskundeetan EAJren Bizkaiko zerrendan 13. postuan aurkeztu zen.[13] Alderdiak 11 legebiltzarkide lortu zituen, baina Iñigo Urkullu lehendakari izendatu ondoren Andoni Ortuzar eta Estibaliz Hernaezek uko egin zioten legebiltzarkide izateari. Era horretan Leixuri Arrizabalaga 2012ko abenduan iritsi zen Legebiltzarrera, Estibaliz Hernaez ordezkatuz. Ordutik Euzko Abertzaleak taldeko legebiltzarkidea izan da, eta talde barruan berdintasun gaietarako arduraduna izan da. Bere lehen legealdian Hezkuntza Batzordeko eta Bateraezintasun Batzordeko kidea izan zen.[14] Era berean EITBren Kontrol Batzordeko kidea ere izan zen, Josune Albizuak ordezkatu zuen arte.

Horretaz gain Giza Eskubideen, Berdintasunaren eta Herritarren Partaidetzaren Batzordeko kidea eta gerora lehendakaria izan zen. Bestalde, legebiltzarraren ordezkaria izan zen Garapenerako Lankidetzaren Euskal Agentziaren Kontseilu Errektorean zein Emakundeko Zuzendaritza Kontseiluan.

2016ko urtarrilean EAJren Bizkai Buru Batzarreko kide bilakatu zen, historian lehen aldiz emakumeen gehiengoa zuen exekutiba osatuz.[15][16]

XI. legealdia (2016-2020)[aldatu | aldatu iturburu kodea]

2016ko Eusko Legebiltzarrerako hauteskundeetan EAJren Bizkaiko zerrendan seigarren tokian aurkeztu zen, eta legebiltzarkide kargua berritu zuen. Legealdi honetan Hezkuntza Batzordeko zein Giza Eskubide eta Berdintasun Batzordeko kide izaten jarraitu zuen, baita Emakundeko Zuzendaritza Kontseiluko ordezkaria izaten ere, eta Erreglamendu eta Gobernu Batzordeko kide egin zen. Gainera, EITBren Kontrol Batzordeko lehendakaria eta Diputazio Iraunkorreko kidea izan zen.[14]

Legealdi honetan ohiartzuna irabazi zuen, besteak beste, berdintasunaren arloan egindako hitzaldiengatik. 2019ko ekainean EAJren aldeko botoa defendatzea egokitu zitzaion 14/2012 legearen 3. artikuluaren aldaketan, pertsona transexualen eskubideen alde.[17]

XII. legealdia (2020-)[aldatu | aldatu iturburu kodea]

2020ko Eusko Legebiltzarrerako hauteskundeetan EAJren Bizkaiko zerrendaburua izatera igaro zen.

Bizitza pertsonala[aldatu | aldatu iturburu kodea]

Euskaraz, gaztelaniaz eta ingelesez daki.[14] Musika eta dantza gustuko ditu, eta irakurzale handia da. Txikitan Gatikako abesbatzan zein dantza taldean ibili zen, eta txistulari zein klarinete jole ohia da. 2001 urteaz geroztik Gatikako Intxurtu dantza taldearen arduraduna da. Seme eta alaba bikiak ditu.[12]

Erreferentziak[aldatu | aldatu iturburu kodea]

  1. a b Batzar, Euzkadi Buru. «Leixuri Arrizabalaga izan liteke Gatikako lehen alkate andrea» Bizkai Buru Batzarra . Noiz kontsultatua: 2020-03-08.
  2. a b Batzar, Euzkadi Buru. «Gure Legebiltzarkideak Leixuri Arrizabalaga» Eusko Legebiltzarra . Noiz kontsultatua: 2020-03-08.
  3. (Gaztelaniaz) DEIA. (2020). «El rostro de la renovación en Bizkaia» www.deia.eus (Iparragirre SA) . Noiz kontsultatua: 2020-03-09.
  4. EAJ-PNV. «EAJ-PNV - Iñigo Urkullu aho batez Lehendakarigai apirilaren 5eko Euskadiko Hauteskundeetarako» Euzkadi Buru Batzarra . Noiz kontsultatua: 2020-03-08.
  5. a b Virginia Woolf Basqueskola, EUDEL. (2017). Leixuri Arrizabalaga Arruza, Gatikako alkatea. Emakunde . Noiz kontsultatua: 2020-03-08.
  6. (Gaztelaniaz) «Leixuri Arrizabalaga Arruza EAJ-PNV» Osoigo . Noiz kontsultatua: 2020-03-09.
  7. Gernika-Lumo Eremuko hauteskunde Batzordea. (2003). (pdf) Martxoaren 31ko 374/2003 Errege Dekretuaren bidez deituriko udal hauteskundeetarako Bizkaian aurkeztutako hautagaitzak. BAO Bizkaiko Aldizkari Ofiziala.
  8. Gatikako Udala. (2008). (pdf) 2008ko uztailaren 30eko ohiko osoko bilkuraren akta. .
  9. (Gaztelaniaz) Zarate, Carlos. (2018). «Gatika impulsa su primer Plan de Igualdad» (pdf) Hemendik Txorierri-Mungialdea-U.Butroe (Iparragirre SA) 2018ko urtarrilaren 19a.
  10. (Gaztelaniaz) Hemendik. (2017). «El presupuesto de Gatika vuelve a ser participativo» (pdf) Hemendik Txorierri-Mungialdea-U.Butroe (Iparragirre) 2017ko abenduaren 15a.
  11. (Gaztelaniaz) Hemendik. (2018). «Gatika recaba las propuestas vecinales para los presupuestos» (pdf) Hemendik Txorierri-Mungialdea-U.Butroe (Iparragirre) 2018ko azaroaren 30a.
  12. a b EAJ-PNV. «Leixuri Arrizabalaga Arruza izango da, berriz ere, Gatikako EAJ-PNVk Alkatetzarako aurkeztuko duen hautagaia» Euzkadi Buru Batzarra . Noiz kontsultatua: 2020-03-08.
  13. Bizkaiko Lurralde Historikoko Hauteskunde Batzordea. (2012). (pdf) Bestelako Xedapenak - Euskal Herriko Agintaritzaren Aldizkaria. .
  14. a b c «Eusko Legebiltzarra - Legebiltzarkideak eta organoak - Norberaren fitxa» www.legebiltzarra.eus . Noiz kontsultatua: 2020-03-08.
  15. EAJ-PNV. «EAJ-PNV - Bizkaiko alderdikideek Itxaso Atutxa berrautatu dute emakume baino gizon gehiagok osatuko duten lehen Bizkai Buru Batzarraren buru gisa» Euzkadi Buru Batzarra . Noiz kontsultatua: 2020-03-08.
  16. «Se reúne por primera vez el nuevo Bizkai Buru Batzar, presidido por Itxaso Atutxa. Deia, Noticias de Bizkaia» web.archive.org 2016-01-27 . Noiz kontsultatua: 2020-03-08.
  17. «Leixuri Arrizabalaga: “Benetako berdintasuna emakume pentsiodunentzat ere iritsi behar da” -» Goiena.eus . Noiz kontsultatua: 2020-03-08.