Brujas

Brujas Brugge
Flandria
Bruggeko ubide bat
Izen ofiziala	Brugge
Estatua Eskualdea Probintzia	Belgika Flandria Mendebaldeko Flandria
Koordenatuak	51°13′00″N 03°14′00″E
Brujas Brugge
Eremua	138,4 km2
Biztanleria	116.741 bizt. (2010)
Dentsitatea	843,5 bizt./km²
http://www.brugge.be

Brujas edo Brugge (nederlanderaz Brugge, frantsesez Bruges) Belgikako ipar-mendebaldeko hiria da, Flandrian kokatua, Belgika osoko hiri jendetsuenetan seigarrena. Mendebaldeko Flandria probintziako hiriburua da, eta Reye ibaiaren ertzean dago, Ipar itsasotik 13 km-ra. Apezpikutegia du.

Banaketa administratiboa

Barrutiak

#	Izena	Azalera (km²)	Biztanleria (01/01/2008)
I	Brugge (barrutia) - Erdigunea - Kristus-Koning - Sint-Jozef - Sint-Pieters	1,01	37.164 19.822 4.480 5.349 7.513
II	Koolkerke	4,17	3.217
III	Sint-Andries	20,65	19.427
IV	Sint-Michiels	11,62	12.286
V	Assebroek	8,52	19.257
VI	Sint-Kruis	13,77	16.113
VII	Dudzele	21,92	2.578
VIII	Lissewege - Lissewege - Zeebrugge - Zwankendamme	11,44	7.058 2.470 3.865 723

Iturria: Brujasko udalaren webgunea

Historia

Bruggeko mapa, 1771-1778. urteetakoa.

837. urtean Balduin Burdinbeso Flandriako lehen kondeak gaztelu bat eraiki zuen zubi baten ondoan (brugge), eta bertan bizi izan ziren Flandriako konde aberats ahaltsuak XIV. mendera arte. Hain oparoa zen hiria, non bertako merkatari batek ordaindu baitzuen Joan Lurgabea Flandriako azken kondeari ezarri zioten bahitura-sari izugarri handia (400.000 urre-koroa). Brujas garrantzi handiko portu bihurtu zen; bertatik merkaturatzen ziren Flandriako oihalak, Ingalaterrako artilea, Eskandinaviako zura, Errusiako anbara, Espainiako ardoa eta Veneziako zeta, besteak beste. XIII. mendean, Hansaren kontsul-hiria bihurtu zen. Artea ere nabarmen garatu zen Brujasen.

1301. urtean barne-gatazka eta gerrez baliatu zen Filipe Ederra bertan sartzeko. Filipe II.aren garaian (1363-1404) erlijio-gerrek hiriaren gainbeheraren hasiera ekarri zuten. XVI. mendean, Karlos V.a germaniar enperadorearen garaian, hiri indartsua zen Brujas, baina oihalgintzaren gainbehera hasia zen, eta Brujasko hiriak galdu egin zuen arian-arian aurreko mendeetan irabazitako guztia. Gante, Ypres eta, ondoren, Anberes izango ziren Iparraldeko merkataritzan nagusituko ziren portuak. XX. mendean, Brujas hiri gartsu eta bizia bihurtu zen berriz ere.

Bizkaiko Kontsuletxea

Hiri zaharreko Biskayers Plaatz izeneko plazak gogora ekartzen du euskal herritarrek XIV. mendearen hasieratik aurrera bertan izan zuten kontsuletxe edo merkatari-etxea. Bizkaiko Kontsuletxeak Hego Euskal Herriko merkatarien negozioak bideratu zituen Brujasen, XVI. mendearen bukaeran, Espainiaren inperialismoaren aurka altxatu ziren flandriar abertzaleen eraginez utzi egin behar izan zuten arte (1577-1578).

Bizkaitarrek XVII. mendean kontsuletxea berriz ezartzeko egin zituzten ahaleginek ez zuten inolako fruiturik eman. XV. mendean Gaztelako koroak bere kontsuletxea zabaldu zuen Brujasen, Bizkaikoarekin zer ikusirik izan gabe, eta elkarren artean tirabira handiak izan ziren ondoko urteetan.

Ekonomia

Brujas abeltzaintza- eta nekazaritza-eskualde baten erdian dago, mende-hasieran zabaldu zen ubideari esker (Brujas eta itsasoa lotzen dituena, hain zuzen) nolabaiteko industria izan duena. Oso turismo-gune garrantzitsua da.

Demografia

Ondasun nabarmenak

Hiri zahar ikusgarria da, ubide ugarik zeharkatua. Monumentu asko gordetzen du: XIII. mendeko kanpandorrea, XIII-XVI. mendeetako azoka, XIII. mendeko museoa, XII. mendeko basilika, XIV. mendeko udaletxea, XIII. mendeko Andre Mariaren eliza, X. mendeko katedrala, eta abar.

Argazkiak

• 

  Bruggeko ubide bat.

• 

  Bruggeko parte zaharreko kale bat, atzean Andre Mariaren eliza duela.

• 

  Prinsenhof, dukeen jauregi izandakoa.

• 

  Huidenvettersplein.

• 

  Dweerstraat.

Kirolak

Club Brugge KV futbol kluba da hiriko kirol-elkarte nagusia, eta Cercle Brugge KSV da haren lehiakide tradizionala.

Kanpo-loturak

• (Nederlanderaz)(Frantsesez)Brujas/Bruggeko udal webgunea