Ezkontza

Artikulu hau erakundeari buruzkoa da; ospakizuna gaitzat duena beste hau da: Eztei

Jan van Eycken Arnolfini senar-emaztearen erretratua.

Ezkontza bi pertsonak elkarbizitza egiteko asmoz hitzarmenez egindako elkartzea da, lege zibilak, erlijiosoak edo ohiturak arautua izan daitekeena; erlijio katolikoan zazpi sakramentuetako bat dena. Instituzio honek sortzen dituen pertsonen arteko harremanak, gehienetan barrukoak eta sexualak, kulturaren arabera aldatzen dira. Normalean, elkartzea era formal batean ospatzeko ezteiak izeneko zeremonia egiten dute.

Ezkontzeko arrazoiak ezkongaiaren arabera aldatzen dira, hurrengoetako bat edo gehiago izanik: legalak, sozialak, emozionalak, ekonomikoak, espiritualak edota erlijiosoak.

Ezkontzaren jarduerak kulturen arabera aldatzen dira, nahiz eta gehienetan gizon eta emakume baten arteko ezkontza onartu. Hala ere, badaude beste ohiturak onartzen dituztenak: sexu-bereko ezkontzak, bikote bakarra (monogamia), senar bat eta emazte asko (poligamia) edo emazte bat eta senar asko (poliandria). Gizarte gehienek ezkontzetan murrizte batzuk arautzen dituzte: ezkongaien adina, ahaidetasun-maila edo talde sozial edo erlijioso ezberdinetakoa izatea.

Ezkontzak betebehar juridiko eta sozialak sortzen dizkie ezkongaiei, batzuetan bere familiaren zenbait kidetara zabaltzen direnak. Kultura gehienetan ezkontza aintzatesten duten moduan, bere urratzea (adulterioa) ere aintzatesten dute. Zenbait kulturatan, hitzarmen hau haustezina bada ere, badaude bere banantzea (dibortzioa) onartzen dutenak.

Ikus, gainera

• Eztei