Orio

Orio
Gipuzkoa, Euskal Herria
Orioko portua eta herrigunea. 2011ko otsailaren 3a.
Fitxategi:Ez
Administrazioa
Estatua	Espainia
Erkidegoa	Euskal Autonomia Erkidegoa
Lurraldea	Gipuzkoa
Eskualdea	Urola Kosta
Izen ofiziala	Orio
Alkatea	Anuska Esnal Oliden
Posta kodea	20810
INE kodea	20061
Herritarra	oriotar
Ezizena	ijitok
Kokapena
Koordenatuak	43°16′34″N 2°07′38″W
Azalera	9.81
Garaiera	8
Distantzia	17 km Donostiara
Demografia
Biztanleria	6.125 (2023) 63 (2022)
3.002 (%49)   (%49,3) 3.020
Dentsitatea	624,36 bizt/km²
Hazkundea (2003-2013)	% 19,96
Zahartze tasa	% 18,52
Ugalkortasun tasa	‰ 60,58
Ekonomia
Jarduera tasa	% 78,37 (2011)
Genero desoreka	% 3,29 (2011)
Langabezia erregistratua	% 8,71 (2013)
Euskara
Euskaldunak	% 76,7 (2010)
Etxeko erabilera	% 66.07 (2016)
Datu gehigarriak
Sorrera	1329ko uztailaren 12an
Webgunea	http://www.oriora.com/

Orio (bertakoen hizkeran Oriyo) Gipuzkoako iparraldearen erdialdean dagoen kostaldeko udalerri bat da, Beterri eskualdekoa. 5.901 biztanle zituen 2016. urtean.

izena

Orioko erdigunea eta portuaren ikuspegia.

Baliteke Orio herriaren izena bertan amaiera duen Oria ibaiaren izenaren moldaketa izatea. Herria Erdi Aroan sortu zen, Noble y Leal Villarreal de San Nicolás de Bari de Orio izenarekin, baina izen luze hura galduz joan zen, eta herria Orio izatera pasatu zen. Bertako ahozko euskaran, Oriyo deritzo.

Ibaiaren izenaren etimologia ez da batere argia. Latineko aurea (urrezkoa, urrekara) hitzetik edo euskararen hori (kolorea) hitzetik datorrela uste da. Uste horren ondorioz, herriko kale izenen xaflak horiz daude jarrita, herriko denda eta jatetxe askoren errotuluak horiak dira, toldo hori ugari dago herrian zehar... Orobat, horia da arraunketarako zaletasun handia duen herri horretako traineruaren eta arraunlarien kolorea.

Orioko biztanleei oriotar deitzen zaie.

Geografia

Orio Gipuzkoako kostan dago, Beterri izeneko eskualdean. Herria Oria ibaiaren azken meandroaren ondoan dago kokatuta, horren bokalearen (ibai ahoaren) aurretik, Kantauri itsasoan.

Orioko udalerriko lurraldeak 9,81 km² ditu. Oria ibaiak xedatzen ditu Orioren eta Aiaren arteko hegoaldeko eta mendebaldeko mugak,Orio ibaiaren eskuinetara eta Aia ,berriz, ezkerretara kokatuz. Bitxikeria da Oria ibaiaren bi ertzak Orioren jurisdikzioaren pean daudela, nahiz eta ibaiak bi udalerrien arteko mugak ezarri, tradizioz Oriok kontrolatu baitu ibaia.

Iparraldetik Kantauri itsasoak ezartzen du muga, Orioren kosta zati gehiena itsaslabarrez osatuta dagoela. Hain zuzen ere, eremuaren kosta apal bakarra, ibaiaren eskuineko ertzean dago, Antilla hondartzan. Udalerriaren ipar-ekialdea Talaimendi mendiak osatzen du, Kukuarri (362m) gailur duela.

Orio, Oriaren itsasadarra eta Orioko zubiaren ikuspegi panoramikoa.

Ingurune naturala eta klima

Orio herrian balio handiko ekosistemak eta inguruak daude oraindik. Balio handiena Oriaren itsasadarra delakoan dugu, izan ere, dituen padurak eta ibarrak Gipuzkoakoen artean baliotsuenetarikoak dira oraindik ere. Inguru hau Natura 2000 sarean dago. Herriaren gainean, bestetik, Kukuarri menditxoa dago; horren alde interesgarrienak itsaso aldera ematen du.

Inguruko herri guztien antzera, Oriok klima epela du, eta euritsua, ia urte osoan.

Udalerri mugakideak

Orio eta Donostiaren (probintziako hiriburua) arteko distantzia 17 kilometrokoa da. Zarautz 6,5 kilometrora dago. Herrira joateko bide nagusia N-634 errepidea da, herria Usurbilekin eta Aiarekin lotzen duena. A-8 (Bilbo-Donostia) autobideak udalerria zeharkatzen du eta sarrera-irteerak Donostia aldera ditu.

Donostiak eta Usurbilek mugatzen dute Orio ekialdetik, Aiak hegoaldetik eta mendebaldetik eta Bizkaiko golkoak iparraldetik.

Historia

Portua oso baliagarria izan zitekeela aintzat hartuta, Joan II.a Gaztelakoak Orioko lurraldea Donostiatik banandu eta hiribildu berriari izen hanpurus hau eman zion: Villa Real de San Nicolás de Orio.

1379an ekin zion Orioko udalerriak, gorde antzean, adin‑nagusitasunaren ibilbideari. Mende bat geroago, Errege Katolikoengandik honako eskubidea jaso zuten: bidaiariak, zaldiak eta salerosgaiak itsasadarraren ertz batetik bestera eramateko monopolioa. Zerbitzu horien truke, tarifa hauek jarri zituzten: pertsona bakoitzeko marabedi bat, zamarik gabeko abere bakoitzeko bi marabedi, eta abere zamadun bakoitzeko hiru marabedi. Zubirik ez zegoenez, ez dago esan beharrik diru‑iturri finko hori garrantzi handikoa zela udalaren diru‑kutxa betetzeko.

Orioko historia betiere Oria itsasadarrari estu‑estu lotuta ageri da. Izan ere, naturarekin etengabeko auzitan ibili da, Orio, hondar‑barra arazotsua dela eta. 1533an Gipuzkoako Batzar Nagusiak Oriori laguntza itsasorako irteera hobetzeko laguntza ematea erabaki zuen. Serapio Mujikak Gipuzkoako monografian Oriok errege‑erreginei eta Gipuzkoako Foru Aldundiari hondar‑barra eta moilak zaintzeko zenbat aldiz eskatu zien aipatzen du.

Orioko Pilliku plaza.

Garai honetan oriotarren jarduna epikoa izan zen, Belle Isle itsasartean eta Kanadako Labrador penintsula aldean baleak harrapatzen aritu zirenean. 1577ko Juan Martinez Larrume marinel oriotarraren testamentua, Kanadan idatzitako testamenturik antzinakoena da.

Gipuzkoako Foru Aldundiak argitaratutako La Industria pesquera de Guipúzcoa a finales del siglo XVI (1944) liburua irakurtzean, Gipuz­koa izeneko eremu zoragarri hartan arrantzak zuen garrantzia ondorioztatzen da. 1599ko errege‑agindu batek —errege‑idaz­kari Kristobal Ipiñarrieta urretxuar ospetsuak sinatuak— korrejidoreari agintzen zion arrantza‑industriaren egoerari buruz­ko txostena egitea. Orioko arrantzaleen izenean, Josepo Etxaniz eta Lazaro Segura mintzatu ziren, eta adierazi zuten Orioko itsasadarrean mihi‑arrainak, lupiak, kolakak, izokinak, korrokoiak eta beste arrain txiki batzuk harrapatzen zituztela. Oria ibaian gora joanez gero, berriz, amuarrainek, barboek, aingirek eta izokinek heltzen omen zioten amuari. Izokinak oholesitan edo nasetan harrapatzen zituzten, eta nasa horiek itsasadarrean eraikitzeak 150 dukat balio zuen. Lau gizon aritzen ziren haien zainketa‑lanetan. Nasa horien errentaren ordainetan 1.045 kobrez­ko erreal hartu zituen Orioko udalak 1594an, eta handik lau urtera %10 gehiago.

1609an beste albiste batek oriotarren poza eragin zuen, izan ere, erregeak diru‑kopuru galanta eman zuen lehenengo arrantza‑kaiaren zimenduak jartzeko: 14.000 dukat, hain zuzen. Gabriel Hoa oriotarrak — Filipe III.a Espainiakoaren estatu‑idaz­kariak— diru‑laguntza emateko erabakian eragin zuela irizten diotenak ez dira, ez, oso oker ibiliko.

Izokin fresko hori merkatariek eta mandazainek erosten zuten, eta haien abere‑taldeekin beste eskualde batzuetara eramaten zuten. Arrain gutiziatu horren libra bakoitza bi errealen truke saltzen zuten, eta amuarrainak erreal baten truke. Oria ibaian berebiziko izokin‑mordoa zegoen: XVI. mendean Tolosako Santa Maria eliza eraikitzen jardun zuten harginek idatziz­ko protesta aurkeztu zuten, ia egunero izokina ateratzen zietelako baz­kaltzeko. Antxoa gazitua eta gozatua, hiru hilabeteko kontserbazio‑bermea zuena, frantsesek erosten zuten barra‑barra. Geroago nazioartean ospe handia hartu zuten Aginagako angulak, Oria itsasadarrean harrapatuak, Oriotik goraxeago.

Bizkaiko golkoan harrapatutako azken sardako balea (Orio, 1901).

1901eko maiatzaren 14an Orion arrantzatu zuten Bizkaiko golkoan harrapatutako azken sardako balea. Orioko arrantzaleek arpoia gabe dinamita erabili zuten animalia hiltzeko. Gertaeraren oroigarri, Balearen bertsoak jarri zituen bertsolari anonimo batek, eta Benito Lertxundi oriotar kantariak famatu bihurtu zituen.

1903an, itsasadarra bideratzeko ez­ponda berreraikitzea eta Arribiribilla esaten zioten harkaitz arriskutsua leherraraztea erabaki zuten. Aurrekontua 22.000 pezetakoa zen, Aldundiak erdia jarri zuen, eta beste erdia Udalak eta Orioko arrantzaleen kofradiak. Geroago, itsasadarra zabaltzeko eta dragatzeko zenbait obra egin zituzten, guztiak ere premiaz­koak. Izan ere, hondar‑barra 6 oineko sakoneran geratzen zen itsasbeheran, eta 22 oineko sakoneran itsasgoran; horrexegatik, itsasontziek nahiago zuten itsasgora, zailtasun eta arrisku txikiagoz lehorreratzeko edo itsasoratzeko.

Gaur egungo egoera oso bestelakoa da: hobekuntza handiak egin dituzte eta Orioko kirol-portua eraiki dute.

Ekonomia

Arrantza

Orioko kale nagusia.

Orioko udaletxea (atzean).

Arrantzari lotutako herria izan da aspaldiko mendeotan Orio. Orain hamar urte baino bapore gutxiago dago, gaur egun, herrian. Gogorra da arrantzaleen bizitza, eta behera egin du, nabarmen, arrantzaren presentziak. Oraindik, hala ere, herri arrantzalea da Orio. Herriko plazaren parean lotuta, han egoten dira baporeak, portuari kolorea emanez eta herria dotore jantziz. Ederra da itsaso zabalean ibiltzen diren bapore horiek Oria ibaian atseden hartzen ikustea.

Otsaila aldean hasten dute denboraldia arrantzaleek; hasieran, antxoatan jarduten dute nagusiki, baina berdela, txitxarroa eta abar ere harrapatzen dituzte batzuetan. Otsaila eta ekaina bitartean, astelehenetik ostiralera ibiltzen dira itsasoan. Pozgarria izaten da ostiralean baporeak herrira sartzen ikustea. Giro berezia sortzen dute herrian arrantzale lehorreratu berriek: kresalaren usaina ekartzen dute, beren arrantzale zirak jantzita itsas-zaporea banatzen dute herri osora, eta han ibiltzen dira, gora eta behera, beren gurdi, sare eta abarrekin.

Uztaila hasieran, Orioko San Pedro festak izan eta gero, kanaberak hartu, eta atuna harrapatzeari ekiten diote arrantzaleek. Urrutira joan behar izaten da atunetara, eta aste beteko irteera ez da nahikoa izaten. Horregatik egin behar izaten dituzte hogei bat eguneko irteerak. Gogorra da arrantzalearen bizitza, udaberri eta udara aldean.

Hogei bat eguneko mareak egiten dituzte itsasoan, lehorrera bueltatu, eta egun bat baino ez dute izaten lagun eta senitartekoekin egoteko, hurrengo egunean, berriz itsasoratzen baitira, atunaren bila.

Abendura arte ibiltzen dira atunetan. Abenduaren 6a Orioko San Nikolas patroiaren eguna izanik, herriko festak izaten dira, eta ordurako etxean egon nahi izaten dute arrantzale guztiek. Abendutik otsailera arte lehorrean izaten dira lasai, bai oporretan, bai baporea hurrengo denboraldirako margotzen eta prestatzen.

Angulak

Baxurako baporeez gainera, baporetxo txiki asko dago Orion. Ibaian barrena barreiatuta, motor asko dago herrian. Oria ibaiaren itsasadarra atzean utzi, eta txipiroitara joaten dira asko; beste asko arrain txikitara ateratzen dira (panekak, dontzeilak, itsas-kabrak... harrapatzera), eta ibaian bertan geratzen dira beste batzuk, neguko gau hotzetan, angula preziatuak harrapatzeko asmoz.

Oria ibaian gora eginez, herritik oso gertu, Aginaga dago, angulei estu-estu lotuta bizi den herria. Han saltzen dituzte Orioko anguleroek Orian harrapatutako angulak; gero, handik, mundu osoko herrialde askotara banatzen dira angulak. Txinatarrak dira angula erosle nagusiak. Arrozaren zomorro txiki guztiak jaten dituzte angulek, eta horretarako erabiltzen dituzte txinatarrek, arroz garbi-garbia lortzeko. Gero, gainera, balio handia hartzen dute angulek, han oso preziatuak baitira aingirak. Gurean, ordea, aingirari baino askoz balio handiagoa ematen zaio angulari.

Jaki oso preziatua da angula. Ezin da nonahi harrapatu, eta oso garestia izaten da. Pribilegiatuak dira asko Orion, inoiz erosi gabe, urtero jaten baitituzte angulak.

Lehorreko arrantza

Lehorretik arrantzan jende asko jarduten da Orion. Gehienak hondartza inguruan aritzen dira, Oria ibaiaren itsasadarra leku ezin hobea baita lupiak-eta harrapatzeko. Hala ere, ibai osoan zehar, bi aldeetako edozeinetan topa daiteke noiznahi jendea arrantzan.

Gaur egun, zaila da Orioko barrara joan, eta kanaberarik ez ikustea. Behin ere jende gehiegi egoten ez bada ere, arrantzaleren bat beti izaten da barran edo hondartzaren bestaldean, harrobian. Gutxitan uzten dute hutsik hondartza ingurua. Pieza ederrak ateratzen dituzte tarteka, eta itxaropen horrekin hurbiltzen dira hara. Hala ere, arrantzan egitea bera izaten dute gozagarri: itsasoaren isiltasunarekin bakarka egotea, kresala barneratzea, ingurua gozatzea... Toki ederra da Orio, horretarako.

Orioko kirol-portua.

Demografia

Orioko biztanleria

Politika

2011ko maiatzaren 22ko hauteskundeetako emaitzen ondorioz, Bildu koalizioko Beñat Solaberrieta hautatu zuten alkate. Alderdirik bozkatuena EAJ izan zen arren, Solaberrietak bere alderdiaren eta Orain plataformaren botoak eskuratu zituen.

2015eko udal hauteskundeetan Bilduren ondorengoa zen Euskal Herria Bildu koalizioak zinegotzi bat galdu zuen, eta PSE-EE alderdiak bat lortu zuen. Orioko Aukera Independentea herri plataformak eta EAJ alderdiak zinegotziak mantendu zituzten. Emaitza horiekin, EAJ alderdiko Jose Angel Zaldua hautatu zuten alkate, bere alderdiaren eta PSE-EE alderdiaren botoekin.

Orioko udalbatza
Alderdia		2015eko maiatzaren 24a		2011ko maiatzaren 22a
		Zinegotziak	Boto kopurua	Zinegotziak	Boto kopurua
	Euzko Alderdi Jeltzalea (EAJ)	6 / 13	1.133 (% 40,74)	6 / 13	1.268 (% 43,89)
	Euskal Herria Bildu*	4 / 13	890 (% 32,83)	5 / 13	1.038 (% 35,93)
	Orain: Orioko Aukera Independentea	2 / 13	433 (% 15,97)	2 / 13	395 (% 13,67)
	PSE-EE	1 / 13	236 (% 8,71)	0 / 13	113 (% 3,91)
* 2011n Bildu koalizioa aurkeztu zen.
Datuen iturria: 2015eko eta 2011ko udal hauteskundeen emaitzak euskadi.eus webgunean

Aurreko hauteskundeak

Alderdiak	2011		2007
	Botoak	Zinegotziak	Botoak	Zinegotziak
Euzko Alderdi Jeltzalea (EAJ)	1.268	6	857	4
Bildu	1.038	5	-	-
Orain: Orioko aukera	395	2	-	-
Euskadiko Alderdi Sozialista (PSE-EE-PSOE)	113	-	177	1
Alderdi Popularra (PP)	38	-	60	-
Aralar	37	-	486 (EB-Brekin)	2
Eusko Abertzale Ekintza (EAE)	-	-	689	3
Eusko Alkartasuna (EA)	-	-	202	1

Ondarea

Artikulu nagusia: «Orioko Alde Zaharra»

Eraikinak

• Almirante Oa kaleko 7. zenbakiko etxea
• Azurzaenea etxea
• Bikarioetxea
• Done Jakue Bideari buruzko Interpretazio Zentroa
• Claessens etxea
• Endaia etxea
• Herriko plazako 3. zenbakiko etxea
• Iturriaga jauregia
• Kale Nagusiko 6. zenbakiko etxea
• Kale Nagusiko 8. zenbakiko etxea
• Kale Nagusiko 10. zenbakiko etxea
• Kale Nagusiko 12. zenbakiko etxea
• Kale Nagusiko 15. zenbakiko etxea
• Kale Nagusiko 22. zenbakiko etxea
• Kolon Txiki edo Mirandanea etxea
• Makazaga etxea
• Mari Maestra Enea etxea
• Mitxelena etxea
• Orioko Alde Zaharra
• Orioko udaletxea
• Piedadearen baseliza
• Pikota etxea
• Salatxo etxea
• San Martin eliza
• San Nikolas eliza
• Uzkun etxea

Zubiak

• Orioko zubia
• Orioko A-8 autobidearen zubia

Bestelakoak

• Enbil pilotariaren irudia
• Oteizaren Pietatea

Plazak

• Endaia plaza
• Herriko Plaza
• Pilliku plaza

Portuak

• Orioko portua
• Orioko kirol-portua

Kirolak

Orioko trainerua.

Arraunketa da Orioko kirol nagusia. Orio Arraun Elkartea talde historikoa herriko ikurra da, palmares zabala baitu.

Honetaz gain beste hainbat kirol talde ere badaude, Orioko Futbol Taldea eta Orioko Bate Bizkorrak esate baterako.

Kultura

Jaiak

Herrian bi festa ospatzen dira nagusiki: sanpedroak ekainean, eta sanikolasak abenduan. Nahiko giro desberdineko festak izaten dira. San Pedro jaiak Euskal Herriko toki askotan ospatzen dira eta inguruko hainbat herritan ere bai. Hori dela eta, kanpoko jende gutxiago izan ohi da Orioko sanpedroetan, eta bertakoek egiten dute festa nagusiki. Sanikolas jaietan, berriz, kanpoko jende ugari izaten da, bi arrazoi hauengatik: batetik, beste inon ez da garai horretan festarik izaten; eta, bestetik, abenduaren 6a eta 8a jai egunak direnez, inguruko festazale guztiak etorri ohi dira Oriora.

• Orioko udako jaia sanpedroak dira, eta egun handia ekainaren 29an ospatzen da. Arrantzaleek santuak hegaluzearen arrantzan babestuko dituela ospatzen zuten garai batean eta egun, hegaluze garaia hasi aurreko azken egunak aprobetxatzen dituzte jai giroan. Normalean, lau festa egun izaten dira: San Pedro bezpera (ekainak 28), San Pedro eguna (ekainak 29), San Pedro bigarrena (ekainak 30) eta San Pedro hirugarrena (uztailak 1).
• Abenduko zubian, herriko patroiaren festak ospatzen dira, sanikolasak. Abenduaren 5ean hasten dira, normalean, eta abenduaren 8an amaitu. Herria kanpotarrez betetzen da. Festa hauetan euskal-jai eguna ere ospatzen da.
• Gazte festak irailaren azken aste-bukaeran egiten dira. Festa autogestionatuak dira, udalaren diru-laguntzarik gabe egiten direnak eta herriko koadrilen artean antolatuak. Arrakasta itzela dute herriko gazteen artean eta benetako herritar giroa sumatzen da.
• San Martin auzoko festak. Azaroaren 11ren inguruan ospatzen dira, normalean, asteburuak aprobetxatuz. Herriko baserritarren festa izaten da eta tradizio handikoa da.
• Beste jai ezagun bat Bisiguaren eguna da, azken urteotan indarra hartzen ari den ospakizuna da. Hasieran, ekaineko hirugarren igandean izaten zen eta lehiaketa bat antolatzen zen herriko sukaldarien artean. Egun, festa elitistagoa bihurtu da, herriko plazan 45 euroren truke menu berezi bat eskaintzen baitute. Festa hau uztailaren erdialdean egiten da, ahalik eta kanpotar gehien herrira biltzeko asmoz. OE edo Orio estilora markaren azpian EAJ alderdiak Orion duen izaera elitistaren azpian beste hainbat ekitaldi ere egiten dituzte, hala nola Orion Jai! edota Txuletaren Festa. Egun hauetan, Euskal Herriko produktuen azoka izaten da herriko plazan.
• Modu berean, Orio Arraunketa Elkarteko (OAE) garaipen bakoitzari ospakizun txiki bat egiten zaio; herri guztia udaletxearen aurrean elkartzen da arraunlariei ongietorria emateko.

Orioko San Nikolas eliza eta kale nagusia.

Gastronomia

Orioko kaleetatik ibiliz berehala ikusten da gastronomiak duen garrantzia herrialde honetan. Han eta hemen, hainbat txokotan, bertako jatetxeen parrilletan ikatzarekin prestatzen dira arrainak eta haragiak.

Orion bisigua parrillan da jaki nagusia, baina ezin ditugu ahaztu Oria ibaian harrapatutako angulak, primerako haragiak, antxoak edo atuna; hori guztia herrialdeko txakolin, sagardo edo ardoaz lagunduta. 2008ko Bisiguaren Egunerako Orioko okindegi nagusiek "Bisigoxo" izeneko postrea diseinatu zuten.

Dantza

Duela hamabost urte sortu zen Orioko dantza taldea den Harribil, itsas bazterreko harkaitz biribil bati izena kenduta. Herritarrak dantzara biltzea zen sortzaileen asmoa. Hori bai, hamabost urte hauetan, herrian dantzatzeaz gain, kanpora ere joan dira beren dantzak erakustera: Donostiako Musika Hamabostaldian, Frantziako Saint Ciers sur Gironden eta Italiako Orio-Canavessen izan dira, Euskal Herriko hamaika herritan bezala. Duela zortzi urte gazteenek hartu zuten erreleboa eta gaur egun 30 bat gazte dabiltza Harribilen dantzak ikasten eta plazaratzen. Euskal dantza tradizionalak lantzetik taldean sortutako koreografiak erakustera pasatu dira.

Oriotar ospetsuak

• Jose Maria Lertxundi (1836-1896), frantziskotar fraidea eta arabista.
• Manuel Olaizola (1861-1941), traineru patroia.
• Juan Zaragueta (1883-1974), filosofoa.
• Maria Camino Arregi, Mari Maestra (1883-1962), herriko andereinoa eta euskararen sustatzailea.
• Domingo Mitxelena (1894-1959), traineru patroia.
• Jorge Oteitza (1908-2003), eskultore, olerkaria eta arte-teorilari garaikidea.
• Inazio Sarasua (1910-1994), traineru patroia.
• Batista Oliden (1925-1998), arraunlaria.
• Antonio Oliden (1926), arraunlaria eta patroia.
• Juan Lizarralde "Altxerri" (1934-2013), arraunlaria eta patroia.
• Klaudio Etxeberria "Gorria" (1937-2000), traineru patroia.
• Benito Lertxundi (1942), kantaria.
• Esteban Azkue (1944), munduko txapelduna tiro olinpikoko foso modalitatean.
• Anjel Andu Lertxundi (1948), idazlea.
• Jose Luis Korta (1949), arraunlari ohia eta hainbat traineruetako patroia.
• Iñake Irastorza (1955), aktorea.
• Xabier Lizaso (1965), piano-jotzailea.
• Imanol Alguacil (1971), Futbolari profesionala.
• Irakoitz Etxeberria (1973), Orio Arraun Elkarteko patroia.
• Ibon Gaztañazpi (1977), arraunalari ohia eta kazetaria.
• Oihana Alkorta (1977-2007), abeslaria.
• Iñaki Gurrutxaga (1981), bertsolaria eta idazlea.
• Oihane Mateos (1981), kazetaria.
• Oiana Blanco (1983), judoka, 2009ko munduko txapeldunordea 48 kiloko kategorian.
• Iosu Esnaola (1986), futbolari profesionala.
• Gozategi (1991), musika taldea.
• Idoia Etxeberria (1992), harri-jasotzailea, 150 kg altxata emakumezkoen munduko errekorra duena.
• Jon Azkue (1994), eskubaloi jokalaria.

Orioko hondartza.

Kanpo loturak

Wikimedia Commonsen badira fitxategi gehiago, gai hau dutenak: Orio

Euskarazko Wikipedian bada atari bat, gai hau duena: Gipuzkoa

• (Gaztelaniaz) Orioko webgune ofiziala
• Informazio turistikoa
• Orio Arraunketa Elkartearen webgunea
• Herriko albisteak Karkara herri aldizkariaren webgunean eta "Tokikom" atarian