Tripaki argi

Tripaki argia
Sailkapen zientifikoa
Erreinua:	Fungi
Filuma:	Basidiomycota
Klasea:	Agaricomycetes
Ordena:	Cantharellales
Familia:	Hydnaceae
Generoa:	Hydnum
Espeziea:	Hydnum repandum L., Fr. (1821)
Ezaugarriak
eztenak himenioan   txapel zapaldua   himenioa dekurrentea da   hanka biluzik dago   espora zuriak dauzka   edo espora kremak dauzka   mikorrizak eratzen ditu   jangarria da Oharra: ez fidatu soilik orri honetan ematen diren datuez perretxiko bat identifikatzeko orduan. Inolako zalantzarik izanez gero, kontsultatu aditu batekin.

Tripaki argia (Hydnum repandum) onddo espezie bat da. ADN ikerketek erakutsi dute harreman estua duela Cantharellus cibarius espeziearekin.

Morfologia

Tripaki argiaren txapela 6 eta 12 cm bitarteko diametrokoa da, haragitsua, trinkoa, hori argia edo laranjaxka, lehorra eta matea, ilupaduna eta batzuetan zartatua. Hasieran borobila bada ere, gero zabaldu egiten da eta ertz gingildun irregularra dauka.

Txapel azpian eztenak dauzka, oso hauskorrak eta erraz askatzen direnak, estutuak, dekurrenteak eta txapelaren kolore berekoak edo apur bat argiagoak.

Hanka zurbila, lodia, irregularra eta gehienetan laburra da.

Haragi zuria dauka, hauskorra, usaingabea eta zapore zertxobait mingotsekoa.

Espora zuri-kremak dauzka, borobilak baina apur bat zorrotzak.

Ekologia

Hostozabalen eta koniferoen baso itxietan agertzen da, taldeka edo sorgin-korroetan. Gehien bat udazkenean eta neguan sortzen da.

Gastronomia

Jangarria da, baina mingostasun puntu bat dauka, batez ere ale helduek. Ez da denen gustukoa.

Kanpo loturak

• (Euskaraz) Hydnum repandum Errotari mikologia elkartearen webgunean
• (Ingelesez) Hydnum repandum Mycobank-en