Inauteriak Euskal Herrian

Bideo hau Ikusgela proiektuaren parte da. Bideoak dituzten artikulu guztiak ikus ditzakezu hemen klik eginez gero.

Inauterien gaineko zortzi bitxikeria.

Euskal Herriko inauterietan antzinako tradizioari atxikitakoak (bereziki herri txikietan), nahiz hiri eta herrietan ospatzen diren inauteriak daude. Toki batetik bestera egun desberdinetan ospatzen dira: Zubieta eta Iturenen, urtarrileko azkeneko igandearen osteko lehen astelehen eta asteartean; Tolosakoak, inauterien ohiko egunetan, Ostegun Gizen egunetik Astearte Inautea (edo Asteartita) egunera arte, hausterre-egunaren bezperan; azkenik, Algorta, Plentzian, Bilboko Santutxu auzoan eta Errenterian, besteak beste, Piñatako inauteriak ospatzen dira, ohiko inauterien ondorengo hurrengo asteburuan.

Jatorria

Iturengo joaldunak, tunturroa buruan, joareak bizkarrean, ardi larrua soinean.

Julio Caro Baroja antropologoaren arabera, “Inauteri” hitzak hiru osagai ditu: INAU aldaera, -TE atzizkia eta -ERI atzizkia. Lehen elementuak “karnabal” esan nahi du; -TE atzizkiak “garaia” adierazten du (gerrate, lehorte, gosete, elurte, eurite, haizete...) eta -ERI atzizkia bizioekin lotuta dago. Antropologoaren arabera, ospakizun hori erokerietan edo eguneroko bizimodutik urrun dauden jarreretan oinarritzen da eta hortik dator “inauteri” hitzaren esanahia.^[1]

Euskal inauterien jatorria ez dago argi, eta hori azaltzen duten hainbat hipotesi daude. Gehienak “Karnabal” hitzaren etimologian oinarritzen dira. Aditu batzuek erromatar kulturako Saturnal eta Lupercalia jaietan oinarritzen direla esaten dute. Beste batzuek Garizumarekin eta horrek daukan haragia jateko debekuarekin lotzen dute (hortik, Euskal Herriko eremu batzuetan inauteriei “aratusteak” ere deitzen zaie, “haragia uzte”-tik datorrena).

Hala ere, esaten da euskal inauteriek beste jatorri bat dutela. Tradizioa neguaren amaierarekin eta udaberriaren helduerarekin dago lotuta. Ehiza, arrantza edo nekazaritzatik bizi zirenentzat, urtaro aldaketa oso garrantzitsua zen, baina artzainentzat batez ere. Horiek urte erdia mendian bizitzen igarotzen zuten eta elur-garaian etxeetan babesten ziren, ia janaririk gabe. Horregatik, neguaren amaiera ezinbestekoa zen haientzat, bizitza berri bat zekarrelako. Gosete eta hotz garaia atzean uzteko, janariz, edariz eta musikaz beteriko festa bat ospatzen zen. Haietan zenbait erritu eta sakrifizio gauzatzen ziren lurraren eta emakumeen emankortasuna ziurtatzeko edota etxe-abereak basapiztien atzaparretatik zaintzeko.^[2][3]

Jaiak

Unanuko inauterietako mamuxarroak.

Tolosako inauteriak zezen plazan.

Hego Euskal Herrian Francoren diktaduran zehar jai horiek debekatu eta asko galzorian egon ziren. Toki batzuetan, Tolosan esaterako, jarraipena izan zuten garai hartan, Udaberri jai moduan.

Nafarroan bereziki atxiki da antzinako inauteri tradizionala: Ituren eta Zubietako inauteriak, Lantzeko inauteria eta Unanuko inauteriak dira bereziki lehengo inauteri tradizioari eusten diotenak. Berako inauterietan, berriz, tradiziozko inauteriari elementu berriak erantsi dizkiote, hala nola artzain eta inudeen desfilea eta dantza.

Araban Zalduondoko inauteriak dira ezagunak. Haietan, Markitos pertsonaia erretzen da. Salcedon, Porretero izeneko pertsonaia epaitu eta teilatu batera botatzen dute azkenean.

Gipuzkoan, Tolosa eta Donostiako hiri inauteriak dira jende gehien biltzen dutenak. Lezon molde tradizionaleko inauteria sortu zuten XX. mendearen bukaeran, Trapujale pertsonaiarekin. Oiartzunen Ihotik egiten dira, Intxixu, basandre eta sorginen pertsonaiekin batik bat. Gerra aurretik hasitako usadioa da eta urte asko ezerezean egon ondoren, herritarrek berreskuratu eta berriro martxan jarri zen. Inauterien aurreko asteburuan, Arditurriko mendi zoleetatik ateratzen dira, udala hartu eta hiru egunera berriro Kataxulo haitzulora bueltatzen dira.

Durangoko Surrandien konpartsa

Arteako Kokomarroak

Bizkaian, Enkarterrin hain zuzen, Carrascoliendas dute izena eta parte-hartzaileek oilar beltz bat eskuan, koplak abesten zituzten oilar beltzaren historia eta orduko kontuei buruz.^[4]Durangon Surrandien konpartsa irteten da kalez kale, hartza lagun, zapatu karnabalez, Jaizale taldeko txistularien eta Tabira Musika Bandaren doinu hotsean. Eskuan putxikak eramaten dituzte ingururatzen direnak zirikatzeko.Artean (Arratia) Kokomarroak irteten dira kalejiran eta "kuberue" izeneko panpina erretzen dute epaitu ondoren.

Lapurdin Kaskarotek eta Zanpantzar izeneko pertsonaiak –azkenean, pertsonaia hori erre egiten da– dute protagonismo berezia. Batez ere Uztaritzeko inauteriak tradizioari lotuta segitzen du.

Nafarroa Behereko inauterietan desfile bat egin ohi da, Kabalkada izenekoa. Honetan parte hartzen duten pertsonaiarik ezagunenak Bolantak dira. Dantzariak dira eta lepotik zetazko koloretako zintak daramatzate. Desfilearen amaieran joaten dira. Haietaz aparte, Zaldikoak, Zapurrak, Makilaria, Erraldoitxoak eta abar joaten dira.

Zuberoan Maskaradak izaten dira garai horretan. Maskaradak ere inauteriekin daude lotuta. Pertsonaiak bi multzotan banatuta daude: beltzak eta gorriak. Gorriak garbi eta dotore jantzita doaz eta haien kolore nagusia gorria da. Horietan daude txerrero, artzaina, gatuzain, kantiniersa eta zamaltzaina, besteak beste. Beltzak, itxura zarpailtsu eta zikinarekin, musikarien atzetik doaz desfilea itxiz: ijitoak edo buhameak, berzkinak edo kauterak, zorrotzaileak eta eskaleak.

Oiartzungo Ihotik

Inauterietako pertsonai nagusien kokapena

Inauterietako pertsonaia nagusi batzuen infografia

Inauteri-eguna	Izen herrikoiak
Inauteri-osteguna	Ostegun Gizen, Orokunde, Orakunde, Sasi-koipatsu, Eguen Zuri, Eguen Lardero, Lerdo-egün, Otsabilko Eguna
Inauteri-ostirala	Ostiral Melar
Inauteri-larunbata	Larunbat Erdiko, Larunbat Erdipurdi
Inauteri-igandea	Aratiste eguna, Domekei Karnabala, Zaldunita, Zalduniota
Inauteri-astelehena	Astelenita, Asteleniota
Inauteri-asteartea	Asteartita, Martisen Aratiste

Historia

Euskal Herriko Inauteriak aipatzen dituzten lehenengo dokumentuak Erdi Aroakoak dira. Hala ere, aurrehistoriatik ospatzen direla uste da, hala nola, gizakiak artzain bihurtzen hasi zirenetik.

Frankismoaren garaian, Elizak indar handia zuen eta ez zitzaion komeni hainbeste eduki pagano zuen festa bat onartzea. Horregatik, inauteriak guztiz debekatu zituzten. Herri gehienek ospatzeari utzi zioten, baina Unanuan, adibidez, diktaduran zehar Inauteriak ospatzen segitu zuten. Diktadura amaitu ondoren, 1980-1990eko hamarkadetan, herri gehienek ohitura berreskuratu zuten. ^[5][6]

Gaur egun, bi inauteri mota ospatzen dira Euskal Herrian. Alde batetik, ospakizun tradizionalei eta mitologiari lotuago daudenak, eta bestetik, modernoagoak.

Lesakako Zakuzaharrak

Tradizionala

Inauteri tradizionalak, natura eta antzinako ohiturekin erlazionatuta daude. Hasieran, artzain eta baserritarrak animalien larruekin mozorrotzen ziren. Mitologiarekin lotuak zeuden eta, herriaren arabera, hainbat ospakizun egiten ziren. Gaur egun, tradizio horiek errespetatzen jarraitzen dira eta herri batzuk oso ospetsuak egin dira.  Lantzeko inauteriak, adibidez, ospe handia lortu du. Euskal Herrian eta Europan, Zuberoako maskaradak dira inauteri tradizional ospetsuenak. Hainbat herrialdetan maskaraden bertsio propioak egin dituzte, Andorran, Suedian edo Alemanian, besteak beste.

Tolosako inauteriak

Modernoa

Inauteri modernoei buruz hitz egiten denean, Tolosako Inauteriak dira ospetsuenetarikoak. Inauteri mota honetan, karrozak dira elementu garrantzitsuenak. Kolore eta argiz betetako karrozen desfile bat egiten da, gehienetan musikarekin lagunduta. Tradizioarekin zerikusi gutxiago dauka eta ikusgarriagoak dira. Normalean, urtez urte aldatzen dira.

Pertsonaia nagusiak

Atorrak (Mundaka)

Atorrak Inauterietako Igandeetan ateratzen dira Mundakan. Normalean, bandako zuzendaria izan ezik, guztiz zuriz janzten dira. Zuzendaria praka eta kapela beltzarekin ateratzen da. Musikarekin batera, burkoaren azala janzten dute. Batzuetan buru-aurpegiak estaltzen dira eta beste batzuetan ez. Aurpegia estaltzen ez dutenak bibote handi batekin joaten dira. Lehen, kirruz egindako soinekoak erabiltzen zituzten. Gaur egun, edozein oihal mota erabiltzen da. Bi gona zuri daramatzate, horietako bat buruan sartuta. Herrian zehar beraien instrumentuak jotzen dituzte, portura iritsi arte. Bertan, petril baten gainean jartzen dira eta ekitaldiak egiten dituzte. Urtero kanta berri bat asmatzen dute eta aurreko urteetako abestiekin batera kantatzen dute.^[8]

Hartza (Arizkun, Ituren, Zubieta...)

Hartza Aurtitzen joaldunez inguratuta.

Gizon edo gazte batek bere gorputza artilez estaltzen du eta hartzarena egiten du. Arizkunen hartzarekin zaintzailea doa, hari lotuta, hartzak ihes ez egiteko. Bitartean, animalia kaleko jendea izutzen saiatzen da. Festa hori beste hainbat lekutan ospatzen da.^[8]

Iturengo joalduna

Joaldunak (Ituren eta Zubieta)

Zubietako joaldunek ator zuria janzten dute, Iturengoek, aldiz, ardi larruzko txalekoa. Gerrian ardi larrua jartzen dute eta bertan joareak lotzen dira. Oso garrantzitsua da gerriko ardi larrua, horren kokapenaren arabera joarearen soinua desberdina delako. Galtza urdinak janzten dituzte eta oinetan larruzko zein gomazko abarkak. Ttuntturroa izeneko txapela eramaten dute; horrek metro erdiko altuera eta kukurutxo forma du. Bertan kolorezko oihalezko xingolak jartzen dituzte eta txapelaren puntan oilar lumak izaten dituzte.

Joaldunak eskuan zartailua darama. Heldulekua egurrezkoa da eta honen soka zaldi ileekin dago eginda.

Bizkarrean bi joare txiki daramatzate, eta gerri atzean beste bi handi. Joareak modu oso zehatzean ipinita daude joaldunari kalterik ez egiteko eta nahigabean soinua egin ez dezaten. ^[9]

Zanpantzar (Lapurdi eta Nafarroa Beherea)

Lapurdin eta Nafarroa Beherean, Zanpantzar lastozko panpina da pertsonai nagusia. Inauterietako azken egunean epaitu eta erre edo itotzen dute. Panpina hiltzearekin batera gaitzak ere hiltzen direla esaten da. "Zanpantzarrak" joaldunei buruz hitz egiteko erabiltzen den hitza ere bada, baina Ipar Euskal Herrian pertsonai hau desberdina da.^[8][9]

Markitos

Markitos (Zalduondo)

Zalduondo herriko maisuari Larderako ostegunean opariak egiteko ohitura zegoen. Haur bakoitzak txorizoa edo arrautzak oparitzen zizkion.

Markitosak metro eta erdiko altuera izaten du. Hezurdura egiteko bi makil erabiltzen dituzte, batekin gorputza eginez eta bestearekin besoak. Praka zaharrak jartzen dizkiote eta hauek goroldioz betetzen dituzte. Gorputzeko goiko aldea edozein koloretako atorra batekin estaltzen dute, goroldioaz betetzen berriz ere. Arroparekin amaitzeko atorraren gainetik jertse bat jartzen diote. Lapiko bat jartzen dute burua balitz bezala, eta hau kartoizko maskara batekin estaltzen dute. Oinetan lehenago larruzko abarkak jartzen zizkioten, baina gaur egun botak erabiltzen dituzte.^[8][9]

Miel Otxin

Miel Otxin (Lantz)

Lantzeko inauterietako pertsonai nagusia Miel Otxin da. Erraldoia bi pago-adarrekin egiten da. Batarekin, besoak egiten dira eta bestearekin gorputzaren beste atal guztiak. Burua kartoizko maskara eta txapel batekin estaltzen da, eta lepoa painelu batekin tapatzen da. Ator estanpatu bat eta galtza urdinak ditu jantzita. Hiru metroko altuera du eta gorputza goroldioz eta belar idorrez beteta dauka.

Gazte batek Miel Otxin eramaten du, eta aldi berean dantzatzen da. Zaldikoak Ziripot ez du bakean uzten eta etengabe  lurrera botatzen saiatzen da. Txatxoak zaldikoa uxatzen saiatzen dira eta Ziripot lurretik altxatzen laguntzen dute. Burdingileak galderoi batekin doaz eta ibilbidearen leku zehatz batzuetan ingudeak dituzte zaldikoari lagundu ahal izateko.

Asteartean Zaldikoa eta Ziripot gabe Miel Otxin erraldoia plazara eramaten dute eta bertan eskopeta batekin bi tiroz hiltzen dute. Hil ondoren Miel Otxin erre egiten dute eta Txatxoek Zortzikoa dantzatzen dute haren inguruan.^[8][9]

Mamuxarroak

Mamuxarroak (Unanua)

Unanuko inauterien berezitasuna burdinazko maskara misteriotsuak dira. Herriko zazpi gazte Mamuxarroz  janzten dira. Atorra eta flanelazko galtzontzilo zuriekin, gerriko gorri eta beltza daramate. Gerrian ezkilak eta kaskabiloez betetako larruzko zinta bat dute; oso soinu berezia egiten dute. Buruan xingola eta apaingarriz beteriko txanoa janzten dute. Horren azpitik, kolorezko zapiak. Katolak izeneko maskara berezi horiek arinak eta erosoak dira. Maskara horiek burdin xaflez eginda daude, eta duela ehun urte ingurukoak dira. Eskuetan bi metro eta erdiko hurritz-makilak dauzkate, kalean harrapatzen duten edozein egurtzeko.

Mamuxarroak mozorrotu eta gero, Unanuko kale maldatsuetatik korrika doaz jendearen atzetik, hauek harrapatzeko eta egurtzeko intentzioarekin. Geroago, etxez etxe eskatzen joaten dira afari bat egin ahal izateko eta, eguna bukatzeko, dantzaldi bat eskaintzen dute.^[8][9] Altsasuko momotxorroen antzeko rola jokatzen dute.

Zuberoako zamaltzainen ilustrazioa

Zamaltzainak (Zuberoa)

Zamaltzainek zaldi burua eta buztana duen egurrezko armazoi bat daramate lepotik zintzilikatuta. Eskubiko eskua, zaldiaren buruari lotuta dago. Janzteko era oso definituta dago: jaka gorria, bularralde zuria urrezko apaingarriekin, praka beltzak belaunetaraino, beheko aldean urrezko parpailetan amaiturik. Oinetan, galtzerdi eta zapatila zuriak eta, haien gainean, zangozorro beltzak zinta txikiekin; buruan, buruko gorri bat.

Pertsonaia horren lana berezia da. Gerrian daraman zaldi armazoiak dantzatzeko trabak jartzen dituenez, dantzari trebeenak izaten dira paper hori egiten dutenak. Zamaltzainei buruz egindako lehenengo aipamenak XV. mendekoak dira. Horretaz gain, Agosti Xahok 1855. urtean egindako deskribapenaren arabera, sorbaldatik jausten ziren zintak Luzaideko Bolanteenak bezalakoak ziren, eta praka zuriak ziren, beltzak izan beharrean.^[8][9]

Zakuzaharren ilustrazioa

Zaku Zaharrak (Lesaka)

Lesakako Zaku Zaharrak inauterietako igandean ateratzen dira. Zaku Zaharrak prestatzeak lan handia dakar. Hiru zaku erabiltzen dituzte, bat gorputz enborrerako eta beste bi zango bakoitzerako. Forma eman ahal izateko, urrian egindako bigarren mozketan bildutako belar idorra erabiltzen da, meheagoa baita. Burua oihal zuri batez estaltzen dute, begiak eta ahoarentzako zuloak eginez. Azkenik lastozko txapela daramate.

Ibilaldian zehar elkar bultzatzen dute eta jendea izutzen dute. Taberna guztiek ardoa eskaintzen diete. Ikusleak aztoratu ondoren Zaku Zahar guztiak herriko plazarantz abiatzen dira.

Intxixuak (Oiartzun)

Intxixua

Oiartzungo ihoteetako pertsonai basatiak  dira. Zakuz eta larruz egindako arropa basatia daramate. Buru handi bat izaten dute, ile, hortz, begi, sudur eta adar handiz osatua. Arropan apaingarri moduan, hezurrak, oilo hanka… eramaten dituzte. Gomazko abarkak izaten dituzte. Makila edo goraizeak ere izaten dituzte, jendea zirikatzeko. Intxixu bakoitza auzo batekoa denez, edo auzo bat ordezkatzen duenez, auzo horretako kolorezko zapi bat eramaten du.

Inauterien oinarrizko egutegi bat

Urtarrilarekin batera hasten da inauteri garaia. Zuberoako maskaradak, Lapurdiko kaskarotak eta beste zenbait inauteri goiztiar hasten dira urtarrilean. Data nagusiak, ordea, otsailean izaten dira. Esaterako, 2023an otsailaren 16an izan zen Ostegun gizen eta 21ean Inaute asteartea. Inauteri garaiko hainbat festa azaltzen dira inauterietako oinarrizko egutegi honetan. Hiri eta herrietan ospatzen diren inauteri modernoak ez dira sartu egutegi honetan. 2026ko datak azaltzen dira taulan, baina beste urte batzuetako datak asmatzeko erreferentzia ona izan daitezke. Kaskaroten egunetan baina, 2026ko datuak ez daude finkatuta oraindik, 2024ko egutegi osoa bukaeran azaltzen da aparte.

2026ko inauteriak
Astelehena	Asteartea	Asteazkena	Osteguna	Ostirala	Larunbata	Igandea
Urtarrilaren 26 Astelehena Ituren, Aurtitz eta Zubieta: Mozorroak eta Joaldunak	Urtarrilaren 27 Asteartea Zubieta, Aurtitz eta Ituren: Mozorroak eta Joaldunak	Urtarrilaren 28	Urtarrilaren 29 Osteguna	Urtarrilaren 30 Ostirala	Urtarrilaren 31 Larunbata Andoain: Axerien puska biltzea Arizkun Erratzu: Gizakundea Beskoitze: Kaskarotak (?) Uztaritz: Kaskarotak (?) Baiona: Kaskarotak (?)	Otsailaren 1 Igandea Lexantzü: Zuberoako maskaradak Beskoitze: Kaskarotak (?) Ziburu: Kaskarotak (?) Itsasu: Kaskarotak (?)
Otsailaren 2 Astelehena	Otsailaren 3 'Asteartea	Otsailaren 4	Otsailaren 5 Osteguna Arantza: Mozorro zuriak	Otsailaren 6 Ostirala Arantza: Mozorro zuriak Igantzi: puska biltzea ostirala	Otsailaren 7 Larunbata Donostia: Kaldereroak Bera: Kaldereroak Kuartango: Porreroak Lizartza: Puska biltzea eta inauteri dantzak Arano: Zomorroak, puska-biltzea eta zahagi-dantza Oiartzun: Ihote-dantzak, intxixuak eta sorginak Eibar: Koko marruak baserriz-baserri eskean eta koko-dantzak Ilarduia, Egino eta Andoin: Lastozko gizona Igantzi: Puska biltzea Iruñeko Kauterak Iruñea: Arrotxapeko libertimendua Anhauze: Basaldunak eta Txilintxadunak (?) Beskoitze: Kaskarotak (?) Uztaritz: Kaskarotak (?) Itsasu: Kaskarotak (?)	Otsailaren 8 Igandea Donostia: Inude eta artzaiak Lizartza: Puska biltzea eta inauteri dantzak Irun: Inude eta artzaiak Donapaleu: Amikuzeko libertimendua Muskildi: Maskaradak Uztaritze: Kaskarotak (?) Itsasu: Kaskarotak (?)
Otsailaren 9	Otsailaren 10	Otsailaren 11	Otsailaren 12 Ostegun gizena Eskoriatza: Urdelardero eguna Errenteria: Azeri-dantza Lezo: Trapujaleen jaitsiera Bergara: Sorgin-dantza	Otsailaren 13 Ostiral mehea Agurain: Porreteroa eta Sorgina Segura: Hartzaren esnaera Eibar: Kaldereroak Artea: Kokomarroak	Otsailaren 14 Inaute larunbata Pagola: Zuberoako maskaradak Antzuola: Sorgin-dantza Bakaiku: Kamarroak Gallarta: Kalez-kaleko eskea eta dantzak Olazti: Zamarroak eta Neskak Galdako: Altsasuko inauteria Cintruenigo: Zarramuskeroak Urdiain: Mantagunak Hernani: Azeri-dantza Donostia: Jardinzayen konpartsa Durango: Surrandiak Oñati: Oñatiko inauteria Agoitz: Kaskaboboak eta Maskaritak Amezketa: Talai-dantzariak Irun: puska biltzea Beasain: dantza-desfile herrikoia (?) Añorga: Dibertimendua (?) Bera: Kaldereroak (?) Irisarri: Baigurako Libertimendua (?) Beskoitze: Kaskarotak (?)	Otsailaren 15 Inaute igandea edo Zaldunita Urdiain: Momoxarro txikiak Bera: Inude eta artzaiak Zalduondo: Markitos Amezketa: Talai-dantzariak Abaltzisketa: Txantxoak Aretxabaleta: Txino-dantza Lesaka: Goitarrak Lesaka: Zakuzarrak Markina-Xemein: Zahagi-dantza eta Hartza Mundaka: Atorrak Azpeitia: Elegante eguna Gernika: Marrauen soka-dantza Donostia: Jardinzayen konpartsa Irun: puska biltzea Unanu: Mamuxarro gazteak Donibane Garazi: Libertimendua Iruñea: Iruinkokoa Astigarraga: Zirikoketa Beskoitze, Uztaritze, Donibane Lohizune, Kanbo: Kaskarotak (?)
Otsailaren 16 Inaute astelehena Lesaka: Fraindarrak arraultze-eskean Bera: Zingar-arraultze eskea Goizueta: Puska biltzea baserrietan Lantz: Miel-otxin, Ziripot, Zaldiko, Txatxoak eta Ferratzaileak Burlata: Martingala	Otsailaren 17 Inaute asteartea Urdiain: Momoxarroak Arizkun: Sagar-dantza eta Hartza Lantz: Miel-otxin, Ziripot, Zaldiko, Txatxoak eta Ferratzaileak Goizueta: Zahagi-dantza Lesaka: Fraindarrak arraultze-eskean Laudio: Lezeagako sorgina Unanu: Mamuxarroak Altsasu: Momotxorroak Burlata: Martingala Lekeitio: Estudiantina Eskoriatza: Kukumarroak Kanpezu: Toribio Errenteria: Sardinaren ehorzketa Arbizu: Txatamorroak, aittun handiya ta amin txikiya Erratzu: Damak	Otsailaren 18	Otsailaren 19	Otsailaren 20 Ostirala Ziburu: Sorgin gaua (?)	Otsailaren 21 Larunbata Sanfuentes: Kale-kaleko eskea eta dantzak Bakio: Anarru Eguna Saratsu: Porreteroa Iruñea: Arrosadiako libertimendua Añorga: Añorgako Dibertimendua Oztibarreko libertimendua Trapagaran: Carrascoliendas (?) Gamere-Zihiga: Zuberoako maskaradak (?)	Otsailaren 22 Igandea Altzürükü: Zuberoako maskaradak Luhuso: Baigurako libertimendua Kanbo: Kaskarotak (?)
Otsailaren 23	Otsailaren 24	Otsailaren 25	Otsailaren 26	Otsailaren 27	Otsailaren 28 Larunbata Biriatu: Kaskarotak (?)	Martxoaren 1 Altzai-Lakarri: Zuberoako maskaradak

Zuberoako maskaraden egutegia (2026)

2009ko Maskaradak Barkoxen.

Batetik Zuberoako maskaradak ezagutu behar dira, hamabist saio egiten dira, asko dira eta lau hilabetetan kokatzen dira, urtarriletik apirilera arte. 2026ko maskaradaren datak hauek dira:

• Urtarrilak 18, igandea: Iruri / Ozaze
• Urtarrilak 25, igandea: Pettarra (Ainharbe)
• Otsailak 1, igandea: Lexantzü
• Otsailak 8, igandea: Muskildi
• Otsailak 14, larunbata: Pagola
• Otsailak 22, igandea: Altzürükü
• Martxoak 1, igandea: Altzai-Lakarri
• Martxoak 7, larunbata: Maule
• Martxoak 14, larunbata: Idauze
• Martxoak 21, larunbata: Larraine
• Martxoak 28, larunbata: Aloze
• Apirilak 5, igandea: Hoki
• Apirilak 12, igandea: Gamere
• Apirilak 18, larunbata: Barkoxe
• Apirilak 25, larunbata: Zalgize / Mendikota

Libertimentuen egutegia (2026)

Hauek dira 2026ko libertimenduen egutegia:

• Otsailak 7, larunbata: Arrotxapeko libertimendua, Iruñean.
• Otsailak 8, igandea: Amikuzeko libertimendua, Donapaleun.
• Otsailak 15, igandea:
  • Garaziko libertimendua, Donibane Garazin.
  • Iruinkokoa, Iruñean.
  • Zirikoketa, Astigarragan.
• Otsailak 2, larunbata:
  • Oztibarreko libertimendua, zehazteke dagoen toki batean.
  • Arrosadiako libertimendua, Iruñean.
  • Dibertimendua, Añorgan.
• Otsailak 22, igandea: Baigurako libertimendua, Luhuson.
• Otsailak 28, larunbata: Markina-Xemeingo libertimendua, Markina-Xemeinen.
• Martxoak 1, igandea: Baigorriko libertimendua, Baigorrin.
• Martxoak 14, larunbata: Hazparneko libertimendua, Hazparnen.

Kaskaroten egutegia (2024)

Kaskarotak

Urtea hastearekin batera hasten dira kaskarotak dantzan eta eskean. Goiztiarrenak Beskoitzekoak izan ziren 2024an, urtarrilaren 6an egin zuten lehen ateraldia. Urtarrileko eta otsaileko asteburutan Lapurdiko hainbat herritako gazteak puska biltzen, dantzan eta kantuan ibiltzen dira.

• Urtarrilak 6, larunbata. Beskoitzeko kaskarotak - Oinak Arin (Bois auzoa, Mentaberriko borda, Larestako borda, Iribarnegarraia, Eiheralde, Hasparren errepidea, Larreburua, Donamartinia)
• Urtarrilak 7, igandea Beskoitzeko kaskarotak - Oinak Arin (Paoueta, Agerria, Placeu)
• Urtarrilak 13, larunbata Beskoitzeko kaskarotak - Oinak Arin (Enseigne bidea, Xelaia, Sorueta, Jauberria, Patarria, Arbaldegia)
• Urtarrilak 14, igandea Beskoitzeko kaskarotak - Oinak Arin (Ganderatzia, Etxeparia, Pilota Plazako bidea, Tratuenia, Belsusari, Martindegia)
• Urtarrilak 20, larunbata Beskoitzeko kaskarotak - Oinak Arin (Txandondegia, Gainekoetxea, Bide Handia, Gerezieta, Harrieta)
• Urtarrilak 21, igandea Beskoitzeko kaskarotak - Oinak Arin (Iruitea, Bidartea, Gortiaga, Pikassharia, Ospitalia, Alzueta, Otxokolttipia)
• Urtarrilak 27, larunbata
  • Uztaritzeko kaskarotak - Izartxo (Baionan)
  • Itsasuko kaskarotak - Ataize.
  • Beskoitzeko kaskarotak - Oinak Arin (Urt bidea Iturbidia, Etxekoborda, Beherartia, Mendilerroen bidea, Harranburua)
• Urtarrilak 28, igandea
  • Itsasuko kaskarotak - Ataize.
  • Beskoitzeko kaskarotak - Oinak Arin (Larreista, Mixeleta, Iturraldia, Leizaraga, Behotegia)
• Otsailak 3, larunbata
  • Uztaritzeko kaskarotak - Izartxo (Arruntza auzoan)
  • Itsasuko kaskarotak - Ataize.
  • Beskoitzeko kaskarotak - Oinak Arin (Harriaga, Irigoinia, Imistola, Larrondoa, Ildaska)
• Otsailak 4, igandea
  • Uztaritzeko kaskarotak - Izartxo (Heraitze auzoan)
  • Itsasuko kaskarotak - Ataize.
• Otsailak 10, larunbata Beskoitzeko kaskarotak - Oinak Arin.
• Otsailak 11, igandea
  • Uztaritzeko kaskarotak. Uztaritze
  • Donibane Lohizuneko kaskarotak - Begiraleak.
  • Kanboko kaskarotak - Jeikadi.
  • Beskoitzeko kaskarotak - Oinak Arin.
• Otsailak 18, igandea Kanboko kaskarotak - Jeikadi.

• Otsailak 24, larunbata Biriatuko kaskarotak

Kanpo estekak

• Joseba Aurkenerena: Hartza, inauteria eta euskara Azkainen. [1]
• Joseba Aurkenerena: Inauteria eta euskal ikuskera zaharra. [2]* Joseba Aurkenerena: Euskal inauteria eta udaberriko ekinozioa. [3]
• "El carnaval vasco", Juan Garmendia Larrañaga
• Aratusteak auzoz auzo. Uriola.eus Ihauteriak Bilboko auzoetan (2022)
• Oroitzapen kuttunak - Aratusteak-2018. Uriola.eus Ihauteriak Bilboko auzoetan (2018)
• Tolosako Inauteriak

• Datuak: Q2939737
• Multimedia: Carnivals in the Basque Country / Q2939737