Amikuze

Amikuze eskualdearen kokapena Nafarroa Beherean

Amikuze edo Amiküze Nafarroa Behereko eskualdea da, Biduze ibaiak eta bere ibaiadarrek eraturiko ibarra.

Geografia

Mugakideak

• Mendebaldean, ondoko ibarra den Arberoa eskualdea dago.
• Iparraldean Agramont eskualdea.
• Ekialdean Zuberoa.
• Hegoaldean Oztibarre eskualdea eta oraindik hegoalderago Garazi eskualdea.

Fisionomia

Hasieran, Oloroeko errekaren bestaldean dauden lur biarnesen oso antzekoak dira Amikuzeko lurrak. Biduzeren ibarra den eskualde hau laborantza lurrez, muino txikiz eta basoz osaturik dago. Abeltzaintzarako eta artoa hazteko lurrak ikus daitezke gehien bat.

Historia

Historikoki, Amikuze Beaumondarren lurraldea izan da (Lüküze-Altzümarta eta Garrüze herrietan zeuden kokaturik). Nahiz eta oso aberatsa izan zen Erdi Aroan, ezin zituen bere produktuak esportatu, Biduzeren beheko ibarra euren arerioen Agramondarren boterearen pean zegoelako.

Udalerriak

Ondoko udalerriek osatzen dute Amikuze eskualdea:

Aiziritze-Gamue-Zohazti Amendüze-Unaso Amorotze-Zokotze Arberatze-Zilhekoa Arboti-Zohota

Arrueta-Sarrikota Behauze Behaskane-Laphizketa Bithiriña Donapaleu (hiriburua)

Gabadi Garrüze Ilharre Labetze-Bizkai Larribarre-Sorhapürü

Lüküze-Altzümarta Martxueta Oragarre Ostankoa Uhartehiri