William Butler Yeats

William Butler Yeats
	; (1911) Irudi gehiago
Seanad Éireanngo kidea	; 1922ko irailaren 11 - 1928ko abenduaren 6a ; Barrutia: Nominated members of Seanad Éireann (en) ; Hautetsia: 1st Seanad (en)
Seanad Éireanngo kidea
Bizitza
Jaiotza	Sandymount, 1865eko ekainaren 13a
Herrialdea	Irlandako Estatu Askea
Lehen hizkuntza	ingelesa
Heriotza	Menton eta Roquebrune-Cap-Martin, 1939ko urtarrilaren 28a (73 urte)
Hobiratze lekua	Drumcliff
Familia
Aita	John Butler Yeats
Ama	Susan Pollexfen
Ezkontidea(k)	Georgie Hyde-Lees (en)
Bikotekidea(k)	ikusi Maud Gonne (en) ; Olivia Shakespear (en) ; Margot Ruddock (en) ;
Seme-alabak	ikusi Anne Yeats (mul) ; Michael Yeats (en) ;
Haurrideak	ikusi Elizabeth Yeats (en) ; Lily Yeats (en) ; Jack Butler Yeats; Robert Corbet Yeats (en) ; Jane Grace Yeats (en) ;
Hezkuntza
Heziketa	National College of Art and Design (en) ; The High School, Dublin (en)
Hizkuntzak	ingelesa
Irakaslea(k)	William Blake
Jarduerak
Jarduerak	poeta, antzerkigilea, idazlea, politikaria, mistikoa eta astrologoa
Jasotako sariak	ikusi Literaturako Nobel Saria (1923) ; Goethe saria (1934) ; Fellow of the Royal Society of Literature ; Doctor of Letters : Dublingo Unibertsitatea ;
Influentziak	William Blake, Friedrich Nietzsche, Edmund Spenser, Percy Bysshe Shelley, Oscar Wilde, William Morris, Emmanuel Swedenborg, Jakob Böhme eta Isabella Augusta Gregory
Kidetza	Golden Dawn Orden Hermetikoa; Errege Literatura Elkartea
Mugimendua	sinbolismoa

William Butler Yeats (Dublin, 1865eko ekainaren 13a - † Roquebrune-Cap-Martin, Frantzia, 1939ko urtarrilaren 28a) irlandar poeta eta antzerkigile bat izan zen. Mistizismoak inguraturik, Yeats irlandar literatur pizkundeako egilerik esanguratsuenetarikoa izan da eta Dublin hiriko Abbey Theatre antzokiaren sortzaileetako bat. Senatari gisa ere jardun zen.

Literaturako Nobel Saria jaso zuen 1923an.

Biografia

Gaztaroa

William Butler Yeats 1865an Irlandako Dublin hirian jaio zen. Familiako jatorriaren arabera, tradizio anglo-irlandar protestantekoa zen - Irlandako biztanle baserritar eta nekazari katoliko gehienen artean gutxiengo lurjabe protestante klase sozial indartsua zen hura-, baina uko egin zion jatorri horri; baina katolikoa ere ez zen, eta hortaz, ez zuen leku egokirik aurkitzen ez tradizio batean ez bestean. Maite zuen XVIII. mendean anglo-irlandar tradizio protestanteak izan zuen oparotasuna, ingeles literaturari idazle handiak eman zizkiona (Jonathan Swift, Edmund Burke, George Berkeley); tradizio hori ordea behera etorria zen, eta higikunde berri bat ari zen nagusitzen, tradizio katolikoaren aldekoa, zenbaitetan ingelesez ezik gaeleraz adierazia. Bere arte estiloarekin adosten zen neurrian, bat egin zuen Yeatsek irlandar askatasunaren aldeko higikundearekin, baina sarritan izan zituen arazoak britainiar gobernutik erabat banatzearen aldeko zirkulu abertzale irlandarretan. Bi komunitateetako batean bere lekua aurkitu baino lehen, bere burua definitu behar izan zuen Yeatsek. Poesian egin zituen bere herriarekiko harremana definitzeko saioak; Yeatsek tradizio katolikoa eta protestantea baino sakonagoa zen beste batean aurkitu zuen horretarako bidea, Irlanda ezkutu baten tradizioan. Tradizio horren arrastoak antzinako usadio, sineste eta leku santuetan aurkitu zituen, eta paganoa zen kristaua baino areago. Yeatsen hasierako idatzi asko sakoneko Irlanda hori agertarazteko saioak dira. 1867an, Yeatsek bi urte eskas zituela, aitaren lana zela-eta, Londresa aldatu zen familia. 1880an itzuli ziren Dublinera, eta han joan zen institutura. Oporrak osabarekin ematen zituen Sligoko konderrian, eta huraxe izango zen bere poema askoren gertalekua.

1883an Dublingo Arte Eskola Metropolitanoan aritu zen ikasten, eta hantxe ezagutu zituen garai hartako poeta eta artista dublindar nagusiak.

Mistizismoa eta nazionalismoa

Yeatsen lehen lanak, bi poema labur, Dublin University Review aldizkarian agertu ziren 1885. urtean. Urte hartan bertan, okultismoaren inguruko talde baten eraketan parte hartu zuen, "Dublin Hermetic Society".

Familia berriz ere Londres hirira joan zenean, Elkarte Teosofikoko kide egin zen Yeats, eta haren sortzaile zen Mme Blavatskyren etxera joan ohi zen ; une hartan indar handia hartzen ari zen nazioarteko higikundea zen, jakintza eta anaitasuna mistizismoaren bidez bilatzen zuena. Magiak beti erakarri zuen Yeats, eguneroko usadioetatik urruntzen den bizitza irudimenezkoa baita. Zientzia ez zuen batere maite, ezta zientziaren garaia ere. Erlijio epel eta automatiko bat ere ez zuen nahi, eta haren kontra azaldu zuen "erlijio berri bat, kasik tradizio poetikoko eliza hutsezin bat". Yeatsen sinbologia, une horretan, aski nahasia da ; liburu batean esplikatuko zuen geroago, A Vision ("Ikuspen bat") There The Sphere Flowering of rose from cross Union of opposites Europasia Terrestrian paradise Coupling of eternity and time Profane perfection Innisfree/Byzuntium (Nature/Art) ("Hor Esfera Arrosa gurutzetik loratua Kontrakoak bat eginda Europasia Paradisu lurtarra Betikotasun eta denboraren parekatzea Perfekzio profanoa Innisfree/Bizantzio (Izadia/Artea)"). Sinbologia hau garatuko zuen urte haietan ezagutu zuen William Blakeren lana, eta haren Iragarpenezko liburuak eragin handia izan zuen bere poesian ; era berean, beste tradizioekin jarri zuen harremanetan: platonikoa, neoplatonikoa, Emanuel Swedenborg suediar mistikoarena, alkimia. Yeatsen hitzetan, Blake da "Arte handi ororen eta sinboloaren arteko ezkontza banaezina frogatu duen garai modernoetako lehen idazlea".

Yeatsen lehen poemak, The Wanderings of Oisin, and Other Poems liburuan bilduak (1889, "Oisinen ibilaldiak eta hestepoemak"), esteta baten lana dira, beti ederrak baina sarritan bitxiak. Irlandar mitologiak inspiraturiko obra da, eta oso agerikoa du erromantikoen eragina, Samuel Taylor Coleridge eta Mary Shelley poetena bereziki, eta prerrafaelistena.

1889an Maud Gonne ezagutu zuen, irlandar emakume eder indartsua. Une hartantxe, berak idatzi zuen bezala, "hasi ziren nire arazoak". Yeats berehala maitemindu zen, baina ez neska, poeta miresten zuen arren. Irlandako borroka abertzalean zegoen Maud buru-belarri sartua. Zenbaiten ustez, partez haren balioaz sinetsita zegoelako hasi zen Yeats borroka horretan, baina gehiago Maudenganako maitasunagatik. Charles Stewart Parnell irlandar buruzagi eztabaidatua hil zenean (1891), irlandar politikak galdua zuela bere esanahia iruditu zitzaion Yeatsi. Politikak utzitako hutsunea literaturarekin eta artearekin betetzen saiatu zen : drama, poesia eta elezaharra. Irlandako usadio zaharrak berpizteko asmoz idatzi zuen beraz, The Celtic Twilight (1893, "Ilunabar zelta") saiakera liburua, baina oso motel ibili zen, harik eta 1896an Augusta Lady Gregory ezagutu arte, denborarekin antzerti idazlea eta Yeatsen lagun mina izango zen aristokrata. Lady Gregory istorio zaharrak biltzen ari zen, Irlandako mendebaldeko antzinako folklorea. Folklore hura bat zetorren Yeatsen gurtza zaharren mirespenarekin, kristautasunak erabat ezabatu zituen erritu paganoen zaletasunarekin; ondasun horren arrastoak baserritarren bizimoduan sumatzen zituen Yeatsek. Hala, saiatu zen irlandar folklorea goi mailako estilo zorrotz batez lantzen, poesia orijinal bat sortu nahian, eta aldi berean bere izakera propioaren bila. Helburu horren baliokide politikoa baserritarren eta aristokraziaren arteko lotura zen: baserritarra bere bizikizunetarako behar zuen, aristokrazia estilorako. Lotura horrek bazterrean uzten zuen erdi mailako klasea, hiriaren eta diruaren emaitza zen hura, Yeats gutxiesten hasia zena. 1897tik aurrera, Lady Gregoryren etxean eman zituen udak, Coole Park-en, Yeatsentzat graziazko mundu bat bihurtu zen hartan.

Poeta heldua eta senataria

1899an ezkontzeko eskaera egin zion Maud Gonneri, haina ezezkoa jaso zuen; lau urte geroago, hera bezala Irlandaren alde borrokatzen zen soldadu batekin ezkondu zen Maud; hura izan zen 1916ko Pazkoko matxinadaren ondoren britainiar gobernuak hil zuenetako bat. Bitarte horretan, betebetean zebilen Yeats drama eta literatura lantzen, guztiz sinetsita poemak eta antzerti lanak gai zirela irlandar nazio osoa aldatuko zuten batasuna ekartzeko. Horren guztiaren emaitza Dublingo Abbey Theatre-ren sorrera izan zen. Lehen emanaldia 1904an egin zuen eta ondorengo urteetan Abbey Theatre antzokiaren kudeaketa lanetan jardun zuen Yeatsek.

Eztabaida garaia zen. Yeatsen antzerti lanak maiz salatzen zituzten erlijiogabeak, katolikotasunaren kontrakoak, eta hortaz, irlandarren kontrakoak, zirelakoan. Eztabaidak izan zituen aktore, produktore eta egunkariekin. Yeatsen Irlanda paganoaren mirespena irain bat bezala ikusten zuten bere garaikideek, katolikoek bezala baita protestanteek ere, modernotasuna ukatzen baitzuen. Pixkana, jende arruntarengandik aparte geratzen hasi zen. Abbey Theatre antzokia bera, hango emaitzak, gauza baldarra iruditzen zitzaizkion Yeatsi. Antzerki berri baten bila hasi zen, masaren desiraren araberakoa izango ez zen antzerki baten bila. Laster aurkituko zuen. 1913an Ezra Pound amerikar poetarekin aritu zen lanean: Pound no japoniar antzerkien ingelesezko itzulpenak ari zen argitaratzen, eta haietxetan aurkitu zuen Yeatsek bila zebilena, hein batean giro aristokratiko batean sortuak zirelako, eta ereduak gortetik hartzen zituztelako. Bere Four Plays for Dancers (1921, "Bost antzerti lan dantzarientzat") da molde berri horren emaitza : drama laburren sail bat da, antzerki batean bezala egongela batean joka daitekeena; drama mota berria, hitz, mozorro, dantza, musika eta keinu sinbolikoko -ez imitaziozko- harmonia.

Hori guztia ordea ez zen mantentzen erraza Irlandako eguneroko bizimoduan.

1913an izugarrizko istiluak izan ziren Dublingo hiriari dirudun batek egin zion koadro inpresionista batzuen oparia zelaeta, Dublingo udalak ez baitzuen hartu nahi izan hasieran. Yeatsek ere parte hartu zuen eztabaidan, bere ustez ekintza bikain bat, keinu aristokratikoa, arbuiatu zuelako Dublingo arninkeriak. Eztabaida hark, oso mingarria izan baitzen, aldi berri bat ekarri zuen poetaren eta bere herriaren arteko harremanetan. Italia ezagutu zuelarik, Berpizkundeko Italia dotore eta aberatsaren oroimena dario 1913tik aurrera idatzi zuen poesiari.

1917an Yeatsek Mauden alaba Iseult-i ezkontza hitza eskatu zion; hark ere ezezkoa eman ziolarik, urte hartan bertan George Hyde-Leesekin ezkondu zen. 1922an, Irlandako Estatu Askea sortu zenean, Dáil Éireann senatu berriko kide izendatu zuten Yeats, eta sei urte egin zituen kargu hartan. Hurrengo urtean Literaturako Nobel Saria eman zioten. Ospetsua zen orain, nagusietako bat poeta modernoen artean. Berak lanean jarraitzen zuen, irudimenaren, historiaren eta ezkutuaren arteko harremana bilatu nahian. Bilaketa hura liburu handi batean aurkeztu nahi zuen, eta, hala, 1925ean A Vision ("Ikuspen Bat") idazlana argitaratu zen.

Zenbait urtez jarraitu zuen lantzen ordea, eta azken bertsioa ez zen 1937 arte atera. Bitartean, gero eta indartsuagoa zen Yeatsen poesia: The Tower (1928, "Dorrea") artista bete baten lana da; bizitza oso bateko esperientziak formaren perfekzioa lortzen du bertan. Ondorengo lana ere bikaina da, The Winding Stair (1929, "Izar birakaria").

Azkeneko urteetan, estilo aristokratikoaren zaletasunak ideologia autoritariora bultzatu zuen: Benito Mussolini italiar diktadore faxistaren zale izan zen, haren sendotasun eta argitasun autoritarioagatik. Urte gogorrak izan ziren : osasunez ez zebilen ondo, eta bidaian ibili beharra zeukan Irlandako neguetatik ihes egiteko. 1930. urteko bortizkeriak gerra ekarriko zuela, eta ideia horrek zekarkion izuarekin eta aldi berean erakarmenarekin bizi izan zen.

1936an argitaratu zen Oxford Book of Modern Verse 1892-1935 ("Poesia modernoko Oxfordeko liburua 1892-1935"), eta 1938an azken antzerki lana, 7-be Herne s Egg ("Herneren arrautza"), denetan zaratatsuena.

Handik urte betera, 1939ko urtarrilaren 28an, Frantziako Roquebrune-Cap-Martin hirian hil zen.

Lanak

1886 - Mosada
1888 - Fairy and Folk Tales of the Irish Peasantry
1889 - The Wanderings of Oisin and Other Poems
1891 - Representative Irish Tales
1891 - John Sherman and Dhoya
1892 - Irish Faerie Tales
1892 - The Countess Kathleen and Various Legends and Lyrics
1893 - The Celtic Twilight
1894 - The Land of Heart's Desire
1895 - Poems
1897 - The Secret Rose
1899 - The Wind Among the Reeds
1900 - The Shadowy Waters
1902 - Cathleen ni Houlihan
1903 - Ideas of Good and Evil
1903 - In the Seven Woods
1907 - Discoveries
1910 - The Green Helmet and Other Poems
1912 - The Cutting of an Agate
1913 - Poems Written in Discouragement
1914 - Responsibilities
1916 - Reveries Over Childhood and Youth
1917 - The Wild Swans at Coole
1918 - Per Amica Silentia Lunae
1921 - Michael Robartes and the Dancer
1921 - Four Plays for Dancers
1921 - Four Years
1924 - The Cat and the Moon
1925 - A Vision
1926 - Estrangement
1926 - Autobiographies
1927 - October Blast
1928 - The Tower
1929 - The Winding Stair
1933 - The Winding Stair and Other Poems
1934 - Collected Plays
1935 - A Full Moon in March
1938 - New Poems
1939 - Last Poems and Two Plays (hil ondoren)
1939 - On the Boiler(hil ondoren)

Olerkiak

Down By The Salley Gardens

Erreferentziak

Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2012-7-6 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

Ikus, gainera

Kanpo estekak

William Butler Yeats poeta eta antzerkigilearen idazlanak irakurgai. Guttenberg proiektua (Ingelesez)
New Yorkeko W.B. Yeats Elkartearen webgunea (Ingelesez)

Datuak: Q40213
Multimedia: William Butler Yeats / Q40213

i e a Literaturako Nobel Saridunak
1901–1925	Sully Prudhomme (1901) • Theodor Mommsen (1902) • Bjørnstjerne Bjørnson (1903) • Frédéric Mistral / José Echegaray (1904) • Henryk Sienkiewicz (1905) • Giosuè Carducci (1906) • Rudyard Kipling (1907) • Rudolf Eucken (1908) • Selma Lagerlöf (1909) • Paul Heyse (1910) • Maurice Maeterlinck (1911) • Gerhart Hauptmann (1912) • Rabindranath Tagore (1913) • Romain Rolland (1915) • Verner von Heidenstam (1916) • Karl Gjellerup / Henrik Pontoppidan (1917) • Carl Spitteler (1919) • Knut Hamsun (1920) • Anatole France (1921) • Jacinto Benavente (1922)• W. B. Yeats (1923) • Władysław Reymont (1924) • George Bernard Shaw (1925)
1926–1950	Grazia Deledda (1926) • Henri Bergson (1927) • Sigrid Undset (1928) • Thomas Mann (1929) • Sinclair Lewis (1930) • Erik Axel Karlfeldt (1931) • John Galsworthy (1932) • Ivan Bunin (1933) • Luigi Pirandello (1934) • Eugene O'Neill (1936) • Roger Martin du Gard (1937) • Pearl S. Buck (1938) • Frans Eemil Sillanpää (1939) • Johannes Vilhelm Jensen (1944) • Gabriela Mistral (1945) • Hermann Hesse (1946) • André Gide (1947) • T. S. Eliot (1948) • William Faulkner (1949) • Bertrand Russell (1950)
1951–1975	Pär Lagerkvist (1951) • François Mauriac (1952) • Winston Churchill (1953) • Ernest Hemingway (1954) • Halldór Laxness (1955) • Juan Ramón Jiménez (1956) • Albert Camus (1957) • Boris Pasternak (1958) • Salvatore Quasimodo (1959) • Saint-John Perse (1960) • Ivo Andritx (1961) • John Steinbeck (1962) • Giorgos Seferis (1963) • Jean-Paul Sartre (sariari uko egin zion) (1964) • Mikhail Xolokhov (1965) • Shmuel Yosef Agnon / Nelly Sachs (1966) • Miguel Ángel Asturias (1967) • Yasunari Kawabata (1968) • Samuel Beckett (1969) • Aleksandr Solzhenitsin (1970) • Pablo Neruda (1971) • Heinrich Böll (1972) • Patrick White (1973) • Eyvind Johnson / Harry Martinson (1974) • Eugenio Montale (1975)
1976–2000	Saul Bellow (1976) • Vicente Aleixandre (1977) • Isaac Bashevis Singer (1978) • Odysseas Elytis (1979) • Czesław Miłosz (1980) • Elias Canetti (1981) • Gabriel García Márquez (1982) • William Golding (1983) • Jaroslav Seifert (1984) • Claude Simon (1985) • Wole Soyinka (1986) • Joseph Brodsky (1987) • Nagib Mahfuz (1988) • Camilo José Cela (1989) • Octavio Paz (1990) • Nadine Gordimer (1991) • Derek Walcott (1992) • Toni Morrison (1993)• Kenzaburō Ōe (1994) • Seamus Heaney (1995) • Wisława Szymborska (1996) • Dario Fo (1997) • José Saramago (1998)• Günter Grass (1999) • Gao Xingjian (2000)
2001–egun	V. S. Naipaul (2001) • Imre Kertész (2002) • J. M. Coetzee (2003) • Elfriede Jelinek (2004) • Harold Pinter (2005) • Orhan Pamuk (2006) Doris Lessing (2007) • J. M. G. Le Clézio (2008) • Herta Müller (2009) • Mario Vargas Llosa (2010) • Tomas Tranströmer (2011) Mo Yan (2012) • Alice Munro (2013) • Patrick Modiano (2014) • Svetlana Aleksievitx (2015) • Bob Dylan (2016) • Kazuo Ishiguro (2017) • Olga Tokarczuk (2018) • Peter Handke (2019) • Louise Glück (2020) • Abdulrazak Gurnah (2021) • Annie Ernaux (2022) • Jon Fosse (2023) • Han Kang (2024)
1: Ez zuten eman